Read Hawaii Pidgin Deuteronomy 16 Bible Online

Deuteronomy 16 - Hawaii Pidgin bible

Deuteronomy 16

¹“Make spesho da Abib month ery year spring time, an make da Passova time fo yoa God Yahweh, cuz az was da month wen he wen bring you guys outa Egypt nite time.

²Make sacrifice -- one animal from yoa sheeps, goats, o cows fo da Passova fo yoa God Yahweh. Do um by da place yoa God Yahweh goin pick so peopo can go dea find out wat kine God him.

³No eat da sacrifice meat wit da kine bread dat get yeast, but fo seven days eat ony bread dat no mo yeast, da kine bread you guys eat wen you get hard time. Cuz you guys wen go way real fast from Egypt. So dis goin help you guys rememba all da time you guys stay alive, how you guys wen go way from Egypt.

⁴Passova time, no mo nobody all ova da land goin get yeast fo seven days. Da first Passova day, no let da meat from da sacrifice you guys make nite time, stay till in da morning.

⁵“You no can make da Passova sacrifice inside odda towns yoa God Yahweh give you guys.

⁶Ony make um inside da place yoa God Yahweh goin pick so peopo can go dea find out wat kine God him. Ova dea you guys gotta make da sacrifice fo da Passova, evening time wen da sun go down, da day ery year fo rememba da time you guys wen come outa Egypt.

⁷Cook um an eat um by da place yoa God Yahweh goin pick. Den in da morning go back by yoa tent.

⁸Fo six days eat da bread dat no mo yeast. Den, day numba seven, come togedda fo yoa God Yahweh an no do no work dat day.

⁹“Seven week afta you guys start fo cut da barley,

¹⁰den make da Spesho Religious Time fo Cut Food fo yoa God Yahweh. Give him one present you like give from all da good an plenny stuff he stay give you. If get plenny, give um plenny, if ony litto bit, give um litto bit.

¹¹Dance an sing in front yoa God Yahweh at da place he goin pick so peopo can go dea find out wat kine God him. You, yoa boys an girls, yoa worka guys an wahines, da Levi ohana peopo inside yoa towns, an da peopo from odda place, da kids dat no mo fadda o mudda, da wahines dat no mo husban dat live wit you guys, all dose peopo goin do um.

¹²No foget, you guys was slaves inside Egypt, so take care fo do all dese tings you guys gotta do.

¹³“Make da Spesho Religious Time Fo Live In Shacks seven days afta you guys bring togedda all da wheat from da place wea you split da wheat, an da wine from da place wea you step da grapes fo smash um.

¹⁴Dance an sing fo da spesho religious time -- you, yoa boys an girls, yoa slave guys an wahines, da Levi ohana peopo, da peopo from odda place, da kids dat no mo fadda o mudda, da wahines dat no mo husban, erybody dat stay inside yoa town.

¹⁵Make da spesho religious time fo seven days, by da place yoa God Yahweh goin pick. Cuz he goin do plenny good kine stuff fo you guys, for da stuff you guys grow, an da stuff you make wit yoa hands. Fo shua, you guys goin stay real good inside cuz a dat.

¹⁶Three times ery year, all da guys gotta show up in front yoa God Yahweh by da place he goin pick fo da Spesho Religious Time Fo Da Bread Dat No Mo Yeast, fo da Spesho Religious Time Fo Cut Food, an fo da Spesho Religious Time Fo Live In Shacks. Nobody goin come in front Yahweh wit notting fo give him.

¹⁷Erybody gotta bring one present dat show how plenny yoa God Yahweh wen do good kine stuff fo you guys.

¹⁸“Pick judge guys an leada guys fo all da ohanas inside ery town dat yoa God Yahweh stay give you guys. Dey goin judge da peopo, an do um da right way.

¹⁹No judge da wrong way, an no make mo spesho fo some peopo. No take money from peopo so you do tings fo dem. Cuz dat make da peopo dat know wat fo do erytime jalike dey no can see, an make da peopo dat do wass right erytime jalike dey donno notting.

²⁰Do da right kine stuff, an ony dat! Cuz den you guys goin take ova da land dat yoa God Yahweh stay give you guys, an live dea.

²¹No put up any kine wood pos fo da wahine kine idol god Asherah, by da side a da altar you guys make fo yoa God Yahweh,

²²an no put up big kine kapu stones fo da odda gods, cuz yoa God Yahweh hate dem.