Read Hawaii Pidgin Deuteronomy 18 Bible Online

Deuteronomy 18 - Hawaii Pidgin bible

Deuteronomy 18

¹“Da pries guys, from da Levi ohana guys, all da Levi ohana peopos, no goin get land an odda property from Yahweh, da way da odda Israel peopo get um. Da Levi ohana peopo goin eat da meat from da sacrifices da Israel peopo make wit fire fo Yahweh. Dass da kine property dey goin get.

²Cuz dey no goin get land from Yahweh jalike dea brudda guys. Wat dey goin get, is da right fo be da pries guys fo Yahweh, jalike he wen make promise to dem.

³“Dis wat da pries guys get da right fo get from da peopo: Weneva da peopo make sacrifice wit cows o sheeps o goats, dey give da pries guys da shoulder meat, da jaw meat, an da parts inside da opu.

⁴You guys goin give dem da firs wheat an barley dat you cut, da new wine, an da firs olive oil dat you press, an da firs wool from yoa sheeps wen you cut um.

⁵Az cuz yoa God Yahweh wen pick da Levi ohana, all da guys dat goin come from Levi, outa all da odda Israel ohanas, fo stand in front Yahweh an do religious kine stuff fo him foeva, cuz he wen pick dem .

⁶If one Levi guy from any town inside Israel wea he stay live, an he come da place yoa God Yahweh goin pick cuz he really like work dea fo Yahweh,

⁷he can work dea fo his God Yahweh cuz he God's guy, jalike all da odda Levi ohana guys dat work ova dea in front Yahweh erytime.

⁸He goin get da same ting wit dem fo eat from wat da peopo bring fo da Levi ohana guys, no matta he awready get someting from wen he sell his ohana stuffs.

⁹“Wen you guys go inside da land dat yoa God Yahweh stay give you guys, no do da kine pilau stuff dat da peopos dat live ova dea do, cuz Yahweh hate dat.

¹⁰No good if even one a you guys throw yoa boy o girl inside da fire fo make sacrifice. No go find out from da spirits wat goin happen. No tell fortune. No tink da tings you see is da kine sign fo you tell peopo wat goin happen. No put kahuna.

¹¹No use special kine words fo make peopo so dey no can do notting. No try talk to da spirits, da obake, o da mahke guys.

¹²Anybody go make lidat, az pilau, da way Yahweh see um. Da odda peopos make lidat, az why yoa God Yahweh goin push dem outa dea land in front you guys.

¹³Still yet, you guys gotta be perfeck, no mo blame fo anyting, da way you gotta be wit yoa God Yahweh.

¹⁴“Da peopo you guys goin push out, dey lissen to da peopo dat tell fortune an try find out from da spirits wat goin happen. But yoa God Yahweh neva let you guys make lidat.

¹⁵But yoa God Yahweh goin bring one guy from yoa own peopo, dat talk fo him to you guys, jalike me. Him, da one you guys betta lissen to.

¹⁶Cuz az wat you guys wen aks yoa God Yahweh fo do, dat time Mount Sinai side wen you guys stay all togedda. You guys tell, ‘No let us hear da voice from oua God Yahweh, o see dis big fire no moa! Bumbye we goin mahke!’

¹⁷“Wen dey say dat, Yahweh tell me, ‘Wat dey say stay good.

¹⁸I goin bring one guy from yoa own peopo, dat talk fo me to da Israel peopo, jalike you, Moses. I goin tell dat guy wat fo say, an he goin tell dem eryting I tell him.

¹⁹Anybody no like lissen wat my talka guy tell cuz he my guy, I goin poin finga dat guy.

²⁰But anybody dat tell he stay talk fo me, but tell dem stuff dat I neva tell him fo say, o any guy dat talk fo odda gods, you guys gotta kill dem.’

²¹“ Maybe you guys goin tink, ‘How us guys can know if one guy tell he talk fo Yahweh, but az not was Yahweh tell um fo say dat?’

²²If one talka guy tell dat he talk fo Yahweh, but wat he tell no happen, den az neva come from Yahweh. Dat talka guy ack big head, but he neva take care fo lissen wat Yahweh tell fo real kine. No come scared a him.