Read Hawaii Pidgin Deuteronomy 2 Bible Online

Deuteronomy 2 - Hawaii Pidgin bible

Deuteronomy 2

¹“Den we turn aroun an go back inside da boonies on top da road fo go by da Red Sea, jalike Yahweh wen tell me. Long time we stay go dis side an dat side aroun da Se`ir [Mountains / Range].

²Den Yahweh tell me,

³“You guys stay go aroun dis mountain range long time awready. Now, you go turn aroun an go north side.

⁴Tell da peopo wat dey gotta do: ‘You guys, almos you goin go pass da land wea yoa brudda guys stay, da peopo dat get Esau fo dea ancesta. Dey live inside da Se`ir [Mountain / Range]. Dey goin come scared a you guys. So take care plenny so notting happen.

⁵No make like you tink you goin make war wit dem. Cuz I no goin give you guys dea land, notting. You guys no goin even get nuff land dea fo put yoa feets on top um. Cuz I awready wen give da Esau ohana da Se`ir [Mountains / Range].

⁶Us guys goin buy da food us guys eat and da watta us guys drink, an pay dem wit silva.’-”

⁷An Moses tell, “Cuz oua God Yahweh wen do plenny good stuff fo us guys, an make eryting us guys make, come out good. He wen take care us guys inside da big boonies. He wen stay wit us guys fo all dis forty years, an neva need notting eva.”

⁸“So us guys go pass our bruddas, da Esau ohana peopo, dat live inside da Se`ir [Mountains / Range]. We turn from da Arabah road dat come up da Arabah Valley from Elat an Ezion Geber, an go by da Moab road inside da boonies.

⁹“Den Yahweh tell me, ‘No bodda da Moab peopo an make hard time an make dem like make war wit you guys. Cuz I no goin give you guys notting from dea land. I awready give dea main town Ar to da Moab peopo dat get Lot fo dea ancesta.’

¹⁰“(Da Em peopo live ova dea befo time too. Dey strong an dey plenny peopo, an dey tall jalike da Anak giants.

¹¹Some peopo call dem da Refa peopo, jalike da Anak peopo, but da Moab peopo call dem da Em peopo.

¹²Da Hor peopo live inside da Se`ir [Mountains / Range] befo time too, but da Esau ohana peopo get dem outa dea. Dey wipe out da Hor peopo an take ova dea land, jalike us Israel peopo make da Canaan peopos get outa inside da land Yahweh give us fo come oua property.)

¹³Moses tell da peopo: “Den Yahweh tell me, ‘Now, go da odda side da Zered Stream.’ So we go da odda side, to da Moab land.

¹⁴Az was thirty-eight years afta we go way from Kadesh Barnea da firs time, dat we go da odda side da Zered Stream. Dat time, all da fighta guys dat wen stay alive befo, awready mahke, jalike Yahweh wen make strong promise fo do to dem.

¹⁵Yahweh wen stay agains dose guys, till he wipe dem out from da peopo all da way.

¹⁶“Afta all dose guys dat can fight mahke,

¹⁷Yahweh tell me,

¹⁸‘Today you guys goin pass Moab, an leave dea land nea Ar town.

¹⁹You guys go pass da land wea da Ammon peopo stay. No bodda dem an no make dem like fight you guys. Cuz I no goin give you guys da Ammon peopo's land, notting. I awready give dat land to dem, cuz dey da Lot ohana peopo.’

²⁰(Some peopo tink dat land was fo da Refa peopo too, cuz dey wen live dea befo time, but da Ammon peopo call dem da Zamzum peopo.

²¹Dey was strong peopo, an get plenny a dem. Dey tall jalike da Anak giants. Yahweh wen let da Ammon peopo wipe out da Refa peopo, an take ova dea land. Den da Ammon peopo live inside dat land, an not da Refa peopo.

²²Yahweh do da same ting fo da Esau ohana peopo, dat stay live inside da Se`ir Mountains, cuz he wen wipe out da Hor peopo dat stay dea befo da Esau peopo. Da Esau ohana take ova dea land an stay live dea till now.

²³An da Av peopo dat live inside da small towns all da way by Gaza, da Filisha peopo dat come dea from Crete Island wen wipe dem out, an stay live dat land now.)

²⁴“Yahweh tell, ‘Go da odda side da Arnon Stream now. Look, I give you guys da powa fo fight Sihon awready, da king fo Heshbon town wea da Amor peopo stay, an take ova his land. Start now fo take ova da land an fight King Sihon dem.

²⁵From today, I goin make all da diffren peopos unda da sky come real scared a you guys. Dey goin hear bout you guys an come scared an shake, an worry plenny cuz a you guys.’

²⁶Moses tell: “From da boonies Kedemot side, I wen send some messenja guys fo tell dem fo go by Sihon, da king inside Heshbon, dat us guys like make good wit him. I tell,

²⁷‘Please, let us guys go pass thru yoa land. We goin stay on top da main road. We no goin go da right side o da left side.

²⁸Us guys like buy food an watta fo eat an drink, an us guys goin pay wit silva. Ony let us walk thru dea.

²⁹Da Esau ohana peopo dat live inside da Se`ir [Mountain / Range], an da Moab peopo dat live Ar town, dey wen let us guys pass thru dea land and buy food. So us guys like fo you do dat too, till we go da odda side da Jordan Riva an go inside da land oua God Yahweh start fo give us.’

³⁰But Sihon, da king fo Heshbon town, no like let us go thru dea. Az cuz oua God Yahweh wen make him hard head, fo give you guys da powa fo take him. An now, God wen let you guys win.

³¹“Den Yahweh tell me, ‘Look, I start awready fo give you Sihon an his land. Now you guys can start fo make his land yoa property.’

³²“Den Sihon an all his army guys wen come outside da town fo fight us guys [by] Jahaz side,

³³But oua God Yahweh give him to us an we bus um up, him an his boys, an all his army guys.

³⁴Dat time, we take ova all his towns an wipe um all out jalike we stay make one big sacrifice fo God: guys, wahines, an kids. We no let nobody stay alive.

³⁵But all dea stuffs an da animals from da towns, we wen take um away fo ourself.

³⁶From Aroer town wea can look down inside da Arnon Canyon, an da odda town inside da canyon, all da way nort side to Gilead, no even get one town dat get big wall dat stay too big fo us guys. Oua God Yahweh give us all dem.

³⁷But jalike oua God Yahweh tell us guys fo do, we neva bodda da Ammon peopo, o da land by da Jabbok Riva, o da towns inside da hills.