Read Hawaii Pidgin Deuteronomy 20 Bible Online

Deuteronomy 20 - Hawaii Pidgin bible

Deuteronomy 20

¹“Wen you guys go fight one war wit da peopo dat stay agains you, an you guys see dey get horses an war wagons, an one army wit mo plenny guys den you, no scared dem. Cuz yoa God Yahweh, he goin stay wit you guys. He da One wen bring you guys hea from Egypt.

²Wen you guys almos ready fo fight dem, da pries guy goin come in front yoa army guys fo talk.

³He goin tell, ‘Lissen you Israel guys! Today you guys stay ready fo go fight da peopo dat stay agains you. No lose fight. No scared dem. No come scared an shaking cuz a dem.

⁴Cuz yoa God Yahweh, he da One stay go wit you guys an fight fo you guys. He goin fight da peopo dat stay agains you guys. Az how you guys goin win ova dem.’

⁵“Den da main army officers goin tell da army guys, ‘Anybody hea jus wen build one house, an no make party fo start live inside still yet? Dey can go home, cuz if dey mahke bumbye wen dey stay fighting, den some odda guy goin start fo live inside dat house.

⁶Get anybody hea dat jus wen plant one grape farm, an no cut da grapes yet? Dey can go home, cuz if dey mahke wen dey stay fighting, den some odda guy goin cut da grapes.

⁷Get anybody hea dat wen make promise to one wahine dat he goin marry her, but neva marry her still yet? He can go home, cuz if he mahke wen he stay fighting, den some odda guy goin marry her.’

⁸Den da army leadas goin tell da army guys dis too, ‘Anybody hea dat stay lose fight an donno how fo make up his mind, he can go home, cuz bumbye his brudda guys goin lose fight jalike him.’

⁹Wen da main army officers pau tell da guys all dis, dey goin put main army leadas fo da war in charge a da army guys.

¹⁰“Wen you go up fo go fight in one big town, tell da peopo dea you no like fight, so make one deal wit dem fo no go fight.

¹¹Den if dey say az good wat you tell, an den open da gates fo da town, den you goin make all da peopo dea work fo you guys.

¹²But if dey say dey no like wat you tell dem, an like fight you guys, den put army guys all aroun da town so nobody can go inside o come outside.

¹³Wen yoa God Yahweh give dem to you guys, kill all da guys ova dea wit swords.

¹⁴You guys can take da wahines, da kids, da animals, an all da odda stuff inside da town fo yoaself an you can use um. Az how yoa God Yahweh tell you guys fo make to da guys dat stay agains you.

¹⁵Az how you guys can make to all da towns dat stay far from you guys, but not if az towns fo da peopos dat stay live nea you guys.

¹⁶“Inside da towns a da peopos dat stay live nea you guys, dat yoa God Yahweh stay give you guys fo come yoa property, no leave nobody alive, not even da animals.

¹⁷You guys gotta wipe um all out, jalike you make one big sacrifice fo Yahweh -- da Het peopo, da Amor peopo, da Canaan peopo, da Periz peopo, da Hiv peopo, an da Jebus peopo, jalike yoa God Yahweh wen tell you guys fo do.

¹⁸If you no wipe um out lidat, bumbye dey goin teach you guys fo do same kine real pilau kine stuff dey do wen dey go down in front dea gods. You goin do bad kine stuff agains yoa God Yahweh.

¹⁹“Wen you guys put yoa army guys all aroun one town fo long time so you can take um ova, no cut down dea trees wit ax, cuz you guys can eat da fruit from da trees. Eh! Da trees, dey not peopo, you know, dat you guys gotta fight dem.

²⁰Da ony kine trees you guys can cut down, dey da trees dat you know dey no give fruit. Cuz den you guys can use da wood fo make ladder an tower fo go up ova da top a dea wall, till you make um give up.