Read Hawaii Pidgin Deuteronomy 22 Bible Online

Deuteronomy 22 - Hawaii Pidgin bible

Deuteronomy 22

¹“If you see dat yoa brudda's cow, sheep, o goat come out from da fence, no ack like you no see um. You gotta bring um back by yoa brudda.

²If da owna no live nea you an you donno who own da animal, take um home wit you an keep um till da owna come fo try find um. Den give um back to da owna.

³Do da same ting if you find yoa brudda's donkey, o his clotheses, o wateva he lose. No ack like you no see um.

⁴“If you find yoa brudda's donkey o cow dat wen fall down on top da road, help yoa brudda make um stan up again. No ack like you no see um.

⁵One wahine no can wear one guy kine clotheses, an one guy no can wear one wahine kine clotheses. Fo yoa God Yahweh, all dat kine stuff pilau fo him.

⁶“If you find one bird nest by da side a da road, inside one tree o on top da groun, wit bebe birds o eggs inside, an da mudda stay sitting on top da bebes o da eggs, no take da mudda wit da bebes.

⁷You gotta let da mudda go, but you can take da bebes. Dass so eryting goin go good fo you, an you goin live long time.

⁸“If you build one new house, make one fence aroun da flat roof. No good somebody fall down from on top dea an you get da blame fo kill somebody.

⁹“No plant anodda kine seeds inside da rows a yoa grape field. Cuz if you do dat, den da food from da seeds you wen plant an da grapes from da field, all dat goin come spesho fo Yahweh. You no can eat um.

¹⁰“No plow wit one cow an one donkey togedda unda one yoke.

¹¹“No wear clotheses dat get wool an linen togedda inside da same cloth.

¹²“Tie togedda strings fo make four bunch fo make um jalike tassels, an put um on da four corners a da clotheses you wear.

¹³“Wen one guy marry one wife, an afta dey sleep togedda, maybe he start fo no like her.

¹⁴So he bulai bout her an give her bad name, an he tell, ‘I wen marry dis wahine, but wen I sleep wit her, I no find proof dat she neva sleep wit one nodda guy befo!’

¹⁵Den her fadda an mudda goin take da sheet wit blood fo show proof to da older leadas by da town gate dat she neva sleep wit one guy befo.

¹⁶Da girl's fadda goin tell da leada guys, ‘I wen give my girl to dis guy fo marry, but he no like her.

¹⁷Now he bulai bout her an tell, “I no find proof dat yoa daughta neva sleep wit one guy befo.” But I get proof dat she neva sleep wit one guy befo.’ Den her fadda an mudda goin show da cloth in front da older leada guys fo da town.

¹⁸Den da older leadas goin take da guy an punish him.

¹⁹Dey goin make him pay two an one half pounds silva to da girl's fadda, cuz dis guy wen give one Israel girl bad name. An she still goin stay his wife. He no can get da right fo leave her all da time she stay alive.

²⁰“But if wat da guy say, stay true, an dey no can show proof dat she neva sleep wit one guy befo,

²¹dey goin take her by da door a her fadda's house, an ova dea da guys from her town goin throw stones at her so she mahke. Az cuz she wen make stink wit da Israel peopo, wen she fool aroun wen she still stay inside her fadda's house. You guys gotta clean out all da bad kine stuff from you.

²²“If peopo find one guy sleeping wit anodda guy's wife, da guy dat sleep wit her an da wahine gotta mahke. You guys gotta clean out da bad kine stuff from da Israel peopo.

²³“If one guy meet one wahine inside one town, an her fadda an mudda wen promise awready fo give her fo marry one nodda guy, an she neva sleep wit no guy befo, but dat guy wen sleep wit her inside da town,

²⁴you guys gotta take da guy an da wahine by da gate fo da town an throw stones at dem fo kill dem. Da wahine get da blame cuz she stay inside one town, but she no yell fo help. Da guy get da blame too cuz he wen sleep wit one wahine dat her fadda an mudda already wen promise to anodda guy. You guys gotta clean out da bad kine stuff from you guys.

²⁵“But if one guy meet one wahine outside da town, dat her fadda an mudda wen promise fo her marry anodda guy, but da guy dat see her ova dea rape her, den ony da guy gotta mahke.

²⁶No do notting to da wahine, cuz she neva do notting wrong an no need kill her. (Dis jalike wen somebody go bus up an kill anodda guy.)

²⁷Cuz da guy wen find da wahine outside da town, dat her fadda an mudda wen promise fo her marry anodda guy. No matta she yell, no mo nobody dea fo help her.

²⁸“An if one guy find one wahine dat neva sleep with one guy, an her mudda an fadda neva promise her to anodda guy still yet, an he grab her an rape her, an somebody find dem togedda,

²⁹da guy dat rape her gotta pay da fadda one an one quarta pound silva. He gotta marry her an she goin stay his wife. Cuz he wen make her shame, he no mo da right fo leave her, all da time he stay alive.

³⁰“One guy no can marry his fadda's wife, cuz no good he make shame fo his fadda.