Read Hawaii Pidgin Deuteronomy 24 Bible Online

Deuteronomy 24 - Hawaii Pidgin bible

Deuteronomy 24

¹“Get some time wen one guy marry one wahine, an den afta dat he no like her, cuz he find out she wen do someting no good. Den he write one divorce paypa an give um to her, den send her away.

²Den, afta she go away from him an marry one nodda guy,

³an dat husban no like her too, he write her one divorce paypa, give um to her, an send her away from him. Ony afta dat, da secon husban mahke.

⁴Den her firs husban dat wen divorce her no can marry her again afta she already wen come pilau cuz she sleep wit anodda guy. Az why she no can come in front Yahweh. Cuz da way Yahweh see um, she stay pilau. No go bring da blame fo bad kine stuff on top da land yoa God Yahweh stay give you guys fo come yoa property.

⁵“If one guy jus wen marry, no can send him fo fight one war, o do govmen kine work. Fo one year he can stay home wit his wife dat he jus wen marry, an make her stay good inside.

⁶“No take da two roun stones from one mill fo make flour, o even da top one, from one guy dat own da stones an owe you someting an you no give um back till he pay. Cuz dat take away da ting he need fo make bread fo stay alive.

⁷“If you catch one guy dat wen steal anodda Israel guy fo make him one slave, o try sell him, da guy dat steal um, gotta mahke. You guys gotta clean out da real bad kine stuff from you guys.

⁸“Wen one guy skin get da kine bad sick dat odda guys can get um, take care you do eryting da prieses from da Levi ohana tell you guys fo do. Make shua you guys do eryting I wen tell dem.

⁹No foget wat yoa God Yahweh wen do to Miriam afta you guys wen come outa Egypt an you stay going on da road.

¹⁰“Wen you lend someting to one Israel guy, no go inside his house fo get wat he like give you fo make shua he goin pay you back.

¹¹Stay outside da house, an wait till da guy bring you someting fo show dat fo shua he goin pay you back, an bring um outside fo you.

¹²If da guy no mo notting, an he ony can give you his coat, no go sleep wen you get da coat wit you still yet.

¹³Give him back his coat befo da sun go down ery day, so he can sleep inside um. Den he goin tell you ‘God goin do good tings fo you,’ an yoa God Yahweh goin know dat you wen do someting good.

¹⁴“If one guy work fo you an he no mo notting, an need stuff, no make him wait fo you pay him. No matta he one Israel guy, o he not one Israel guy, but he live inside yoa town,

¹⁵ oay him wat you owe him fo wat he wen do ery day befo da sun go down, cuz he no mo notting an he need um fo live. If you no pay him, he goin call to Yahweh agains you, an you goin get da blame fo do someting bad.

¹⁶“No kill da faddas fo punish um fo someting dea kids wen do. An no kill da kids fo punish dem fo someting dea faddas wen do. Erybody gotta mahke fo dea own bad kine stuff.

¹⁷“Make shua you guys do da right ting fo da peopo from odda place, an fo da kids dat no mo fadda o mudda. No take away da coat from one wahine dat no mo husban an keep um till she pay you back wat she owe you.

¹⁸No foget dat you guys was slaves Egypt side, an yoa God Yahweh wen pay da price fo bring you guys hea from ova dea. Az why I tell you guys fo do dis kine stuff.

¹⁹“Wen you guys stay cut wheat o barley inside yoa field, an you foget take home one bunch wheat o barley, no go back get um. Leave um dea fo da guys from odda place, da kids dat no mo fadda o mudda, o da wahines dat no mo husban. Den yoa God Yahweh goin do good tings fo you guys in eryting you guys do.

²⁰Wen you guys shake da olive trees fo make da olives fall down, no go back do um da nex day. Leave da olives dat still stay on top da tree, fo da guys from odda place, da kids dat no mo fadda o mudda, an da wahines dat no mo husban.

²¹Wen you cut da grapes from yoa grape plant, no go back cut da ones you wen miss da firs time. Leave da grapes dat stay dea fo da guys from odda place, da kids dat no mo fadda o mudda, an da wahines dat no mo husban.

²²No foget, you guys was slaves Egypt side. Az why I tell you guys fo do dis kine stuff.