Read Hawaii Pidgin Deuteronomy 25 Bible Online

Deuteronomy 25 - Hawaii Pidgin bible

Deuteronomy 25

¹“Wen Israel peopo make argue wit each odda, dey gotta take um to da judge. Da judge goin tell wat guy do wass right an wat guy get da blame, cuz he wen do wrong.

²If dey gotta beat da guy dat get da blame, den da judge tell da guy fo lay down. Da judge helpa guys goin beat um wit one whip in front da judge, how many times da judge tell dem, fo show how bad da ting he wen do.

³But dey no can hit one Israel guy wit da whip mo den forty times. If dey beat him mo den dat, dey goin make him shame in front da peopo.

⁴“No go tie up one cow's mout so he no can eat da wheat o barley wen he stay working fo smash da wheat o barley so you can take out da junks.

⁵“If get brudda guys dat stay live togedda, an one a dem mahke, but he no mo boy, da widow no can marry some guy from outside da mahke guy ohana. Her brudda in law gotta marry her, fo get one boy, an he gotta do wat he suppose to do cuz he her brudda in law.

⁶Da firs boy she born goin carry da mahke brudda's name, so dat da brudda blood line goin still stay okay fo da Israel peopo.

⁷“But if da brudda guy no like marry his mahke brudda's wife, she goin go by da older leadas by da town gate an tell dem, ‘My husban's brudda no like marry me jalike he suppose to do, fo give me one boy fo carry his brudda's name inside Israel!’

⁸Den da older leaders fo da guy town goin tell um fo come, an dey goin talk wit him. If he still yet tell, ‘I no like marry her,’

⁹den da brudda's widow goin go by him in front da older leadas, take off one a his slippas, spit in his face, an tell, ‘Dis wat oua peopo do to one guy dat no do notting fo his brudda guy blood line!’

¹⁰An da Israel peopo goin call da guy an his kids, ‘Da ohana from da guy dat dey wen take away his slippa.’

¹¹“If two guys stay fighting, an da wife fo one a dem come fo pull her husban outa dea so da odda guy no can hit um, an she grab da odda guy by his privates,

¹²you guys gotta cut off her hand. No go pity her.

¹³“Wen you sell stuff, no go rip off somebody wit differen kine weight so you can make some stuff look mo heavy an some stuff mo light.

¹⁴An no rip off somebody wit differen kine basket so you can make some stuff look mo big an odda stuff look small.

¹⁵You guys gotta weigh an measure stuff da right way, jalike all da odda peopo. Dat way, you goin live long time inside da land yoa God Yahweh stay give you.

¹⁶Cuz yoa God Yahweh tell, az no good, wen somebody do like dat an no do da right kine ting.

¹⁷“No foget wat da Amalek peopo wen do to you guys wen you stay come outa Egypt.

¹⁸Wen you guys was tired an worn out, da Amalek guys wen attack you guys, an wipe out da peopo dat no can walk good, dat was behind da oddas. Da Amalek peopo, dey not scared a God.

¹⁹Wen yoa God Yahweh let you guys res from all da peopo aroun you guys dat stay agains you guys, inside da land dat he stay give you guys fo come yoa property, you guys goin wipe out da name a da Amalek peopo, so no mo nobody unda da sky goin rememba dem. No foget dat!