Read Hawaii Pidgin Deuteronomy 28 Bible Online

Deuteronomy 28 - Hawaii Pidgin bible

Deuteronomy 28

¹Moses tell: “If you guys lissen fo real kine to oua God Yahweh, an take care fo do eryting I stay telling you today fo do, den he goin make you guys come mo importan den all da odda peopos on top da earth.

²All dis good kine stuff goin come by you guys, an stay wit you guys, if you lissen yoa God Yahweh.

³“He goin make good kine stuff happen fo you guys inside da towns an all ova outside da country side.

⁴“Good kine stuff goin happen to yoa kids, da food you grow, da bebes from yoa animals -- da bebe cows an bebe sheeps.

⁵“Good kine stuff goin happen wen you cut yoa food fo make yoa bread.

⁶“Good kine stuff goin happen wen you come inside an go outside.

⁷“Yahweh goin make you guys win ova da guys dat stay agains you guys, wen dey come fo attack you. Dey goin come fo you guys from one side, but dey goin run away to seven places wen you chase um.

⁸“Yoa God Yahweh goin say da ting, fo make good tings happen to yoa storehouse, an fo eryting you guys do. He goin make good tings happen all ova da land he stay give you guys.

⁹“Yahweh goin do jalike he wen make strong promise fo do -- he goin make you guys come real good fo come da peopo dat stay spesho fo him, if you guys make shua you stick wit his rules an live da way he tell you fo make.

¹⁰Den all da diffren peopos on top da earth goin see dat Yahweh stay own you guys, an dey goin stay scared a you guys.

¹¹Yahweh goin make eryting come plenny fo you guys, yoa kids, da bebes from yoa animals, an da food you grow from yoa groun, inside da land he wen make strong promise to yoa ancestas he goin give you guys.

¹²Yahweh goin open up da sky wea he keep plenny good stuffs, fo send rain on top yoa land da right time, an make eryting you guys do, come out good. Plenny peopos goin borrow stuff from you, but you guys no goin need borrow from nobody.

¹³Yahweh goin make you guys come jalike da head, jalike da mos importan peopo fo eryting, not jalike da tail, da peopo dat not importan. If you guys lissen wat yoa God Yahweh tell you fo do, jalike I stay tell you guys today fo do, so you take care fo do um, den you guys erytime goin come on top, an no stay down da bottom.

¹⁴No turn away from all dis stuff I stay tell you guys today fo do, an no even go litto bit on da right side o da left side, an no follow odda gods an work fo dem.

¹⁵“But all da kahuna goin go on top you, if you guys no lissen wat yoa God Yahweh tell, if you no take care fo stick wit all da stuff an da rules I tell you guys today fo do. If you no do um, den all dis bad kine stuff goin come on top you guys an make you guys lose fight.

¹⁶“God goin put kahuna on top you guys inside da towns an outside da towns.

¹⁷“God goin put kahuna on top you guys wen you go get food an make yoa bread.

¹⁸“God goin put kahuna on top you guys wen you born kids, wen you cut da food you grow, an wen yoa cows an sheeps born bebes.

¹⁹“God goin put kahuna on top you guys wen you come inside an wen you go outside.

²⁰“Yahweh goin bring bad kine stuff on top you guys cuz you get kahuna on top you. Az why you goin come all mix up, an peopo goin tell you guys dat you wrong no matta wat you guys do. Az how you guys goin wipe out quick time, if you guys do bad kine stuff an go way from Yahweh.

²¹Yahweh goin make you guys come real sick till he wipe out you guys from da land wea you come an he stay give you da right fo take um ova.

²²He goin give you guys wit real bad kine sick. You guys goin get high fever an swelling. He goin make da land real hot, an no mo rain. He goin make da plants dry up wit da sick an wit mildew. Da sick goin stay till you guys mahke.

²³Da sky ova yoa head goin come dry jalike da bronze metal, da groun unda yoa feets goin come real hard jalike da iron.

²⁴Yahweh goin make da rain come down jalike dust an jalike powda. Goin come down from da sky till you guys all wipe out.

²⁵“Yahweh goin make da peopo dat stay agains you guys win ova you. You goin go fo attack dem from one place, but run away from dem to seven places. Peopo in all da diffren countries on top da earth goin bum out wen dey tink bout you guys.

²⁶Wen you guys mahke, yoa mahke bodies goin come food fo all da birds inside da sky an da animals on top da earth, an no mo nobody goin chase um so dey go way.

²⁷Yahweh goin give you guys boils jalike he wen do to da Egypt peopo. He goin give you bad kine lumps, bad kine sores, an da itch. An no mo nobody can make um come mo betta.

²⁸He goin make you guys come pupule. You no goin can see, an you goin come all mix up an no can tink.

²⁹Even noon time, you guys goin feel aroun fo go some place, jalike one guy dat no can see notting cuz fo him, eryting stay dark. Eryting goin go bad fo you guys. Fo shua, erytime peopo goin give you guys hard time, an steal yoa stuffs. No mo nobody goin help you guys.

³⁰“If you make promise fo marry one wahine, anodda guy goin take her an rape her. If you go build one house, you no goin live inside um. If you goin plant one grape farm, you no goin start fo eat um an feel good bout um.

³¹Da guys dat take ova yoa land goin kill yoa cows in front yoa eyes, but you no goin eat da meat. Dey goin make you give up yoa donkeys, but dey no goin bring um back. Dey goin give yoa sheeps an goats to da peopo dat stay agains you guys, an no mo nobody goin get um back fo you.

³²You goin see da guys dat stay agains you give yoa boys an yoa girls to anodda peopo fo come slaves, an you goin come tired ery day looking fo dem come back, but you no can do notting.

³³One peopo dat you donno, goin eat da food from yoa land dat you wen work hard fo grow. You guys no goin get notting fo keep, you ony goin get hard time erytime.

³⁴Da sights you guys see goin make you guys come pupule.

³⁵Yahweh goin make yoa knees an legs get boils dat come real sore, an no mo nobody can make um come good. Dey goin go from unda yoa feets to da top a yoa head.

³⁶“Yahweh goin make you an da king you wen put ova you, go by anodda nation dat you guys an yoa ancestas neva know befo. Ova dea, you guys goin go down in front odda gods dat peopo make from wood an stone.

³⁷All da peopos ova dea wea Yahweh make you guys go, no goin believe cuz a wat happen to you. Dey goin talk bout you guys fo make dea own peopo tink plenny, an dey goin make fun a you guys.

³⁸“You guys goin take plenny seeds fo plant inside yoa field, but you ony goin cut litto bit food, cuz da grasshoppas goin eat um up.

³⁹You guys goin plant grape farms an take care um, but you no goin bring in da grapes o drink da wine, cuz da worms goin eat um.

⁴⁰You guys goin get olive trees all ova yoa land, but you no goin use da olive oil, cuz da olives goin fall down from da trees.

⁴¹You guys goin get boys an girls, but you no goin keep dem fo stay wit you guys, cuz odda peopo goin make dem prisonas an take dem away.

⁴²Plenny crickets goin take ova all yoa trees an eat da food from yoa land.

⁴³“Da peopo from odda place dat live wit you guys goin come da bosses ova you guys mo an moa, an you guys no goin come importan mo an moa.

⁴⁴Dey goin let you guys borrow stuff from dem, but dey no need borrow stuff from you. Dey goin be jalike da head, an you guys goin be jalike da tail.

⁴⁵“All dis bad kine stuff goin come on top you guys cuz you get kahuna. Jalike da bad kine stuff goin chase you guys, an take ova you guys, till you guys wipe out. Az cuz you guys no like lissen yoa God Yahweh, an stick wit da rules an da stuff he tell you guys you gotta do.

⁴⁶Da bad kine stuff goin come, jalike az one sign from God dat show you guys an yoa kids wat can happen foeva.

⁴⁷All dat goin happen cuz you guys no stay real good inside wen you work fo yoa God Yahweh, an even wen eryting was plenny good fo you guys.

⁴⁸So den you guys goin work fo da peopo dat stay agains you guys, not fo Yahweh. He goin send dem agains you guys, an you goin get notting fo eat, an come thirsty, wit no mo clotheses on, an no mo notting. Jalike he goin put one iron yoke on top yoa neck, till he wipe out you guys.

⁴⁹“Yahweh goin bring one peopo agains you guys from one far place, from da mos far part a da earth. Dey goin come real quick, jalike one eagle dat fly down real fas fo grab one small animal. You no goin undastan dea language.

⁵⁰You guys goin come scared wen you see dem cuz dey look real scary. Dey no mo respeck fo da ol peopo, an dey not nice to da young guys.

⁵¹Dey goin eat all yoa bebe animals an da food dat you guys wen plant, till dey wipe out you guys. Dey no goin leave you guys wheat o barley, new wine, new olive oil, bebe cows, o bebe sheeps. Dey goin wipe you guys out till you no mo notting!

⁵²Dey goin put army guys all aroun da big towns inside yoa land, so nobody can go inside o come outside, till da tall strong walls aroun da towns fall down, da ones you guys wen trus fo help you. Dey goin put dea army guys aroun all da towns inside da land dat yoa God Yahweh stay give you guys.

⁵³Cuz a dat, you even goin eat yoa own kids -- da meat from da bodies a yoa boys an girls dat yoa God Yahweh wen give you guys. Cuz da peopo dat stay agains you guys goin put dea army guys all aroun you guys, an you guys goin suffa plenny.

⁵⁴Even da mos easy an nice guy wit you guys dat get plenny aloha, he goin come greedy an no share food wit his own brudda o his own wife dat he love, an his kids dat stay still yet.

⁵⁵He no goin give even one a dem da meat from his own mahke kids fo eat, da one he stay eating. Goin be az all he get, cuz da peopo dat hate you guys goin make you guys suffa plenny, wen dey put army guys aroun all yoa big towns.

⁵⁶Even da mos easy an nice wahine wit you guys dat get plenny aloha, dat she no even let da bottom a her feet touch da groun, she goin be too greedy fo give to her husband dat she love, o her own boy an girl.

⁵⁷Even da stuff dat come out wen she born one bebe, an eat her bebe dat she born, an she goin eat um so nobody know, wen da peopo dat stay agains you guys goin make you guys suffa plenny, wen dey put army guys all aroun yoa big towns.

⁵⁸“If you guys no take care fo stay do eryting wat inside dese rules stay write inside dis book, an no show respeck fo wat kine God, yoa awesome God Yahweh,

⁵⁹he goin send real bad kine sick fo punish you guys an yoa kids, wit real long hard time, an real bad kine sick dat stay long time.

⁶⁰He goin bring all da diffren kine sick dat he wen bring to da Egypt peopo on top you guys, da ones dat you guys stay scared um, an dey goin stick wit you guys.

⁶¹Yahweh goin bring all kine sick an hard time too, da kine stuff dat dis book wit da rules no even tell bout, till you guys come wipe out.

⁶²You guys was real plenny peopo, jalike da stars inside da sky, but you guys goin come ony litto bit peopo, cuz you neva lissen yoa God Yahweh.

⁶³Jalike Yahweh stay good inside befo time, wen he wen make eryting come good fo you guys, an make you guys come plenny peopo, bumbye he goin come good inside wen he goin wipe you guys out. He goin take you guys outa da land dat you goin go inside now fo take um ova.

⁶⁴“Den Yahweh goin make you guys go all ova wea diffren peopos stay, from one side a da earth to da odda side. Wen you go dea, you guys goin go down in front odda gods, da kine gods dey make from wood an stone. You guys an yoa ancestas neva know dat kine gods befo.

⁶⁵Ova dea wit dose peopos you guys no can res. You no goin find one place fo rest da bottom a yoa feets. Yahweh goin make you guys stay shaking inside plenny, yoa eyes goin come tired from waiting, an you goin lose fight inside yoa heart.

⁶⁶You guys erytime donno wat goin happen. You goin stay scared nite time an day time. You no goin know fo shua if you goin stay alive.

⁶⁷Morning time you guys goin say, ‘I like nite time fo come!’ Nite time you guys goin say, ‘I like morning time fo come!’ Cuz you guys stay real scared inside, an you goin see real bad kine stuff happen.

⁶⁸Yahweh goin send you guys back Egypt side inside boats wit sail, no matta I wen tell you guys dat you no goin go dat way again, eva. Ova dea you guys an wahines goin try selling yoaself to da peopo dat stay agains you guys, fo come dea slaves. But nobody goin like buy you guys.