Read Hawaii Pidgin Deuteronomy 30 Bible Online

Deuteronomy 30 - Hawaii Pidgin bible

Deuteronomy 30

¹“Wen all dis good kine stuff an bad kine stuff dat I put in front you guys, come on top you guys, afta yoa God Yahweh send you guys all ova da earth fo make you live wit diffren peopos, den maybe you guys goin tink real good ova dea bout wat God wen tell you.

²An wen you an yoa kids come back by yoa God Yahweh, an lissen him wit all yoa heart an wit eryting inside you, jalike I wen tell you guys today fo do,

³den wen you guys come back, yoa God Yahweh goin make tings come good again fo you guys, an get love an pity fo you guys. He goin bring you guys back togedda from all da diffren countries he wen send you guys go.

⁴Even if God make you guys go mo far place unda da sky, from dea yoa God Yahweh goin bring you guys back togedda from ova dea.

⁵He goin bring you guys back inside da land dat oua ancesta guys wen own befo time, an you goin take um ova. He goin make good tings happen to you guys, mo den oua ancesta guys, an make you guys come mo plenny peopo den dem.

⁶Yoa God Yahweh goin make you and da peopo dat going come from you bumbye, an like come his peopo, jalike he goin put one mark on top yoa hearts an yoa kids hearts fo show dat you his peopo. Den you guys goin get love an aloha fo him wit all yoa hearts, an wit eryting inside you guys, so you guys goin live fo real kine.

⁷Yoa God Yahweh goin put all dis bad kahuna kine stuff I wen tell you bout, on top da peopo dat hate you guys an stay give you guys hard time.

⁸But you guys, you goin lissen Yahweh again, an do eryting he tell you guys fo do, jalike wat I stay tell you guys today.

⁹Den Yahweh goin do mo plenny good kine stuff fo you guys, wateva you guys stay do, an give you guys plenny kids, an plenny bebe animals, an plenny food dat you guys grow from yoa land. He goin stay feel real good inside again wen he tink bout you guys, an make good tings happen to you guys, jalike he wen feel good inside bout yoa ancesta guys.

¹⁰He goin do dat wen you guys lissen him, an stick wit his rules an do da tings he tell you gotta do, dat I wen write inside da book wit da rules, afta you guys come back by yoa God Yahweh wit all yoa heart, an wit eryting inside you.

¹¹“Wat I stay telling you guys fo do now, az not too hard fo you guys, an not too far from you guys.

¹²Wat I telling you fo do, no stay up dea inside da sky, so you guys gotta aks, ‘Who goin go up dea fo get um, an tell us guys, so we can lissen?’

¹³No even stay da odda side da ocean, so you guys gotta aks, ‘Who goin go ova dea fo get um fo us, an tell us, so we can do um?’

¹⁴Nah! All dis stuff stay nea, right hea by you guys awready. Stay inside yoa mout, an inside yoa heart, so you guys can lissen an do um.

¹⁵“Look! Today I put in front you guys two ways you guys can do: you guys can live an good kine stuff happen, o bad kine stuff can happen an you guys mahke.

¹⁶Me, I tell you guys today wat fo do: get love an aloha fo yoa God Yahweh, live da way he tell you guys fo live. Make shua you stay do wat he tell you fo do -- eryting you gotta do, an eryting da rules he give you tell you wat fo do. Den you guys goin live an come mo plenny peopo, an yoa God Yahweh goin do good kine stuff fo you guys inside da land wea you guys going go fo make um come yoa property.

¹⁷“But if yoa heart turn away from Yahweh, so you guys no lissen, an if odda peopo like you guys go da wrong way so you guys go down in front odda gods an show respeck fo dem,

¹⁸I tell you guys today, dat you goin wipe out fo shua. You guys no goin stay long time inside da land da odda side da Jordan Riva, wea you goin go inside fo take ova an make um yoa property.

¹⁹“Today I call all da powers inside da sky an da earth fo tell me wat dey see you guys doing. Cuz I put in front you guys two ways you guys can do: you guys can live o you guys can mahke. You guys can get good kine stuff, o you guys can get real bad kine stuff. Now take life! So den you an yoa kids goin live.

²⁰Den you guys goin get love an aloha fo yoa God Yahweh, an lissen to him, an stay tight wit him. Cuz Yahweh, he da One make you live fo real kine, an let you guys stay plenny years on top da land he wen make strong promise fo give to yoa ancesta guys, Abraham, Isaac, an Jacob.’-”