Read Hawaii Pidgin Deuteronomy 33 Bible Online

Deuteronomy 33 - Hawaii Pidgin bible

Deuteronomy 33

¹Dis da good tings dat Moses, da guy dat know God, wen tell wat he like God do fo da Israel peopo, befo Moses mahke.

²Moses tell, “Yahweh wen come from Mount Sinai. He come fo dem Jalike wen da sun come up from Mount Se`ir. He shine from Mount Paran. He come wit plenny angel messenja guys Dat stay spesho fo him, From da south, from da sides a da mountain.

³Yahweh, fo shua you get love an aloha fo da Israel peopo. All da ones dat stay spesho fo you, Jalike dey stay inside yoa hand. Dey go down in front yoa feets, An dey learn stuff from you.

⁴Us Jacob peopo learn da rules Dat me, Moses, wen give all us guys, Da spesho ting we get wen we come togedda.

⁵God, da king fo da Israel peopo dat stay do wass right, Wen da leadas fo da peopo all come togedda Wit da ohanas from Israel.

⁶ Den Moses tell dis bout da Reuben ohana: “Let Reuben an his ohana peopo stay alive an no mahke, But no let dem come plenny peopo.”

⁷Dis wat Moses tell bout da Judah ohana: “Yahweh, lissen [to] da peopo from dat ohana. Bring dem togedda wit da odda Israel peopo. Let dem fight fo take care demself Wit dea own powa. Be da One dat help dem Wen dey fight da peopo dat stay agains dem!”

⁸Dis wat Moses tell bout da Levi ohana: “Yahweh, yoa Tummim an Urim stones, Az ony fo da main pries guy you stay tight wit Fo find out wat you like. You wen give da Levi peopo one test Massah side, An wen judge dem by da Meribah watta.

⁹Dat time, da Levi guys neva make diffren kine Even to dea own fadda an mudda guys. Dey neva even let go dea own bruddas, O even dea own kids. Cuz dey take care fo do wat you tell, Yahweh, An dey watch ova da deal you wen make wit da peopo.

¹⁰Da Levi guys teach yoa rules to da odda Jacob peopo, (Az da Israel peopo), An dey teach how you make diffren kine To da good peopo an da bad peopo. Da Levi guys burn incense in front you, An make burn up kine sacrifices on top yoa altar.

¹¹Yahweh, make eryting da Levi ohana do come out good. Stay good inside bout da work dey do wit dea hands. Cut down da peopo dat go agains dem. So da ones dat hate dem no can make lidat again.”

¹²Dis wat Moses tell bout da Benjamin ohana: “Da guys Yahweh get love an aloha fo, I like dey get res an no mo trouble Cuz dey stay tight wit him. Da God Dass Mo Importan Den All Da Odda Gods Take care dem all da time, Da ones Yahweh get love an aloha fo, Jalike Yahweh stay carry dem on top his back.”

¹³Dis wat Moses tell bout da Joseph ohana: “I like Yahweh do plenny good kine stuff fo dea land, An give dem da bestes kine dew Dat come from da sky, An da watta from deep undaneat da groun.

¹⁴I like da land get da bestes stuff da sun make grow, An da bestes stuff dat come up ery month,

¹⁵Da bestes kine stuff from da ol mountains An da hills dat stay foeva,

¹⁶Da bestes stuff from da earth An eryting inside um, An da tings dat da One inside da bush dat wen burn Give cuz he like you guys. I like da Joseph ohana get all dis good kine stuff, Cuz Joseph jalike one ali`i an da bestes den his bruddas.

¹⁷Da Joseph ohana dey big an strong, Jalike one king, Jalike one bull cow dat wen born firs. Da Joseph ohana get plenny powa, Jalike one wild cow dat get big horn, An wit da horn dey poke all da differen peopos same time, Even da one dat stay mos far place on top da earth. Az how da ten tousand Ephraim ohana peopo dat come from Joseph stay, An da tousands inside da Manasseh ohana dat come from Joseph.”

¹⁸Dis wat Moses tell bout da Zebulun an Issakar ohana. “You Zebulun ohana, Stay good inside wen you go out some place. An you Issakar ohana, Stay good inside wen you stay home inside yoa tent.

¹⁹Dey goin call peopo from da odda ohanas Fo come by dea mountain Fo make da good an right kine sacrifices ova dea. Dey goin eat plenny stuff from da sea, An da rich kine stuff dat stay hide inside da sand.”

²⁰Dis wat Moses tell bout da Gad ohana: “I like peopo tell dat Yahweh do good kine stuff fo dem Cuz he make da Gad ohana land mo big. Dey live dea jalike one lion Dat can take off yoa arm O even da skin from yoa head.

²¹Da time da leada guys fo all da peopo come togedda, Dey keep da bestes land fo you Gad guys, Cuz you da real leadas. You Gad peopo make diffren kine To da good peopo an da bad peopo, Da way Yahweh like do, da Judge fo da Israel peopo.”

²²Dis wat Moses tell bout da Dan ohana. “Da Dan peopo jalike one young lion Dat live Bashan side. From dea, he attack Da peopo dat stay agains him.”

²³Dis wat Moses tell bout da Naftali ohana. “Yahweh stay real good inside Bout how da Naftali peopo ack. He do plenny good kine stuff fo dem. He tell um fo take ova da land From da wes side Galilee Lake an south from dea.”

²⁴Dis wat Moses tell bout da Asher ohana. “I like Yahweh do plenny good kine stuff fo da Asher ohana, Mo den fo da odda ohanas. I like Yahweh stay mo good inside bout dem Den bout da odda ohanas. I like dea olive trees give plenny oil, So plenny, dey even can wash dea feets wit olive oil.

²⁵You Asher guys, I like you get iron an bronze bars fo yoa gates, So nobody can hurt you all da time you stay alive.

²⁶“No mo odda god like da God fo Jeshurun, Az da Israel peopo dat stay do wass right, He ride from one side da sky to da odda side Fo help you guys. He ride jalike da clouds one war wagon, Cuz he awesome.

²⁷Da God dat stay from befo time, He take care you guys. Undaneat you guys, get his arms dat stay foeva. He goin [push / throw] out da peopo dat stay agains you guys. He goin tell, ‘Go wipe dem out!’

²⁸Dass how da Israel peopo goin live, An nobody goin hurt dem. Da place wea dey live, Nobody goin bodda dem o wipe um out. Da land get plenny wheat an barley an new wine An da sky give plenny dew dea.

²⁹You Israel peopo can stay good inside! No mo nobody jalike you guys. Yahweh wen get you guys outa trouble. Jalike he yoa shield, He help you guys. Jalike he yoa awesome sword, He fight fo you guys. Da peopo dat stay agains you guys Goin come scared an shaking in front you guys. You guys goin walk all ova dea backs.”