Read Hawaii Pidgin Deuteronomy 6 Bible Online

Deuteronomy 6 - Hawaii Pidgin bible

Deuteronomy 6

¹Moses tell dis too: “Dis wat oua God Yahweh wen tell me fo teach you guys -- all da stuff you gotta do, an da rules bout wass right an wass wrong. Dass wat you guys gotta do inside da land wea you goin go fo take um ova, da odda side da Jordan Riva.

²Az cuz oua God Yahweh like fo you, an yoa kids, an dea kids afta dem, stay scared a him an get respeck fo him all da time you guys stay alive. He like you guys do wat he tell you guys you gotta do, an show respeck fo his rules bout wass right an wass wrong, jalike I stay tell you guys. So den, you guys can live long time.

³Lissen, you Israel peopo, an take care fo do wat Yahweh tell! An az how eryting goin go good fo you guys. You guys goin come plenny peopo inside da land dat ery place get plenny milk an honey, jalike Yahweh, da God fo oua ancesta guys, wen make promise to you guys.

⁴“Lissen, you Israel peopo! Yahweh, he oua God! Ony him, da God fo us!

⁵Get love an aloha fo yoa God Yahweh wit eryting how you tink, an wit eryting dat stay inside you, an wit all yoa powa.

⁶Dese tings I stay tell you guys fo do today, you gotta tink plenny bout um.

⁷Make dese da main ting you teach yoa kids. Talk bout um erytime, wen you guys stay inside yoa house, wen you walk on top da road, wen you lay down, an wen you get up.

⁸Write um down an tie um jalike one sign on top yoa hands an on top yoa forehead, so you no foget um.

⁹Write um on top yoa door pos an on top da gates fo yoa town.

¹⁰“Oua God Yahweh, he goin take you guys inside da land dat he wen make strong promise fo give yoa ancesta guys, Abraham, Isaac, an Jacob. Az one land dat get big, rich towns dat you guys neva build.

¹¹Get plenny house dea wit all kine good tings you guys neva put dea, an big holes fo hold watta dat stay dea awready, an grape fields an plenny olive trees you guys neva plant. Wen you guys eat dat, an feel good inside,

¹²den take care you guys no foget Yahweh. He da One wen bring you guys outa Egypt, da place wea you guys was slaves.

¹³“Stay scared a oua God Yahweh an get respeck fo him. Work ony fo him. Wen you make strong promise fo anybody, tell ony him fo punish you if you no do um.

¹⁴No stay tight wit odda gods, da gods fo da peopos dat live aroun you guys.

¹⁵Cuz oua God Yahweh, he stay right hea wit you guys, an he one jealous God. No good he come real huhu wit you guys, cuz he goin wipe out you guys from da land if you guys pray to da odda gods.

¹⁶No give presha oua God Yahweh fo make him prove dat he Godnice, da way you guys wen make Massah side.

¹⁷Make shua you guys do wateva oua God Yahweh tell you fo do, an stick wit da tings he say you gotta do, an da rules he tell you guys.

¹⁸Do wass right an good, da way Yahweh see um, so dat eryting goin go good fo you guys. Den you guys can go inside da good land dat Yahweh wen make strong promise to oua ancesta guys fo give you, an take ova um.

¹⁹Yahweh wen tell you guys he goin throw out from da land, all da peopos dat stay agains you guys.

²⁰“Bumbye, wen yoa kids aks you, ‘Wat all dese rules mean dat oua God Yahweh wen tell us we gotta do?’

²¹you goin tell dem, ‘Us guys was slaves fo da Pharaoh guy Egypt side, but Yahweh wen bring us outa dea wit his strong powa.

²²We wen see Yahweh do all awesome kine signs, good kine an bad kine, to da Egypt peopo an da Pharaoh guy an his ohana.

²³But he wen bring us guys outa Egypt, an bring us dis place, an give us da land dat he make strong promise to oua ancesta guys dat he goin give.

²⁴Oua God Yahweh tell us all dis stuff we gotta do, an tell us fo stay scared a him an get respeck fo him, so eryting goin go good fo us, an he make us stay alive, jalike we stay today.

²⁵If we take care fo lissen an get respeck fo oua God Yahweh, an do all da stuff he tell us fo do in front him, den we goin get um right wit him, jalike he wen tell us guys.’