Read Hawaii Pidgin Deuteronomy 7 Bible Online

Deuteronomy 7 - Hawaii Pidgin bible

Deuteronomy 7

¹“Wen yoa God Yahweh take you guys inside da land fo take um ova, he goin throw out plenny peopos from in front you guys -- da Het peopo, da Girgash peopo, da Amor peopo, da Canaan peopo, da Periz peopo, da Hiv peopo, an da Jebus peopo. Dass seven diffren kine peopos dat get mo plenny peopo an stay mo strong den you guys.

²Wen oua God Yahweh give you guys powa ova dem, an you win ova dem, den you guys gotta wipe um all out, jalike you make one big sacrifice fo Yahweh. No make deal wit dem, an no give dem chance.

³No go marry dem. No give yoa girls to dea boys fo marry, an no take dea girls fo marry yoa boys.

⁴Az cuz if you do dat, bumbye dose peopos goin make yoa kids no stay tight wit me, Yahweh, an yoa kids goin come tight wit odda gods an goin go work for um. An if you do dat, I goin come real huhu wit you guys, an I goin wipe out you guys quick time.

⁵“Az why dis wat you guys gotta do to dem: Broke down dea altars, smash da big kapu stones dey put up fo da Ba`al god, cut down da kapu poses dey put up fo da Asherah wahine god, an burn up dea idol kine gods inside da fire.

⁶You gotta do all dat cuz you guys da peopo dat stay spesho fo me, yoa God Yahweh. I wen pick you guys from all da odda peopos on top da earth, fo come my own peopo dat worth plenny.”

⁷“Yahweh wen like you guys. Az why he pick you guys. But he neva do um cuz you guys get mo plenny peopo den da odda peopos, cuz dat time, you guys ony litto bit peopo.

⁸But he pick you guys cuz he get love an aloha fo you guys, an fo make good da strong promise he wen make to yoa ancesta guys, dat he wen take you guys outa Egypt wit his strong powa. Dass how come he wen use his powa fo get you guys outa dea. He wen do wat he gotta do fo get you outa dea, afta you guys was slaves fo da Pharaoh guy, dea king.

⁹Az why you guys gotta know dat yoa God Yahweh, he da God dass fo real! He da God you can trus um fo do wat he say he goin do. He make good da deal he wen make, an he stay tight wit da peopo dat get love an aloha fo him an do wat he tell dem fo do, fo one tousand peopos fadda, one afta da odda. ]bracket closed, not opened? Typo?

¹⁰But fo da peopo dat hate him, he goin wipe dem out fo pay um back. He no goin be slow fo pay um back.

¹¹Az why you guys gotta take care fo do wat I wen tell you fo do -- eryting you gotta do, da rules bout wass right an wass wrong, jalike I tell you guys today.”

¹²“If you guys lissen to dese rules an take care fo do um, den oua God Yahweh goin take care fo do his part a da deal fo stay tight wit you guys, jalike he wen make strong promise to oua ancesta guys fo do um.

¹³He goin get love an aloha fo you guys, an do good tings fo you guys, an make you guys come plenny peopo. He goin do good tings fo yoa kids, same ting fo da food dat grow from yoa land -- yoa wheat an barley, yoa new wine, yoa olive oil -- da bebe cows, an da bebe sheeps an goats. Dass how goin stay inside da land dat he wen make strong promise to yoa ancesta guys fo give you.

¹⁴He goin do good tings fo you guys, mo den wat all da odda peopos goin get. All yoa guys an wahines goin get kids. All yoa animals goin get bebe.

¹⁵Yahweh no goin let you guys come sick. He no goin let you guys get any bad kine sick, da kine you guys know bout wen you live inside Egypt. But he goin give dat kine sick to all da peopo dat hate you guys.

¹⁶You guys gotta wipe out all da peopos dat oua God Yahweh give you guys da powa fo wipe um out. No show pity fo dem, an no do work fo dea gods, cuz all dat az jalike one trap fo catch you guys.

¹⁷“Maybe you guys goin start fo tink lidis, ‘How us can do dis?! Dey get mo plenny peopo den us guys! Us no can take ova dea land!’

¹⁸No scared a dem! You guys gotta rememba, an no foget, wat oua God Yahweh wen do to Pharoah an all da Egypt peopo.

¹⁹You guys wen see wit yoa own eyes, how oua God Yahweh wen make da Egypt peopo suffa. He show how strong him, an he make happen plenny awesome tings. He use his strong powa fo take you guys outa dea. An now, oua God Yahweh goin do da same ting to all da peopos dat stay make you guys come scared now.

²⁰An anodda ting -- Oua God Yahweh goin make dem come lose fight, till even da peopo dat stay dea still yet and stay hide from you guys, dey goin be wipe out.

²¹No come scared and shake cuz a dem! Cuz oua God Yahweh stay right hea wit you guys, an he az one God dat stay big an awesome.

²²Oua God Yahweh goin wipe out dose peopos litto by litto wen you guys go fo attack dem. No good you guys wipe um all out one time, cuz den da wild animals goin come real plenny aroun you guys an take ova da land.

²³But oua God Yahweh goin bring dem to you guys fo take um ova. He goin make um come all mix up dey donno wat dey doing, till dey all wipe out.

²⁴He goin let you guys take dea kings an wipe um out, so nobody in da world goin even rememba dea name. Nobody goin stand up fo fight you guys, cuz you goin wipe dem all out.

²⁵You guys goin burn up dea idol kine gods inside da fire. No go make like you like take da silva o gold on top da idols, no take dat fo yoaself. Cuz all dat kine stuff no good, an can catch you guys jalike az one trap. Fo yoa God Yahweh, all dat kine stuff pilau.

²⁶No take idol kine god inside yoa house, cuz az pilau da way Yahweh see um. If you take um, Yahweh goin wipe you out jalike you az one sacrifice fo him, jalike he goin wipe out da idol. You guys gotta hate dat kine pilau stuff fo real kine, an no take um, cuz Yahweh goin wipe um out jalike az one sacrifice fo him.