Read Hawaii Pidgin John 1 Bible Online

John 1 - Hawaii Pidgin bible

John 1

¹Da time everyting had start, had one Guy. “God's Talk,” dass who him. Dat Guy an God, dey stay togedda, an da Guy stay God fo real kine.

²Dass da Guy, da time everyting had start, him an God stay togedda.

³God wen make everyting, but da way he do um, he tell dis Guy fo do um. No mo notting dis Guy neva make.

⁴He da Guy, if you like come alive fo real kine, you come by him, cuz dat kine life come from him. Wen peopo come alive lidat, jalike dey stay inside one place dat get plenny light. Den dey can see an undastan.

⁵No matta stay dark, da dark no can pio da light. Everytime get light.

⁶Had one guy God wen send, name John.

⁷God wen send John fo tell all da peopo wat he know bout God's light, so dey can trus God cuz a him. Dass his kuleana.

⁸John, he not da light. He ony come fo tell da peopo dat da light stay fo real.

⁹Dat time wen John stay teaching, jalike da light dass fo real was coming inside da world. Dass da light dat show everybody wass true.

¹⁰Dat time, da light dass fo real wen stay inside da world. Wen God wen make da world, he da Guy wen do um. But da peopo inside da world, dey neva know who him.

¹¹He wen come his own country, but even his own peopo neva take him in.

¹²But everybody dat take him in an trus him, God give dem da right fo come his kids, cuz dey know who him.

¹³Da way dey born, not da regula way, wit one guy fo dea fadda dat like get kids. Dey wen come God's kids cuz God wen give um life inside.

¹⁴Dat “God's Talk” Guy, he wen come one guy jalike us guys. He wen stay wit us. We wen see how awesome he stay. He awesome, cuz he da one an ony Boy dat come from da Fadda. He like do plenny good stuff fo us, cuz dass how he stay. Everyting he say bout God, stay fo real.

¹⁵John, he wen tell peopo wat he know bout dat Guy. He talk real strong so all da peopo can hear. He tell, “Dis da Guy I wen talk bout wen I wen say, ‘Bumbye one Guy goin show up, an dat Guy mo importan den me, cuz he stay awready from befo I born.’-”

¹⁶John talk lidat cuz dat Guy like do so plenny good kine stuff, an he do um fo all us guys, ova an ova.

¹⁷Moses wen give our ancesta guys God's Rules. Den Jesus Christ, God's Spesho Guy, he wen do plenny good stuff fo us, an everyting he tell us bout God, stay fo real.

¹⁸No mo nobody dat wen see God fo real kine. But get dat Guy. No mo odda guy jalike him cuz he God too. An he stay mo tight wit his Fadda den all da oddas. He da One dat wen make clear how God stay.

¹⁹One time, da Jewish leada guys wen send pries guys an odda guys from da Levi ohana dat help da pries guys. Dey send um by John fo aks, “Eh, who you?” Dis wat he wen tell um:

²⁰He neva bulai. He tell um strait out, “Lissen! I not da Christ, da Spesho Guy God Goin Send.”

²¹Dey aks him, “Den who you? You Elijah?” He tell, “No, I not.” Dey say, “Den you da Spesho Guy dat goin come an talk fo God?” He tell, “No, I not.”

²²Dey tell him, “Kay den. Tell us who you. Wat you say bout yoaself? We gotta tell da guys dat wen send us someting, you know!”

²³He say, jalike Isaiah wen say, da guy who talk fo God long time ago, “I da guy dat talk real strong inside da boonies, ‘Eh, make da road ready fo da Good Boss. Make um strait fo him!’-”

²⁴Some a da guys da Jewish leadas wen send by John, dey Pharisees.

²⁵Dem guys aks him, “Kay den. If you not da Spesho Christ Guy Dat God Goin Send, an you not Elijah, an you not da Spesho Guy dat goin come an talk fo God, den how come you stay baptize da peopo?”

²⁶John tell um, “I stay baptize da peopo wit water. Anodda guy stay hea wit you guys, but you guys donno who him.

²⁷I wen start fo teach first befo him, but I not spesho nuff even fo help him hemo his slippa.”

²⁸All dis wen happen inside Betany town, da one dat stay da odda side da Jordan River. Dass wea John stay baptize da peopo.

²⁹Da nex day John spock Jesus coming by him, an he say, “Eh, you guys, try look da guy ova dea! You know wat? He jalike God's baby sheep fo da sacrifice. He can hemo da shame fo da bad kine stuff dat everybody inside da whole world stay do!

³⁰Dis da guy I wen talk bout wen I wen say, ‘Bumbye one guy goin show up afta me, but he stay mo importan den me, cuz he stay befo I born.’

³¹I neva know who him befo time. But I stay hea so da Israel peopo can know who him. Dass why I stay baptize peopo wit water.”

³³(32-33) John tell mo bout wat he know. He say dis: “God wen send me fo baptize peopo wit water. He tell me, ‘You goin see my Spesho Spirit come down an stay wit one guy. He da guy goin let my Good an Spesho Spirit take ova my peopo.’ Dat time I wen see one guy, an I neva know who him. But den I wen see God's Spesho Spirit come down from da sky jalike one dove, an stay wit da guy.

³⁴I wen see dat, an I tell you guys, dat guy, he God's Boy.”

³⁵Da nex day John stay standing dea again wit two guys he teaching.

³⁶Wen John spock Jesus walking by him, he say, “Look! Dis guy jalike God's baby sheep fo da sacrifice.”

³⁷Da two guys hear him say dat, an dey go wit Jesus.

³⁸Jesus turn aroun an see dem going wit him. He tell, “Eh, wat you guys looking fo?” Dey say, “Rabbi, wea you stay live?” (Now, ‘Rabbi,’ dat mean ‘Teacha.’)

³⁹Jesus say, “Come look.” So dey go wit him an see wea he stay, an dey stay dea wit him dat day. Was bout four clock in da aftanoon.

⁴⁰Andrew, Simon Peter's brudda, he one a da two guys dat wen hear John Da Baptiza guy, an go wit Jesus.

⁴¹Da first ting, Andrew find his brudda Simon an tell him, “We wen find da Messiah.” (Now, ‘Messiah,’ dat mean ‘da Christ Guy, da Spesho Guy God Wen Send,’ dea language.)

⁴²Den he bring Simon to Jesus. Jesus look at um an say, “You Simon, an yoa fadda's name John, yeah? but not da Baptiza guy. From now dey goin call you ‘Cefas.’-” (Dat mean ‘Peter,’ o ‘Da Rock,’ in dea language.)

⁴³Da nex day Jesus wen tink fo go Galilee side. He find Philip an tell him, “Eh, come wit me, an be my guy.”

⁴⁴Now, Philip come from Betsaida town, da same place Andrew an Peter live.

⁴⁵Philip find Natanael an tell him, “We wen find da Guy dat Moses wen write bout in da book wit God's Rules inside. An da guys dat wen talk fo God long time ago, dey wen write bout him too. He Jesus from Nazaret town, Joseph's boy.”

⁴⁶Natanael say, “Nah! No mo notting good come from Nazaret!” Philip say, “Come look!”

⁴⁷Jesus see Natanael coming by him, an he say, “Dis guy one fo real Israel guy. No mo notting fake inside him! He everytime tell da trut.”

⁴⁸Natanael say, “How come you know who me?” Jesus say, “I wen see you da time you was undaneat da fig tree, befo Philip tell you fo come.”

⁴⁹Den Natanael tell him, “Teacha, you God's Boy fo real kine! You da King fo da Israel peopo!

⁵⁰Jesus wen tell him, “You trus me jus cuz I tell you dat I wen see you undaneat da fig tree? Eh, you goin see mo betta stuff den dat!”

⁵¹Den he tell him, “Dass right! An I like tell all you guys dis: You guys goin see da sky open up, an God's angel messenja guys going up an going down by me, da Guy Dass Fo Real.”