Read Hawaii Pidgin John 18 Bible Online

John 18 - Hawaii Pidgin bible

John 18

¹Wen Jesus wen pau pray, he wen go ova da Kidron Stream wit da guys he teaching, an dey wen go inside one garden wit trees.

²Judas, da guy who wen set Jesus up fo mahke, wen know da place, cuz Jesus wen go ova dea plenny times befo wit his guys.

³Da main pries guys an da Pharisee guys wen let Judas take dea army guys an police guys wit him. So Judas dem go to da garden, an dey all wen go dea togedda, wit lanterns an torches an swords.

⁴Jesus wen know all da stuff dat going happen to him, so he wen go by dem an aks dem, “Who you guys looking fo?”

⁵Dey tell him, “Jesus, da guy from Nazaret.” He tell dem, “I da guy.” Judas, da guy who wen set him up fo mahke, was right dea wit dem.

⁶An you know wat? Wen Jesus wen tell dem, “I da guy,” dey wen back up an wen fall down on top da groun.

⁷He wen aks dem again, “Who you looking fo?” Dey tell, “Jesus, da guy from Nazaret.”

⁸Jesus tell um, “I wen tell you, I da guy. If I da guy you looking fo, den let dese odda guys go.”

⁹He wen say dat fo make wat he wen say befo come true, “Fadda, Da guys you wen give me, I neva lose dem, not even one guy.”

¹⁰Simon Peter, he get one sword. He pull um out an wack one guy dat work fo da Head Priest, an cut off his right ear. Da worka guy's name was Malkus.

¹¹Jesus tell Peter, “Put back yoa sword! My Fadda say I suppose to suffa all dis kine stuff, an dass wat I goin do! Jalike he give me one cup full wit da bitta kine stuff fo drink, an I goin drink da whole ting.”

¹²Den da captain, da army guys, an da police guys from da Jews wen take Jesus an tie him up.

¹³Dey wen bring Jesus by Annas first. He Kaiafas fadda-in-law. Kaiafas, he da Head Priest guy dat year.

¹⁴Kaiafas da guy wen tell da Jewish leada guys befo, “Mo betta fo you guys if one guy mahke fo all da peopo.”

¹⁵Simon Peter wen go wit Jesus. An anodda guy Jesus wen teach go too -- dass me. Now, da Head Priest guy know me. Dass how I wen go inside da Head Priest guy's yard togedda wit Jesus.

¹⁶But Peter, he stay outside by da gate. Den me, cuz I Jesus odda guy dat was dea, an da Head Priest guy know me, I wen go outside, talk to da girl dat watch da gate, an bring Peter inside.

¹⁷Den da girl dat watch da gate wen tell Peter, “You one a da guys dat bugga wen teach, yeah?” Peter say, “No way! I not!”

¹⁸Had odda worka guys an police guys standing dea by one charcoal fire dey wen make, cuz was cold, an dey like come mo warm. An Peter, he wen stand dea too wit da odda guys, fo come warm.

¹⁹Den da Head Priest guy aks Jesus bout da guys he wen teach, an wat he teaching dem.

²⁰Jesus tell him, “I wen talk wea everybody can hear me. Everytime I teach inside da Jewish churches an inside da temple yard. I neva say notting secret.

²¹How come you aksing me? Aks da peopo who wen hear me, wat I wen tell dem. Fo shua, dey know wat I wen say.”

²²Afta dat, one police guy who was standing dea wen slap Jesus an say, “Eh! You not suppose to talk lidat to da Head Priest!”

²³Jesus tell him, “If I wen talk bad, tell me wat I wen say was bad. But if was good, how come you wen go slap me?”

²⁴Den Annas wen send him, all tie up, to da Head Priest guy, Kaiafas.

²⁵Simon Peter, he still yet stay standing by da fire fo come warm. Da odda guys standing dea tell him, “Eh! You one a da guys he wen teach, yeah?” Peter say, “No way! I not!”

²⁶Had one nodda guy dea dat work fo da Head Priest an was ohana to da guy dat Peter wen cut off his ear. Da guy tell, “Eh! Dat was you inside da garden wit him, yeah?”

²⁷One mo time Peter wen say, “No way! Not me!” Right den an dea, da roosta wen make noise.

²⁸Den da guys dat work fo da Head Priest take Jesus away from Kaiafas place to da Rome army headquarters. Was early in da morning. But dey neva go inside da Rome guys place, cuz if dey do dat, bumbye dey no can eat da spesho food fo da Passova cuz jalike dey pilau.

²⁹Den Governa Pilate wen go outside wea da Jews stay. He aks dem, “Wat you guys get agains dis guy?”

³⁰Dey tell him, “If da bugga no was one crook, us guys no goin turn him ova to you.”

³¹Den Pilate tell dem, “Take him den an judge him jalike how yoa Rules say you gotta do.” Da pries guys tell Pilate, “Us guys no can do dat, cuz us guys no mo da right fo kill nobody da Rome way, on top one cross.”

³²Wen dey say dat, da ting Jesus wen say befo wen come true. He wen tell his guys awready dat he goin mahke da Rome way on top one cross.

³³Den Pilate go back inside da army headquarters, an he tell Jesus fo come inside, an tell him, “Eh, you! You da king fo da Jews, o wat?”

³⁴Jesus tell him, “Dass wat you figga yoaself? O odda peopo wen tell you dat bout me?”

³⁵Pilate tell, “Me? You tink I one Jew? Dass was yoa own peopo an da main pries guys wen bring you to me. Wat you wen do?”

³⁶Jesus tell, “I not da kine king from dis world. If I was dat kine king, den my guys goin fight so da Jews no can take me. I one king, but no mo nobody hea inside dis world wen make me one king.”

³⁷Pilate aks him, “So, you one king den?” Jesus tell him, “You wen say I one king. Az why I wen born, an az why I wen come hea inside da world -- so I can tell everyting dat I know bout da true stuff. Everybody dat stick wit da trut, dey lissen to me.”

³⁸Pilate aks him, “Wat da trut?” Wen Pilate wen say dat, he wen go back outside to da Jews, an he tell dem, “I no find notting wrong wit dis guy.

³⁹But you guys get dis ting wea I suppose to let one guy go at da Passova time. So, you guys like me let go da King fo da Jews, o wat?”

⁴⁰Dey all yell an say, “Not dis guy! We like Barabbas!” Now, Barabbas, he was one mean crook guy.