Read Hawaii Pidgin John 21 Bible Online

John 21 - Hawaii Pidgin bible

John 21

¹An den, afta dat, Jesus wen let his guys go see him again. Dis wen happen by Lake Tiberias. Dis wat wen happen.

²Some a Jesus guys wen get togedda. Had Simon Peter, an Thomas da guy dey call Da Twin, Natanael da guy from Cana town Galilee side, an Zebedee's two boys, plus two odda guys. Jesus was dea teacha.

³Simon Peter wen tell da guys, “Eh, I like go fish!” An dey tell um, “Yeah! We like go too.” So da guys wen go down to da beach, an dey wen go inside one boat. But dat nite, dey neva catch notting.

⁴Den wen real early in da morning an get ony litto bit light, had Jesus standing dea on da beach. But his guys, dey neva know was him.

⁵He tell um, “Eh! Wat you guys wen catch?” Dey tell um, “Whitewash! No mo notting!”

⁶Den he tell um, “Go throw da net ova da right side! You goin get plenny fish dea!” Dey go throw da net, an get so plenny fish, da guys no can pull up da net.

⁷Now me, I was dea. I da guy dat Jesus wen get plenny love an aloha fo. I wen tell Peter, “Eh! Dass da Boss!” Wen Simon Peter wen hear dat, he put on his shirt dat he wen take off befo fo work, an den he go jump outa da boat fo swim quick to da beach,

⁸cuz da boat ony stay bout hundred yards from da beach. So den Jesus odda guys wen row da boat back to da beach, dragging da net wit all da fishes inside.

⁹Wen da guys wen go outa da boat, dey spock one charcoal fire on da beach. Had fish on top, an had bread.

¹⁰Jesus tell um, “Eh, bring some a da fish you wen catch ova hea.”

¹¹So Simon Peter go back inside da boat, an he help da guys drag da net on top da beach. Had plenny big kine fishes inside -- was hundred fifty three! An you know wat? Da net neva even broke, no matta had so plenny fish inside.

¹²Jesus tell um, “Come on, you guys! Breakfas time awready!” His guys, dey know awready, was da Boss. An dey too scared fo aks him, “Who you?”

¹³Den Jesus wen go ova dea, an take da bread an give um to his guys. Same ting wit da fish.

¹⁴Az was three times Jesus wen let da guys see him afta he wen come back alive from mahke.

¹⁵Afta dey pau eat, Jesus wen aks Simon Peter, “Eh Simon, John's boy. Tell me dis: You get mo plenny love an aloha fo me den dese guys get, o wat?” Peter tell um, “Eh, fo shua, Boss. You know I yoa friend.” An Jesus wen tell um, “Kay den. Feed my baby sheeps.”

¹⁶Den Jesus aks um one mo time, “Eh Simon, John's boy. You get love an aloha fo me, o wat?” Peter tell um, “Eh, fo shua, Boss! You know I yoa friend.” An Jesus tell um, “Kay den. Take care my sheeps.”

¹⁷An den one mo time, Jesus aks um, “Eh Simon, John's boy. You my friend, o wat?” Den Peter wen come all hurt inside, cuz now three times awready Jesus go aks him. He wen say, “You my friend, o wat?” So Peter tell um, “Boss! You know everyting! You know I yoa friend.” Jesus tell um “Feed my sheeps.

¹⁸You know wat I mean? Den I like tell you dis too: Befo time, wen you was one young guy, you used to put on yoa clotheses an tie yoa belt an go wea eva you like. Bumbye, you goin come one old guy. Den you goin stick out yoa hands an one nodda guy goin tie you up an take you one place you no like go.”

¹⁹(Jesus wen talk lidat fo tell Peter wat goin happen bumbye, how Peter goin mahke fo show how awesome God stay.) Den Jesus tell um, “Come on! Stay tight wit me an be my guy.”

²⁰Den Peter wen turn aroun, an spock me walking behind dem. I one a Jesus guys, da one Jesus get plenny love an aloha fo. I da guy dat wen sit by Jesus da time dey wen eat da Passova food, an wen aks Jesus, “Eh Boss, who da guy dat goin set you up fo mahke?”

²¹Wen Peter spock me, he wen aks Jesus, “Eh Boss! Wat bout dis guy? Wat goin happen to him?”

²²Jesus tell um, “So, wat if I like him stay alive till I come back? Bodda you? You, you stay tight wit me!”

²³Cuz a dat, Jesus odda guys telling each odda, “Dat guy John, he no goin mahke, eva.” But Jesus neva tell um dat I no goin mahke, eva. He ony say, “So, wat if I like fo da guy stay alive till I come back? Bodda you?”

²⁴An you know who dat guy dat Jesus talk bout, yeah? Was me, John! Jesus, he my teacha. I telling you guys all dis stuff. I wen see um happen, an I wen write um all down. An we all know da stuff I stay telling you guys, dat stuff stay true.

²⁵An get plenny mo odda kine stuff Jesus wen do. If somebody wen try write all dat Jesus wen do, from da time he wen start till pau, I figga da whole world no mo room fo put all da kine books bout um.