Read Hawaii Pidgin John 9 Bible Online

John 9 - Hawaii Pidgin bible

John 9

¹Afta dat Jesus was walking, an he spock one guy dat wen born blind.

²Da guys Jesus stay teaching wen aks him, “Eh, Teacha! Who wen do bad kine stuff, dis guy o his mudda an fadda? Az why he wen born lidat, yeah?”

³Jesus tell dem, “Not even him o his fadda o mudda. Az not why he wen born blind. He wen born lidat so dat everybody can see da awesome stuff God goin do fo da guy.

⁴God wen send me hea. We gotta do da kine stuff he tell us fo do now wen still get light. Bumbye nite time come, an den nobody can work.

⁵I stay inside da world now, an I jalike da light fo da peopo all ova da world.”

⁶Afta Jesus say dat, he wen spit on top da dirt, an make some mud. Den he take some a dat an put um on top da guy's eyes.

⁷Den Jesus tell him, “Go, wash yoa face inside da Siloam water place.” Now, Siloam mean, “Dey Send Water Dea.” So da guy go ova dea an wash his face, an wen he go home, he can see!

⁸So da peopo dat stay live near da guy, an da oddas dat wen see him beg befo, dey say, “Eh, dis da guy dat wen sit an beg befo, yeah?”

⁹Some peopo say, “Yeah, he da guy!” Odda peopo say, “Nah! He ony look like him.” But da guy say, “Yeah! I da guy!”

¹⁰So dey aks him, “How come you can see now?”

¹¹He tell dem, “Da guy Jesus wen make mud, an put um on top my eyes, an tell me, ‘Go da Siloam water place an wash.’ So I wen go an wash, an den I can see!"

¹²Dey aks him, “Wea he stay?” He say, “I donno.”

¹³Den dey take da guy dat was blind to da Pharisee guys.

¹⁴Now, dat was da Rest Day wen Jesus wen make da mud an make da guy see.

¹⁵So da Pharisee guys wen aks him, “Eh, how come you can see?” Da guy tell dem, “He wen put mud on top my eyes, an I wen wash, an den I can see!”

¹⁶Den some a da Pharisee guys say, “Dis guy no can come from God, cuz he do stuff he not suppose to do on da Rest Day.” But odda Pharisee guys say, “Nah! How can one bad kine guy do da kine awesome stuff dat show who him?” An dey wen argue wit each odda.

¹⁷So dey aks da guy dat was blind one mo time, “Eh, wat you say bout da guy dat wen make you see? Da guy say, “He one talka fo God.”

¹⁸Da Jewish leada guys neva believe dat da guy wen stay blind befo he wen see. So dey wen send guys fo bring his mudda an fadda.

¹⁹Dey aks da mudda an fadda, “Dis yoa boy? You say he wen born blind? How come he can see now?”

²⁰Da mudda an fadda say, “Yeah, dis our boy. An he wen born blind.

²¹But we donno how come he can see now, o who da guy wen make him see. Go aks him. He old nuff. He can talk fo himself.”

²²His mudda an fadda guys wen talk lidat, cuz dey scared da Jewish leada guys. Cuz dem guys wen awready talk togedda, an say, “If anybody say dat Jesus da Christ, da Spesho Guy from God, we goin throw him outa da Jewish church.”

²³Dass why his mudda an fadda guys wen say, “He old nuff. Go aks him.”

²⁴So dey tell da guy dat was blind fo come back one mo time. Dey say, “Eh! Tell da trut in front God! Us guys know fo shua dat dis bugga Jesus, he one bad guy.

²⁵Da guy tell dem, “I donno if he one bad guy o wat. But I know one ting: befo I no can see -- now I can see!”

²⁶Dey aks him, “Wat he wen do to you? How he wen open yoa eyes?”

²⁷He tell dem, “I wen tell you guys awready, but you guys neva lissen. How come you guys like hear um again? You guys like come his guys so he can teach you guys too?”

²⁸Den dey talk bad to him, an say, “You his guy, an you lissen to him. Us guys, we Moses guys, an we ony lissen to Moses.

²⁹We know dat God wen talk to Moses. But dis bugga, we donno wea he come from.”

³⁰Da guy tell dem, “Wat! Dis blow my mind! You guys donno wea he wen come from, but still yet he wen make me see.”

³¹An da guy say, “Now, we know dat God no lissen to da bad kine guys. But he lissen to da guys dat get respeck fo him an do wat he like.”

³²An da guy say, “Lissen! From da time wen God wen make da world till now, nobody eva wen hear dat somebody wen make one guy see dat wen born blind.”

³³An da guy say, “If dis guy neva come from God, den he no can do notting.”

³⁴Dey tell him, “Eh, you ony do da bad kine stuff from da time you wen born! How come you tink you can teach us guys someting?” Den dey wen throw him outa da Jewish church.

³⁵Jesus wen hear dat dey wen throw da guy outa da Jewish church, so he go find da guy, an tell him, “You trus da Guy Dass Fo Real?”

³⁶Da guy say, “Who him, Mista? Tell me, so I can trus him.”

³⁷Jesus tell him, “You wen see him awready. Dass me, da guy talking to you.”

³⁸Da guy say, “Boss, I trus you!” An he go down on his knees in front Jesus.

³⁹Jesus tell him, “I wen come inside dis world fo show who do da bad kine stuff. Bumbye da guys dat no can see, goin see, an da guys dat can see goin come blind.”

⁴⁰Had some Pharisee guys dea dat wen hear dat. Dey aks Jesus, “Eh! You tink we no can see too?”

⁴¹Jesus tell dem,“If you guys no can see, den nobody can poin finga you guys. But you guys say dat you guys can see. Dass why God poin finga you guys.”