Read Hawaii Pidgin Acts 2 Bible Online

Acts 2 - Hawaii Pidgin bible

Acts 2

¹Wen da Day Numba Fifty afta Passova wen come, da one dey name Pentecost, all da peopo dat trus Jesus wen stay togedda in one place.

²Right den an dea one noise wen come down from da sky jalike one strong wind, an make big noise all ova da house wea dey stay sitting.

³Den dey see wat look jalike small kine fire dat wen stay right ova every guy.

⁴God's Spesho Spirit wen take charge a dem, an dey wen start fo talk wit plenny odda kine languages, cuz God's Spirit wen make um so dey can.

⁵Had Jewish peopo dat had plenny respeck fo God from all da countries in da world, staying inside Jerusalem dat time.

⁶Wen dey hear dat noise, plenny peopo come togedda, an dey was all shock, cuz every guy wen hear dem telling stuff in his own kine talk.

⁷Wen blow dea minds, an make dem tink plenny. An dey wen tell, “Eh! Da guys dat stay talking, dey from Galilee, yeah?

⁸Den how come us guys stay hear dem telling stuff wit our own kine talk?

⁹We come from all ova da place -- from Partia, Medea, Elam, Mesopotamia, Judea, Cappadocia, Pontus, Asia,

¹⁰Frygia, Pamfylia, Egypt, Libya near Cyrene, an some guys from Rome.

¹¹Get Jews, an guys dat wen trus God an come jalike one Jew. Get peopo from Crete an Arabia. An still yet, we all hear dem telling da awesome stuff God do, wit our own kine talk!”

¹²Wen blow dea minds, an dey no can figga, an dey wen tell each odda, “Eh, wat dis mean?”

¹³But had odda guys dat wen make fun a dem an say, “Eh, dese guys, dey drunk!”

¹⁴Den Peter wen stand up wit da odda eleven guys, an wen tell da peopo wit one big voice, “My bruddas an sistas, all you Jewish peopo dat stay inside Jerusalem, lissen! I like tell you guys wat mean dis stuff dass happening.

¹⁵Dese guys, dey not drunk jalike you tinking. Ony stay nine clock in da morning.

¹⁶Dis wat Joel wen tell, da guy dat wen talk fo God long time ago,

¹⁷God wen say, ‘Dis wat I goin do in da last days, I goin make my Spirit take charge a all da peopo. Yoa boys an yoa girls goin talk fo me. Yoa young guys goin see spesho tings. An yoa old guys goin dream plenny dreams.

¹⁸Yeah, an dat time too, I goin make my Spirit Take charge a da peopo dat work fo me, Guys an wahines, An dey goin talk fo me.

¹⁹I goin show awesome stuff up dea in da sky, An down hea on top da earth Goin get blood an fire an big kine smoke clouds.

²⁰Da sun goin come dark, An da moon goin come red jalike blood. Dat goin happen Befo da big an awesome Day Wen God da Boss come fo judge all da peopo.

²¹An den, everybody dat know who da Boss fo real kine An tell him fo take um outa da bad kine stuff dey do, Da Boss goin lissen an take um outa all dat.’

²²“Eh, you guys from Israel ohana, lissen! I like tell you bout Jesus, da guy from Nazaret town. God wen show dat Jesus fo real, cuz God wen give him power, an he wen do all kine awesome stuff dat show who him. An you guys know dis fo real, cuz he wen do um ova hea by you guys.

²³God wen plan um long time ago, cuz he wen know dey goin give Jesus ova to you guys. An you guys wen take him an let da bad kine guys kill him on top one cross.

²⁴But God wen make him come back alive again from mahke. He no need suffa an mahke again, cuz a wat God wen do. He no can stay mahke, cuz he mo strong.

²⁵David wen say dis bout him: ‘I wen spock da Boss. He stay in front me all da time. He stay close by my right side. I no goin come shook up.

²⁶So I stay real good inside, Wen I tell peopo bout him. No matta I goin mahke, I know I can rest an wait fo God,

²⁷Cuz God, you no goin let me stay inside Hell, An you no goin let me rot, cuz I stay good an spesho fo you.

²⁸You wen teach me how fo do, So I can live fo real kine. You goin make me stay real good inside, Cuz you stay wit me.’

²⁹“Bruddas an sistas, good I tell you guys fo real kine dat da leada fo our ohana, David, he wen mahke, an dey wen bury him, an his grave stay hea still yet.

³⁰David was one guy dat wen talk fo God, an wen know dat God wen promise dis: ‘Bumbye I goin make one from yoa ohana king jalike you.’

³¹David wen know wat God goin do. He wen say dat da Spesho Guy God Send goin come back alive again. He no goin stay inside Hell, an he no goin rot.

³²God wen make Jesus come alive again, an we all wen see him an tell bout him.

³³God wen put him in da mos importan place by his right side, an he wen get God's Spesho Spirit, da One God wen promise. He wen make his Spirit take charge a us guys too, an dass wat you see an hear now.

³⁴Cuz David neva go up in da sky, but he wen say, ‘Da Boss wen tell my Boss: “Come ova hea, sit down! Dis da importan place by my right side.

³⁵Bumbye I goin make da peopo dat go agains you Go down in front you, Fo show dat you da winna ova dem.”-’

³⁶“So, lissen! All da Israel peopo gotta know dis fo shua: You guys wen kill dis guy Jesus on top one cross, but God wen make him da Boss, an he da Spesho Guy God Wen Send.”

³⁷Wen da peopo hear dat, dea heart come sore, an dey tell Peter an da odda guys Jesus wen send all ova, “Bruddas, wat we goin do?”

³⁸Peter tell dem, “Every one a you guys gotta come sorry an stop doing all da bad kine stuff you stay do, an get baptize fo show you Jesus guys. He da Spesho Guy God Wen Send. Den he goin let you guys go, an hemo yoa shame fo all dat bad kine stuff, an he goin give you his Spesho Spirit.

³⁹He wen promise all dat fo you guys an yoa kids, an fo all da peopo dat no stay tight wit God -- all da ones da Boss our God goin tell fo come to him.”

⁴⁰Peter wen tell dem plenny mo stuff, an beg um, “Let God take you outa da bad kine stuff dat da odda peopo stay doing now.”

⁴¹Had bout three tousand peopo dat wen trus wat he wen say, an wen get baptize. Den dey come togedda wit da odda peopo dat wen trus Jesus.

⁴²Dey wen stick wit all da stuff da guys dat Jesus wen send wen teach dem. An dey all wen stay togedda, an eat togedda, an wen pray.

⁴³Da guys Jesus wen send all ova, dey get power fo do plenny awesome stuff. Everybody stay scared, cuz dey get plenny respeck fo Jesus guys.

⁴⁴All da peopo dat wen trus Jesus wen stay togedda, an wen share all dea stuffs wit each odda.

⁴⁵Dey sell dea stuffs, an give da money to all da peopo dat need kokua.

⁴⁶Every day dey come togedda inside da temple yard. Dey broke da bread inside dea houses, an eat togedda da food. An dea heart wen stay good inside, an dey neva put on one ack.

⁴⁷Dey wen tank God an tell how good he stay. An all da peopo wen talk good bout dem. An every day da Boss wen bring odda peopo dat he wen take outa da bad kine stuff dey wen do.