Read Hawaii Pidgin Acts 25 Bible Online

Acts 25 - Hawaii Pidgin bible

Acts 25

¹Governa Festus wen come Cesarea side fo take charge, an three days lata he wen go from Cesarea to Jerusalem.

²Az wea da main pries guys an da Jewish leadas wen come in front him an wen poin finga Paul.

³Dey wen beg Festus fo do someting fo dem. Dey wen like him fo bring Paul to Jerusalem, cuz dey like kill him wen he stay coming.

⁴Festus tell um, “Paul stay one prisona inside Cesarea, an I going back dea pretty soon.

⁵Make some a yoa leada guys go wit me, an dey can poin finga at him ova dea, if he wen do someting wrong.”

⁶Festus wen stay ova dea eight o ten days, an den he wen go back Cesarea. Da nex day he wen sit down on top da judge chair, an wen tell um fo bring Paul in front him.

⁷Paul wen come, an da Jewish guys dat wen come from Jerusalem wen stand aroun Paul, an wen poin finga at him real hard. But dey no can prove notting.

⁸Paul wen say, “I neva do notting wrong agains da Jewish Rules o da temple o Cesar, da Big King.”

⁹Festus wen like do someting fo da Jewish guys, so he wen tell Paul, “You like go Jerusalem an stand in front me ova dea fo tell bout all dis stuff?”

¹⁰Paul say, “I goin stand in front King Cesar. Dass da right place. I neva do notting wrong fo da Jewish peopo. An you know dass true.

¹¹If I wen do someting wrong so I gotta mahke, I goin take dat. But if da stuff dey say agains me no stay true, nobody get da right fo hand me ova to dem. I going in front King Cesar!”

¹²Festus wen talk to his guys, an den he say, “You wen aks fo go in front Cesar. Kay den. Dass wea you going!”

¹³Bumbye King Agrippa an Queen Bernice wen come to Cesarea fo give dea aloha to Festus.

¹⁴Cuz dey goin stay ova dea long time, Festus wen tell King Agrippa bout Paul. He say, “Get one guy ova hea dat Felix wen leave inside jail.

¹⁵Wen I wen go Jerusalem, da main pries guys an da older leadas fo da Jews wen poin finga at him, an say I gotta punish him.

¹⁶I wen tell um dat da Rome peopo no hand ova anybody befo he stand in front da judge, an den dey can poin finga at him an he can talk fo himself.

¹⁷Wen dey come ova hea by me, right den an dea I neva wait, but I wen sit on top da judge chair da nex day. An I wen tell um fo bring da prisona in front me.

¹⁸Wen da guys dat poin finga at him wen stand up fo talk, dey neva say notting I wen tink dey goin say.

¹⁹But dem guys believe one way an Paul believe one nodda way, an dey wen make argue bout dat, an bout one mahke guy name Jesus, dat Paul say he still stay alive.

²⁰I neva know how fo check out all dat stuff, dass why I wen aks him if he like go Jerusalem an stand in front da judge ova dea.

²¹But Paul say he like go in front King Cesar. So, I wen tell da army guys fo guard him till dat time come.”

²²King Agrippa wen tell Festus, “I like lissen to dis guy.” Festus say, “Tomorrow you goin hear him.”

²³Da nex day King Agrippa an Queen Bernice wen come all dress up an make big show. Dey wen go inside one big place wit all da main captains an da main leada guys fo da town. Festus tell da guys fo bring Paul inside, an dey wen bring him.

²⁴Festus say, “King Agrippa, an all you guys dat stay hea wit us, hea da guy! All da Jewish peopo wen tell me bout him inside Jerusalem an ova hea inside Cesarea. Dey wen yell dat he gotta mahke right now.

²⁵But I neva find notting he wen do dat he gotta mahke. But he wen aks fo go in front King Cesar, so I say he can go ova dea Rome side.

²⁶But I no mo notting fo write down bout him in one letta fo send da Boss Cesar. Dass why I wen bring him in front all you guys, an even mo in front you, King Agrippa, so you can check him out, an den I can write down someting.

²⁷Cuz I tink no stay good fo send one prisona ova dea if I no can say how come dey poin finga at um.”