Read Hawaii Pidgin Romans 15 Bible Online

Romans 15 - Hawaii Pidgin bible

Romans 15

¹You know, us guys dat stay strong inside, we gotta kokua da peopo dat no stay strong nuff inside fo handle all da stuff dat happen. No good we ony do da tings dat make us guys stay good inside.

²Dis wat I mean: us guys gotta try do wass good fo our bruddas an sistas, so dey goin come mo strong fo handle, an stay good inside too.

³You know, even Jesus Christ neva do wat he wen do jus fo make himself stay good inside. Jalike God wen say befo time inside da Bible bout da bad kine stuff goin happen to Jesus, “Wen dey stay talk any kine stuff to yoa face, Az jalike dey telling me same ting.”

⁴Everyting dat peopo wen write inside da Bible befo time, all dat stay inside da Bible fo teach us, so den we can come mo strong fo hang in dea, an we can go get good kine words from da Bible. Den we goin know fo shua dat bumbye God goin do plenny good tings fo us.

⁵God, he da One dat help us hang in dea wen get hard time, an he give us good kine words. I like him help you guys figga da same tings wit each odda, jalike how Jesus Christ like you guys fo figga togedda.

⁶Den all you guys goin tink togedda, an tell togedda how awesome God stay. God, he our Boss Jesus Christ's Fadda.

⁷So den, take each odda in, jalike Christ wen take you guys in. Den peopo goin tell how awesome God stay.

⁸I like say dis: Christ wen come jalike one worka guy fo help da Jewish peopo fo know dat God tell da trut an he do wat he say, an fo make um come true all da tings God wen promise our ancesta guys fo happen.

⁹Den all da diffren odda peopos too, dey goin tell how awesome God stay, cuz dey know dat he get pity fo us guys an give us guys chance. Jalike David wen say befo time inside da Bible, “Az why I goin talk good bout you plenny To all da odda diffren peopos. I goin sing songs bout wat kine guy you in front oddas.”

¹⁰But da same ting, get one nodda place inside da Bible dat tell, “Eh, all you diffren peopos from all ova da place, Stay good inside, jalike God's own peopo.”

¹¹Anodda place inside da Bible David say dis: “All you odda diffren peopos, Go tell how awesome an good da Boss stay.”

¹²An anodda place inside da Bible Isaiah wen write, “From Jesse's boy King David, Goin get one nodda Guy dass goin come bumbye. He goin come da leada fo all da diffren peopos. Dey know dat he goin come bumbye, An dat dey goin trus him cuz dey know who him.”

¹³I like you guys stay real good inside an yoa hearts rest inside cuz you guys trus him. An da God dat make you guys stay shua bout wat goin happen bumbye, he goin do everyting good kine. Den God's Spesho Spirit goin make you guys mo strong fo wait fo wat God goin do fo you guys bumbye.

¹⁴My bruddas an sistas, I know dis fo shua: dat you guys get good heart everytime, you guys get all da smarts you need, an you guys know how fo tell each odda fo do da importan stuff.

¹⁵You know, I no shame fo write you guys dese tings, cuz az fo help you guys rememba dem one mo time. I do dis cuz God wen do plenny good kine stuff fo me.

¹⁶God wen go make me one worka guy fo Jesus Christ fo tell all da diffren peopos da Good Stuff Bout God, jalike one pries guy. God do dat cuz he like all da diffren peopos come jalike one present fo him dat make him come good inside. An God's Spesho Spirit goin make dem be good an spesho fo God.

¹⁷Dass how come I feel plenny proud bout all dis stuff I doing fo God, cuz I stay tight wit Jesus Christ.

¹⁸I no even talk bout any odda kine stuffs. I ony talk bout da tings Christ wen do, an I help him fo do um. Da diffren peopos lissen to Christ now, cuz a da tings I wen tell an do.

¹⁹Christ wen give me da power from God's Spirit fo do awesome kine stuff. He do dat fo show who Christ. Dass how I wen tell all da Good Kine Stuff Bout Christ to all da peopo, from Jerusalem side, all da way to Illyricum side.

²⁰From long time befo I tinking, “I really like tell bout Christ to da peopo dat neva hear notting bout da Good Stuff Bout Him!” Cuz I no like go teach wea get odda peopo stay teaching awready.

²¹Jalike da Bible wen say befo time, “Da peopo dat neva have nobody fo tell um bout God, Dey da peopo dat goin see him. Da peopo dat neva hear notting befo time, Dey goin undastan.”

²²Az how come I neva go by you guys befo. From long time I like go, but den, I no can.

²³But now, I pau do my work dis side, an long time now, I wen like plenny fo go see you guys.

²⁴Az why, wen I go Spain side, I like stop see you guys dat time. Afta I stay wit you guys litto wile, you guys can kokua me fo go Spain.

²⁵I going Jerusalem side first, fo kokua da peopo ova dea dat stay spesho fo God.

²⁶Cuz da bruddas an sistas Macedonia side an Akaia side wen like give money fo kokua da poor peopo Jerusalem side dat stay spesho fo God.

²⁷Dey wen figga fo do dat, an dass good, cuz dey owe da Jerusalem peopo. Cuz all da odda peopos from all ova wen get da same good kine stuff dat da Spirit from God wen give da Jews first, so az good, yeah? if da church peopos dat not Jews give da Jewish bruddas an sistas some money fo help um.

²⁸So afta I pau dis job, an make shua dat da Jerusalem bruddas an sistas wen get da money, den I goin see you guys wen I going Spain.

²⁹I know dat wen I go by you guys, goin get all da good kine stuffs Christ like give us.

³⁰Eh, bruddas an sistas, I aks you guys fo pray hard wit me dat God goin help me. You guys pray cuz Jesus Christ yoa Boss, an cuz God's Spirit give you guys love an aloha.

³¹Aks God fo take care me Judea side, so da peopo dat stay ova dea dat no like trus God no goin hurt me; an, wen I go kokua da Jerusalem peopo dat stay spesho fo God, dey goin stay good inside cuz a dat.

³²Den, if God like, I going by you guys, an I goin stay real good inside, an rest up.

³³God, he da kine God dat make you guys heart rest inside. I like him stay tight wit all you guys. Dass it!