Read Hawaii Pidgin Romans 2 Bible Online

Romans 2 - Hawaii Pidgin bible

Romans 2

¹So den, no matta who you, if you go poin finga somebody dat he doing bad kine stuffs, no foget you doing da same kine tings jalike him. Eh, you too no mo excuse, cuz you poin finga back yoa own self.

²But we know dis: Everytime God tell dat da peopo wen do bad kine stuff, we know wat he say stay true.

³So, wat you figga? Wen you poin finga da odda guys cuz dey doing bad kine stuffs, an you doing da same ting, you tink God goin let you go?

⁴God get plenny good heart fo you, an he stay hanging in dea an waiting fo you. An den, you make like dass notting? You no undastan dat he like you come sorry an pau do all da bad kine stuff you guys doing?

⁵But you get hard head, an you no like change how you stay doing. So, you stay making tings mo worse fo yoaself. Bumbye God da Judge goin tell who wen do da bad kine stuff, an everybody goin know dat wat God say stay true. Den he goin punish you, cuz he no goin take wat you wen do.

⁶How you make, same ting, God goin give you back.

⁷God goin give some peopo da real kine life dat stay to da max foeva, cuz everytime dey hang in dea an do da right ting. Dey like get plenny respeck from God, an get da real kine life.

⁸But da odda peopos, God no goin take wat dey do. He goin had it wit dem awready, cuz dey like make big kine trouble. Dey no like do da true stuff, but dey everytime like do wass wrong.

⁹Everybody dat stay doing da bad kine stuff goin get hard time how dey living, an dey goin suffa plenny presha. First goin be da Jewish peopo. Den goin be da odda peopos dat not Jews.

¹⁰But everybody dat stay doing da good kine stuff, God goin give dem plenny respeck, an dea hearts goin rest inside. First goin be da Jewish peopo. Den da odda peopos dat not Jews.

¹¹God make um everybody da same ting.

¹²Everybody dat do bad kine stuff, an dey neva know dat God wen make Rules fo everybody, dey goin get cut off from God, no matta dey donno dat God's Rules stay. An everybody dat do da bad kine stuff, an dey know God's Rules stay, God goin use da Rules fo judge dem.

¹³Fo get um right wit God, no nuff fo ony hear God's Rules. Gotta do jalike God's Rules say, fo get um right wit him.

¹⁴Da peopo dat not Jews, dey donno dat God's Rules stay. But if get peopo dat by demself do jalike God's Rules say, but dey donno dat da Rules stay, den dey stay ack jalike dey get um.

¹⁵How dey ack, dass jalike dey get God's Rules right dea inside dea heart. Dea heart tell dem bout wat dey doing. Wen dey go tink wat stay right an wat stay wrong, den dey figga.

¹⁶Dass how goin be bumbye wen God goin make Jesus Christ da Judge fo da secret stuff inside everybody's heart. Dass wat da Good Kine Stuff From God say, jalike I stay teaching.

¹⁷Now you dea, you like peopo fo know you one Jewish guy. You trus God's Rules. You talk big bout God.

¹⁸You know wat God like you fo do. You know wass da bestes kine stuff, cuz da teachas wen teach you from God's Rules.

¹⁹You stay shua you can tell da peopo dat no can see wea fo go. You tink you jalike one light fo all da peopo dat stay inside da dark.

²⁰You can teach da peopo who donno notting an da ones dat still yet need one teacha. Cuz you get God's Rules, you tink you get all da trut an you know everyting.

²¹So, you go teach da odda peopo. You teach yoaself too, o wat? You go preach dey betta not rip off nobody. You rip off too, o wat?

²²You say, “No go fool aroun behind yoa husban o wife's back.” You go fool aroun too, o wat? You tink da idol kine gods no good. You take stuff from dea temples, o wat?

²³You talk big bout God's Rules. You making God shame cuz you broke um, o wat?

²⁴Jalike da Bible wen say befo time, “Da peopos dat not Jews try run down God's name cuz a you guys.”

²⁵If you do wat God's Rules say, az good you get da cut skin mark dat show you one Jewish guy. But if you go broke God's Rules, az jalike you no mo da mark awready, an you not one Jewish guy fo real kine.

²⁶So den, if get one guy dat not one Jew, an he do all da good kine stuff God's Rules say, den no matta he neva cut skin, he God's guy. Dass jalike he get da mark too.

²⁷So den, da peopo dat not Jews, if dey do wat God's Rules say, dey goin show dat you Jewish peopo wen broke God's Rules. No matta dey no mo da cut skin mark, an you guys get da Rules inside da Bible from befo time, an da cut skin mark too.

²⁸No matta somebody who come from Abraham get da cut skin mark on top his body, dat no make him one Jewish guy fo real kine.

²⁹Da Jewish guy who fo real stay same ting lidat inside. God's Spirit stay in charge da guy, an dass jalike one spesho mark inside his heart. Da Rules inside one book, dass not wat make him God's kid. Az not da peopo dat goin talk good bout him, goin be God dat goin do um.