Read Hawaii Pidgin Romans 3 Bible Online

Romans 3 - Hawaii Pidgin bible

Romans 3

¹So den, how come mo betta fo be one Jewish guy? You tink da Jewish guy who get da cut skin mark get mo spesho tings den da guy dat not Jew?

²Az right! Help um plenny fo do everyting. First, cuz God wen give da Jewish peopo all da stuffs he wen tell um, an he wen tell um fo take care all dat.

³So den, wat? You tink dat God no can do wat he wen say he goin do, jus cuz get some Jewish peopo dat neva like trus him?

⁴Not! God everytime da real ting, no matta everybody dat stay all ova da world all bulaias! Jalike da Bible say bout God, “Da peopo goin find out Dat wat he say, az right. No matta dey say dat he do wrong, He goin win still yet, Cuz he no do da bad kine stuff notting.”

⁵But if we do da wrong tings, an dat goin show everybody even mo dat God stay doing da right tings, den wat we goin say bout dat? We goin say God do wrong wen he punish us, o wat? (Dass how some peopo stay talking, you know.)

⁶No way! God no do da wrong kine stuff notting wen he punish us. Dass why he get da right fo punish da peopo inside da world wen dey do da wrong kine stuff.

⁷If I go bulai, an dat show everybody even mo dat God tell da trut, an he stay awesome, den how come God say was bad, da ting I wen do?

⁸Even get some peopo dat stay talking stink bout us an tell odda peopo dat we say, “Eh, we go do da bad kine stuff, so den everyting goin come good!” God goin do da right ting wen he punish da peopo dat tink lidat!

⁹So den, wat? You tink us Jewish peopo stay mo betta den dem? No way! Cuz I wen awready show you guys dat da bad kine stuff get power ova everybody, da Jewish peopo an da peopo dat not Jews.

¹⁰Jalike da Bible wen say, “No mo nobody dat do da right ting everytime. No mo even one guy!

¹¹No mo nobody dat undastan, No mo nobody dat try fo know God!

¹²Nobody eva do how dey suppose to. All togedda dey wen come poho. No mo nobody dat do good tings, No mo even one guy!

¹³Dea mout stay jalike one open grave. Dey bulai wit dea mout. Da poison come from inside dea mout, Jalike one snake.

¹⁴Wit dea mout Dey everytime like say stink stuffs fo hurt somebody, Cuz az how dey stay inside.

¹⁵Dey move fast fo kill somebody.

¹⁶Every place dey go, Dey like bus up everyting, An make big trouble fo peopo.

¹⁷Dey neva know how fo make good wit odda peopo, An make dea hearts rest inside.

¹⁸Dey no mo respeck fo God notting.”

¹⁹Now, we know dat everyting God's Rules say, dass fo da peopo dat get da Rules ova dem. Dass why nobody can make argue wit God. Bumbye everybody all ova da world gotta go in front God da Judge, so he can say if dey wen do da bad kine stuff, o wat.

²⁰Dass why no mo nobody dat can say dat dey get um right wit God, jus cuz dey wen do everyting God's Rules say. Not even! God's Rules ony show dat us wen do da bad kine stuff.

²¹Stay clear now how God wen go make plan so we can get um right wit him. We can get um right wit him, but not cuz a God's Rules. God's Rules an da guys dat wen talk fo God long time ago, dey tell all dat inside da Bible.

²²God wen make us get um right wit him wen we trus Jesus Christ, da Spesho Guy God Wen Send. He do dat fo everybody dat trus him, no mo notting diffren.

²³Cuz everybody do bad kine stuff. Dass why nobody can come awesome by demself, da way God like make um come awesome.

²⁴But can get um right wit God, cuz God get good heart an like do plenny good stuff fo peopo. God cut um loose from da power da bad kine stuff get ova dem, cuz dey tight wit Jesus Christ.

²⁵God wen make Jesus da main guy, so he can be da sacrifice fo hemo da shame fo all da bad kine stuff everybody do, ony if dey go trus him an dey shua dat he wen go bleed an mahke fo dem. Dass how God show dat he make everyting come right: he let um go fo da bad kine stuff dey wen do befo time an hemo dea shame.

²⁶You know, befo time God neva push hard fo peopo fo pau do da bad kine stuff. Nowdays, fo show everybody dat he everytime do da right ting, he make everybody dat trus Jesus get um right wit him.

²⁷So, wat? How come you tink you can talk big now? No can! Wot?! You tell how you get one Rule dat say, you get um right wit God cuz you wen do good kine stuffs? Eh, not even! We can ony tell bout dat Rule dat say we get um right wit God cuz we trus um.

²⁸So dis wat we figga: Anybody can get um right wit God wen dey trus him, not wen dey ony do da stuff God's Rules say.

²⁹Kay den. God, he ony fo da Jewish peopo? You tink he not God fo da peopo dat not Jews? Fo shua, he God fo dem too!

³⁰Cuz ony get one God. Da guys dat get da cut skin mark fo show dey Jewish kine, God make um so dey get um right wit him cuz dey trus him. An da peopo dat not Jews an no mo da mark on top dem, he make dem so dey get um right wit him cuz dey trus him too.

³¹You tink dat wen we trus God, dat mean we make God's Rules poho? No way! We make da Rules mo solid.