Read Hawaii Pidgin Romans 8 Bible Online

Romans 8 - Hawaii Pidgin bible

Romans 8

¹So den, God no goin punish da peopo dat stay tight wit Jesus Christ!

²Cuz get two tings dat stay fo real: First ting, if you stick wit God's Spirit, he goin make you come alive fo real kine an make you stay tight wit Jesus Christ. Da odda ting is dat if you stick wit da bad kine stuff, you goin cut yoaself off from God. Now, if you get God's Spirit, God's Spirit cut you loose from da bad kine stuff.

³Even if we do wat da Rules from God say, dat no can throw out da bad kine stuff inside us, cuz da way us guys stay, we not strong inside. But den God, he wen go send his own Boy fo come one guy jalike us. Da way Jesus wen stay, God wen make him look jalike one regula guy dat can do bad kine stuff, jalike all da odda peopo. But den, Jesus neva do bad kine stuff -- how he wen live, he wen show proof dat da tings da peopo was doing was bad fo shua. Plus, he wen come one sacrifice fo hemo da shame fo da bad kine stuff dat all da odda peopo wen do.

⁴God wen send Christ fo mahke so us guys can do all da right kine stuffs God's Rules say we gotta do. Now, we stay doing da kine stuff God's Spirit like us do, not da kine stuff we do wen we live da way we like.

⁵Da peopo dat live da way dey like, dey live lidat cuz dass how dey stay inside, an dass da ony kine stuff dey tinking bout all da time. But da peopo dat live da way God's Spirit like, dey ony tinking bout da kine stuff dat God's Spirit like.

⁶Da guy dat ony like tink bout doing da bad kine stuff he like do, jalike he stay mahke inside awready. But da guy dat ony like tink bout doing wat God's Spirit like, he stay alive fo real kine, an his heart stay rest inside.

⁷An if you ony like tink bout doing da kine stuff you do wen you live da way you like, cuz dass how you stay inside, you ony going agains God everytime, you know. Dat mean, you not doing wat God's Rules say -- cuz you no mo da power fo do um.

⁸Da peopo dat ony stay doing da bad kine stuff dey like do, no way God goin like wat dey doing.

⁹But you guys, you guys da one dat no stay doing da bad kine stuff you do wen you live da way you like. If God's Spirit stay live inside you, you guys stay doing da kine stuff God's Spirit like. Whoeva no mo Christ's Spirit inside him, dass da guy dat not God's guy.

¹⁰But Christ stay tight wit you guys. You guys spirits stay alive fo real kine, cuz you guys get um right wit God. So, no matta you guys goin mahke cuz you guys wen do bad kine stuff.

¹¹God da One dat wen make Jesus come back alive afta he wen mahke. If God's Spirit stay tight wit you guys, den he goin make you guys come back alive, yoa body, everyting, jalike how he wen make Christ come back alive. His Spirit goin do dat fo you guys, no matta yoa body gotta mahke.

¹²So den, bruddas an sistas, we gotta do someting. But we no need do notting fo da bad kine stuff inside us, da way our bodies like make us do.

¹³If you guys go ack jus da way you stay inside, fo shua kine you goin cut yoaself off from God! But den, if you let God's Spirit help you kill off all da bad kine stuff you do wen you live da way you like, den you goin live fo real kine.

¹⁴Da peopo dat lissen to God's Spirit so he can tell um wat fo do, dem guys God's kids.

¹⁵Wen you guys get God's Spirit in charge a you, God's Spirit no goin make you guys ack jalike slaves dat gotta stay scared all da time. Az how was befo time. Wen you get God's Spirit in charge a you, you know you stay God's kids! Dass why he goin lissen wen we yell out, “Daddy!”

¹⁶Jalike our own spirit tell us inside, God's Spirit tell us we God's kids.

¹⁷Cuz us guys God's kids, dat mean, we goin get all da good kine stuff God goin give his kids, cuz he our Fadda. Jalike da Fadda give everyting he get to Christ, his Boy, an dass how he goin make to us guys, same time he give um to Christ. Ony one ting: us guys gotta suffa jalike Christ wen suffa, so den bumbye, God make us come awesome jalike he wen make Christ come awesome.

¹⁸You know, I figga dat da stuff we stay suffa right now, az notting! Cuz da awesome stuff God goin show us bumbye, dat goin be unreals!

¹⁹All da tings dat God wen make, jalike dey ony stay watching real hard, cuz dey waiting fo see wen God goin show everybody he proud who his kids stay.

²⁰All da tings God wen make, he wen figga, first, everyting gotta come all hamajangs an stay lidat. Not suppose to be lidat, an God know fo shua dat bumbye he goin make all dat stuff come okay one mo time.

²¹Right now, all da tings dat God wen make, dey stay stuck hamajang kine, an stay coming all pilau kine. But bumbye, God goin do awesome tings fo get um outa dat, so dey can come jalike suppose to be. Same time, God goin do awesome tings fo get all his kids outa da pilau kine stuff too.

²²Us guys know, from befo time till now, all da tings God wen make stay making noise jalike dey get big pain, jalike wen one wahine goin born one baby an she stay suffa plenny.

²³Eh, us guys too, no matta we get da Spirit in charge a us dat God wen give us first ting, jalike we still yet make big noise inside us lidat too. We make lidat cuz we still yet waiting an watching real hard fo da time wen God goin make us his kids to da max, an goin hemo loose our bodies from all da pilau kine stuff.

²⁴Wen God wen take us outa da bad kine stuff, he wen make us know fo shua wat he goin do bumbye. But still yet, we gotta wait. If we see someting happen, den we no goin wait fo dat same ting fo happen. Nobody goin stay wait fo someting dat wen pau happen awready.

²⁵But wen we stay waiting fo someting we no can see still yet, den we still goin hang in dea an wait some moa.

²⁶Same ting, God's Spirit help us plenny, cuz we no mo power. We donno how fo pray da right way. But God's Spirit, he go take ova an aks God fo do good tings fo us, no matta we jalike get big pain inside dat make us so we donno how fo say um.

²⁷An God, he know all da tings dat us guys like say inside our heart, an he know how his Spirit tink. Dass how God know everyting his Spirit like say fo help us, cuz God's Spirit tink jalike God tink, an da Spirit talk to God an aks him fo help da peopo dat stay spesho fo God.

²⁸Us guys know dis too: God make everyting come out all good fo da peopo dat get love an aloha fo him. Befo time, God wen go make plan wat he goin do fo dem, an he wen tell um awready, “Come wit me! Be my guys!”

²⁹Befo time, he wen pick dose peopo awready, cuz he like make um come da kine peopo jalike his Boy. God's Boy, dass Christ. He da main one, an da odda guys, dey jalike his younga bruddas an sistas.

³⁰Dat same peopo God wen pick befo time lidat, he wen tell um fo come be his guys. An dose same guys, God wen make um get um right wit him, an he wen make um come awesome jalike him.

³¹So den, wat we goin say bout all dat? God stay fo us guys to da max. Cuz God stay lidat, who going agains us? No mo nobody!

³²God neva even hold back his own Boy. He wen make um one sacrifice fo help all us guys. God wen give his own Boy fo mahke fo us. You know, dat mean God no hold back notting. He give us every good ting to da max!

³³An den, who goin poin finga da peopo God wen pick? No mo nobody fo do dat! Cuz God, he da One dat say dat his peopo get um right wit him awready.

³⁴Eh! No mo nobody dat can say God gotta punish all da peopo he wen pick. Jesus Christ, he da One dat wen go mahke. An mo importan den dat, he da One dat God wen make um come back alive afta he wen mahke. From dat time, he stay da mos importan place, by God's right side. Same time, Jesus da One dat stay aksing God fo help us guys!

³⁵You tink get somebody o someting dat goin make Christ no get love an aloha fo us guys? No way! You tink presha, hard time, o wen get somebody dat like hurt us, o wen no mo notting fo eat, o no mo clotheses, o wen we scared, o wen we get peopo dat like kill us? Not even!

³⁶Jalike da Bible wen say, “Cuz we yoa peopo, Everytime dey try kill us. Dey tink we jalike sheeps dey goin kill.”

³⁷Cuz Christ get love an aloha fo us guys to da max, no matta wat kine trouble get, no bodda us, cuz we da winnas fo shua!

³⁸I shua bout dis: No mo notting can make God stop loving us guys. No matta if we stay alive o we mahke, no matta if get angel guys o leada guys in da sky, o if get spirits wit power dat go agains us, no matta wateva stay happen now o goin happen bumbye,

³⁹no matta get guys wit power up dea inside da sky, o down dea inside da groun, no matta get all kine odda kine tings dat God wen make -- no mo notting dat can hemo us from God, so he no love us no moa! Cuz us guys stay tight wit Jesus Christ, da Spesho Guy God Wen Send, an he our Boss.