Read Hawaii Pidgin 1 Corinthians 15 Bible Online

1 Corinthians 15 - Hawaii Pidgin bible

1 Corinthians 15

¹Eh, bruddas an sistas! I like you guys fo rememba da Good Kine Stuff From God dat I wen tell you first time. You guys wen learn um good, an you standing strong cuz you stick wit um.

²If you guys hang in dea wit da Good Kine Stuff From God dat I wen tell you guys awready, dass how you guys goin get outa da bad kine stuff you stay in. Ony if you guys no hang in dea, den was wase time, an you guys trus God fo notting.

³From all da stuffs I wen learn first, an den I wen tell you guys, dis da main ting: Christ, da Spesho Guy God Wen Send, he wen mahke cuz us guys was doing bad kine stuff, jalike da Bible wen say befo time.

⁴Dey wen bury him. Den, day numba three, Christ wen come back alive, jalike da Bible wen say befo time.

⁵Den Christ wen let Peter see him, an den his Twelve Guys wen see him.

⁶Afta dat, mo den five hundred bruddas an sistas was togedda, an he wen let all dem see him. Mos a dem stay alive still yet, ony some a dem wen mahke awready.

⁷Den Christ wen let James see him, an afta, all da guys he wen send all ova da place, dey wen see him too.

⁸Me, I was da last guy fo see Christ. Jalike I da baby dat wen born late.

⁹You know, dem odda guys dat Christ wen send all ova da place, dey all mo importan den me. I even wen go try fo hurt da church peopo dat come togedda fo God. Dass why I not good nuff fo peopo call me one messenja guy fo God.

¹⁰But God, he so good to me! He wen make me how I stay now. An he neva wase time wen he wen do so plenny good stuff fo me. Afta he wen do um, den I wen work mo hard den all da odda guys. But no was me -- was God, you know, dat wen do all da good tings fo me, an he stay working inside me still yet.

¹¹But no matta me o da odda guys, we all teach da same ting. Everytime we tell da peopo da Good Stuff From God. An dass wat you guys wen trus.

¹²Kay den. Wen us guys teach bout Christ, da Spesho Guy God Wen Send, we tell everybody he wen come back alive afta he wen mahke, yeah? So how come, get some a you guys, dat tell, “No, da mahke guys, dey no goin come back alive, you know.” Wot!

¹³Eh! If da peopo dat mahke no goin come back alive, dat mean, Christ neva come back alive, too!

¹⁴An if Christ neva come back alive, den all da stuff us guys stay telling da peopo, dat no mean notting, an wase time if you guys trus him.

¹⁶(15-16) Plus, dat show dat us guys bulai wen we tell peopo how God stay, cuz we tell um dis bout God: “He wen make Christ come back alive afta he wen mahke.” Dass wat we tell um. But if da mahke peopo no can come back alive, den gotta be, God neva make Christ come back alive, cuz Christ wen mahke.

¹⁷Try tink bout dis: if Christ neva come back alive afta he wen mahke, den you guys ony wase time fo trus God. Cuz you guys stay stuck still yet wit da shame fo all da bad kine stuff you guys wen do!

¹⁸Same ting wit da odda peopo dat wen stay tight wit Christ befo time an den wen mahke -- if Christ neva come back from mahke, dey stay cut off from God too!

¹⁹Us guys stay shua dat Christ goin do good tings fo us. But if we can ony tink lidat fo da time wen we stay hea inside dis world, den eh! poho us guys! Den everybody goin pity us mo plenny den all da odda peopo inside da world!

²⁰Eh! But not lidat, you know! God's Spesho Guy Christ, he wen come back alive afta he wen mahke! He jalike da first fruit dey pick from da farm, an plenny mo goin come afta. Christ, he da first guy dat eva wen come back alive afta he wen mahke, an goin get plenny mo mahke peopo dat goin come back alive bumbye, same ting.

²¹Had one guy Adam jalike us guys, dat wen do someting bad, an dat make all us odda guys mahke. An had one nodda guy Christ jalike us guys, dat wen do someting good, an cuz a dat, da mahke peopo goin come back alive!

²²Cuz everybody, dey Adam kine guys, an dass why dey all gotta mahke. Same ting, everybody dat stay tight wit Christ, God goin make dem come alive.

²³But everyting gotta happen da right time, you know. Christ, he da first guy dat wen come back alive, jalike da first fruit dey pick from da farm. Bumbye, wen Christ come back hea, his peopo goin come back alive too.

²⁴An afta, everyting goin pau. Dat time, Christ da King goin wipe out all da spirits dat say, “Me, I da leada! I stay in charge a everyting ! I get da right fo make how I like! I strong!” Same time, Christ da King goin turn ova everyting to God his fadda.

²⁵Christ gotta stay da King, you know, till God bus up all da peopo dat go agains Christ, an show dat Christ da winna ova dem.

²⁶An get one nodda ting dat stay agains us guys -- we gotta mahke. Dass da last ting God goin wipe out. Den from dat time, nobody gotta mahke.

²⁷Da Bible wen say befo time, “God make his Spesho Guy be da boss ova everyting.” But you know, wen he say “everyting get him fo boss” -- fo shua, he not talking bout God, da One dat wen make him be da boss ova everyting.

²⁸But bumbye, afta God's Boy come da boss fo everyting fo real kine, den, he goin turn ova everyting to God, da One dat wen make him be da boss fo everyting. Den God goin stay in charge a everyting, fo everybody.

²⁹If no was lidat, how come get guys dat go get baptize fo da mahke guys? If da mahke guys no goin come back alive fo shua, how come dey getting baptize fo da mahke guys?

³⁰An us guys, how come we risking our life everytime, if da mahke guys no goin come back alive?

³¹Same ting, every day I stay shua dat I risking my life! But I swear to God, bruddas an sistas, no bodda me if I mahke. I real proud a you guys, you know, cuz I stay tight wit our Boss Jesus Christ, da Spesho Guy God Wen Send.

³²No matta I fight guys dat ack jalike wild animals Efesus side, dass okay! But if I ony do um all by myself, an not fo God, wase time, you know. If da peopo dat mahke no goin come back alive, den mo betta us guys figga jalike da peopo talk, “Eh! Eat plenny! Drink up! Cuz tomorrow we all goin mahke die dead!”.

³³Eh! No go tink da wrong ting lidat! Jalike dey tell, “You hang out wit da bad kine guys, dat going mess you up from being one good guy!”

³⁴Wise up! Make like you suppose to! Stop doing da bad kine stuff! Cuz even get some peopo dat donno God, you know. I talking lidis fo make you guys shame.

³⁵But somebody goin aks, “How da mahke guys goin come back alive bumbye? Wat kine body dey goin get?”

³⁶You aks lidat, fo shua you not tinking. Wen you plant one seed, da seed gotta mahke first, yeah? Ony afta dat, can come alive an grow.

³⁷Wen you plant um, you not planting someting dat look like da ting dat goin grow, yeah? You plant da dry seed, wheat seed o some odda kine seed.

³⁸But God, he da One dat make da seed, an he figga wat da plant goin look like wen come up. Every diffren kine seed, wen start fo grow, goin look diffren.

³⁹Jus cuz you call plenny kine tings “one body,” dat no mean dey all da same kine ting. Da peopo, dey get one kine body. Da animals, dey get one nodda kine. Da birds, one nodda kine. Da fishes, one nodda kine.

⁴⁰An get diffren kine tings inside da sky an inside da world. Da tings inside da sky, dey stay awesome, but dey diffren den da tings inside da world. An da tings dat get body hea inside da world, dey all awesome too, but dey diffren den da tings inside da sky.

⁴¹Da sun awesome, but not same kine awesome jalike da moon. An da moon stay awesome, but not jalike da stars, yeah? An da stars, dey awesome too, but diffren kine awesome. An da way one star shine, one nodda star shine diffren, but all stay awesome still yet, yeah?

⁴²Wen da mahke guys come back alive, same ting goin happen jalike wit da seed, you know. Dey put da guy's body inside da groun an he come rotten. But wen da guy come back alive, he no goin mahke eva!

⁴³Wen dey put da dead body inside da groun, ony ugly. But wen da guy come back alive, he goin be awesome! Wen dey put da body inside da groun, da guy no can do notting. But wen he come back alive, he goin be strong awready!

⁴⁴Befo dey put da dead body inside da groun, was one guy dat can ony tink an feel, yeah? But afta he come back alive, goin be God's Spirit dat make da guy live fo real kine! Get peopo dat can ony tink an feel, you know, an get peopo dat get real kine life from God's Spirit. An dey get diffren kine bodies.

⁴⁵Dis wat da Bible wen say befo time: Da first guy dat was jalike us guys was Adam. He “wen come alive an he wen tink an feel.” But da last Adam kine guy is Christ. He get one spirit inside him dat can make odda peopo come alive fo real kine too.

⁴⁶First ting, get da guy dat can ony tink an feel. Den latas, get da guy dat get da real kine life from God's Spirit.

⁴⁷Da first guy Adam wen come from da groun. God wen make him from da dust. Da odda guy Christ, he wen come from da sky.

⁴⁸An us guys dat come from da dust, we jalike dat odda guy Adam dat God wen make from da dust. But da peopo dat stay tight wit God in da sky, dey stay jalike da Christ guy dat wen come from da sky.

⁴⁹Us guys, right now we look jalike da Adam guy dat God wen make from da dust. Bumbye, we goin come jalike da Christ guy dat come from da sky, too.

⁵⁰Eh bruddas an sistas! Let me tell you guys someting. Peopo wit blood an bones inside, not nuff fo come God's kids an get him fo dea King! Peopo wit body dat goin come rotten, dey no can handle da good kine stuff dat no goin come rotten eva.

⁵¹So, lissen up! I like tell you guys one ting dat was secret befo time! From all us guys, get some guys dat no goin mahke! But all us guys, we all goin come diffren!

⁵²Dis all goin happen real fast, mo fast den you can blink yoa eye. Goin happen bumbye, wen time fo blow da last trumpet. Goin get da noise from da trumpet. Right den, da mahke guys goin come back alive. No way dey goin mahke an come rotten one mo time! Same ting wit us guys, we all goin come diffren.

⁵³All dis stuff dat goin come rotten, gotta come diffren kine, so bumbye no come rotten one mo time. Dis body dat can mahke now, gotta come diffren kine, so no can mahke eva again!

⁵⁴Dat time, wen da body dat can come rotten now, goin come diffren kine, an no goin come rotten eva again! Da body dat can mahke now, goin come diffren kine, an no goin mahke eva again! Dat time, goin happen jalike da Bible wen say befo time: “We no goin mahke no moa, Cuz Christ, he da winna ova dat!” an

⁵⁵“Da Devil dat like make us guys mahke, He wen lose awready! We no goin cry inside, Cuz da Devil no can zap us guys mahke no moa!”

⁵⁶How come he can zap us guys now an we mahke? Cuz we wen do da bad kine stuff, az why. An how come da bad kine stuff we do, get plenny power lidat? Cuz God's Rules show dat da bad kine stuff stay plenny wrong, az why.

⁵⁷But now, everyting stay diffren! All us guys like tell God, “Mahalo plenny!” He wen make us guys da winnas ova da bad kine stuff, cuz our Boss Jesus Christ, he da winna fo real kine!

⁵⁸So den, bruddas an sistas, my good friends. Stand strong an solid. No let notting shake you guys up. You guys stay working fo da Boss awready, so den, go do mo an mo plenny good kine stuffs fo him everytime. You guys know dis: Wen you guys stay tight wit da Boss, no matta you work hard an sweat plenny, no goin be wase time!