Read Hawaii Pidgin 1 Corinthians 4 Bible Online

1 Corinthians 4 - Hawaii Pidgin bible

1 Corinthians 4

¹So den, tink bout us guys lidis: We Christ's helpas. God wen make us guys fo take care his stuff dat was secret befo time.

²Da guy dat goin take care his boss's stuffs, he gotta be da kine guy dat goin do wat he suppose to.

³No bodda me wat you guys tink bout da stuff I doing, o wat da odda peopo tink. I no even ack like one judge fo my own self.

⁴My heart tell me I okay, but dat no mean I okay. Da Boss, he da Judge fo wat I do.

⁵So, no make like you guys stay da judge fo odda peopo. Wait till da Boss come back. He da One goin bring out in da light, all da bad kine stuff da peopo try hide in da dark. He goin show all da tings dat dey tinking inside dea heart. Den God goin talk good bout da good tings everybody wen do.

⁶Bruddas an sistas, I wen talk bout me an Apollos, jalike I draw picha fo help you guys learn dis one ting from us guys: Ony do wat da Bible tell. If you guys learn dat, den you guys no goin talk big cuz you stay tight wit one a us guys an you make like da odda guy notting.

⁷So, wat? You guys tink you diffren from all da odda peopo? Everyting you guys get, God wen give um to you. So den, wen you guys get da stuffs, how come you guys ack all big head, jalike you guys wen get um by yoaself?

⁸So! You guys tink you get everyting you need awready! Jalike you guys rich, aah? You guys ack big, jalike kings, an us guys not! Fo shua, I like you guys come kings fo real kine, so us guys can come kings wit you guys too!

⁹Us guys dat God wen send all ova da place fo tell peopo bout Christ. I tink bout us guys lidis: God wen put us guys at da end a da line, jalike prisonas ready fo mahke. We jalike one show fo da peopo inside da world, an fo da angel messenja guys too.

¹⁰Peopo tink we stupid cuz we Christ's guys, but dey tink you guys mo smart cuz you stay tight wit him him! Us guys no stay strong, but you guys stay plenny strong! Peopo get respeck fo you guys, but dey no mo respeck fo us guys.

¹¹Even now we stay hungry, but we still no mo food, an no mo notting fo drink. We ony get puka kine clotheses. Peopo beat us wit sticks. We no mo place fo stay.

¹²Eh, we work hard wit our hands. Wen dey talk any kine to us, we tell um, “We like God do good tings fo you guys.” Wen dey bus us up an make us suffa plenny, we still hang in dea.

¹³Wen dey talk stink bout us, we talk good to dem. Dey tink us guys pilau. We jalike da rubbish from da world dat dey like throw way.

¹⁴Eh! I no write dis fo make you guys shame, but cuz I get love an aloha fo you guys jalike you my kids. Dass why I telling you guys dat you guys get problem.

¹⁵Get uku plenny guys dat teach you guys cuz you stay tight wit Christ. But you guys get ony one fadda, dass me! I stay tight wit Jesus Christ, dass why I wen tell you guys da Good Kine Stuff From God first time, an you guys wen go trus um. Az why I jalike you guys fadda.

¹⁶So I beg you guys fo make jalike me.

¹⁷So az why I stay send Timoty fo help you guys. I love him jalike he my own boy. He one guy I trus, cuz he stay tight wit da Boss too. He goin help you guys fo rememba da way I do everyting cuz I stay tight wit Jesus, God's Spesho Guy. Dass jalike how I stay teach da peopo dat come togedda fo church all ova da place.

¹⁸But some a you guys ack big head, cuz you tink I no going ova dea by you guys.

¹⁹But if da Boss like, I goin come Corint side soon. Den I goin find out if dese guys dat ack big head ony mout, o if fo real dey get power!

²⁰Cuz God stay King, an he not ony mout. He get da real kine power.

²¹So, wat you guys like? I come ova dea scold an punish you? O come ova dea, an give you guys love an aloha an no make presha?