Read Hawaii Pidgin 2 Corinthians 6 Bible Online

2 Corinthians 6 - Hawaii Pidgin bible

2 Corinthians 6

¹Cuz us guys stay work togedda wit God, we like give you guys good words: No let all da good kine stuff God wen do fo you guys stay fo notting.

²God wen say dis inside da Bible, “I wen hear you at da right time. I wen kokua you, da time I like get you outa da bad kine stuff.” Eh, lissen! Now da right time fo God get you outa da bad kine stuff you stay in!

³Us guys no like make anybody any kine, so nobody can talk stink bout da tings we do fo God.

⁴But everyting we do, cuz we God's worka guys, we like show da peopo dat we okay. We can handle, no matta dey give us trouble, you know. We get hard time. We get plenny presha.

⁵Dey bus us up an throw us inside da jail. Everybody make big noise an fight bout us. We work hard. No mo nuff sleep, an no mo nuff food, an we stay hungry.

⁶Our hearts stay clean. We know plenny from God. We no mind wait fo our bruddas. We kokua da peopo. God's Spesho Spirit, he stay in charge a us. We give plenny love an aloha to da peopo, an we no ack.

⁷We tell da trut an we no bulai. God give us guys da power fo do all da right kine stuff. Dass jalike we army guys, an our boss give us everyting we need fo fight da bad guy an fo no let him wipe us out.

⁸Get peopo who show plenny respeck fo us, an odda peopo who make any kine to us. Get peopo who talk stink bout us, an odda peopo who talk good kine stuff bout us. Get peopo who say we bulai, but no matta, we fo real.

⁹Some peopo donno who us, but odda peopo know who us. We litto mo mahke, but eh, we alive still yet. Dey punish us plenny, but den we still no mahke.

¹⁰We stay sad inside, but same time we everytime feel good inside. We no mo money, but den, we making plenny peopo rich inside. Jalike we no mo notting, but we still yet get everyting.

¹¹You guys inside Corint, we talking strait to you guys. We get plenny aloha fo you guys.

¹²We wen give you guys our love an aloha, but you guys no give us yoa love an aloha.

¹³Now I goin talk to you guys jalike you my kids. Give us yoa love an aloha, jalike how we wen give you guys.

¹⁴No stay wit da kine peopo dat no trus God. Cuz da peopo dat do da right kine stuff, an da odda peopo dat stay agains God's Rules, dey no goin work togedda. Da good kine peopo an da bad kine peopo no can stay tight wit each odda.

¹⁵Christ an da Devil no can tink togedda da same way. Da guy dat trus God an da guy dat no trus him no can work togedda.

¹⁶You guys tink you can go da temple fo pray to God, an same time you guys go in front da idol kine gods fo pray to dem? No way! Cuz da God dat stay alive fo real kine, he stay in charge a us guys, jalike we da temple wea he stay inside. God wen say inside da Bible, “I goin make house wit my peopo An walk aroun wit dem. I goin be dea God An dey goin be my peopo.”

¹⁷Az why da Boss say inside da Bible, “Dass why you gotta come out from dem An no be like dem. Stay away from da tings dat make you so you no can pray. Den I goin take you in.

¹⁸I goin be yoa Fadda, An you goin be my kids.” Dass wat da Boss wen say, da One Dat Get All Da Power.