Read Hawaii Pidgin 2 Corinthians 8 Bible Online

2 Corinthians 8 - Hawaii Pidgin bible

2 Corinthians 8

¹My bruddas an sistas, we like you guys know da plenny good tings God wen do fo da church peopo dat come togedda fo him all ova Macedonia.

²Dey had real hard time an wen suffa plenny, but still yet dey stay real good inside. Dass why, no matta dey no mo notting, dey still yet wen give plenny money wit dea good heart fo da Jerusalem church peopo.

³I tell you guys dat dey wen like give all dey can, an even moa. An dey wen do um. No was cuz somebody tell um dey gotta.

⁴Dey wen beg us plenny fo let um help give money fo kokua da peopo dat stay spesho fo God, Jerusalem side.

⁵Dey neva do ony like we wen tink dey goin do -- dey wen do plenny moa! First ting, dey wen give demself to da Boss Up Dea, an dey wen say, “We like give ourself fo do wat you guys like, cuz dass wat God like.”

⁶Befo time, Titus wen start tings fo help you guys, so dat you can kokua God's peopo dat get hard time. So we wen tell him fo help you guys some moa, so you guys can pau dis spesho job.

⁷You guys stay do good job, how you guys trus God, how you guys talk, da stuff you guys know, how you guys go all out fo do all da tings you guys do, an da plenny love an aloha dat you guys get fo us guys. Az why I like fo you guys do good job fo dis ting too: give plenny to da odda church peopo dat come togedda fo God.

⁸I not telling you guys wat fo do, but I like see if you guys get plenny love an aloha fo real kine, an go all out, jalike da Macedonia church guys.

⁹You guys know dat our Boss Jesus Christ wen do plenny good tings fo you guys. Befo time he was rich, but he wen come poor fo help you guys, so dat you guys can come rich.

¹⁰Last year you guys wen like start fo help. You guys not ony wen give money, but you guys wen give from yoa heart. Dis wat I tink stay good fo you guys fo do:

¹¹Give da rest a da money now. I know you guys wen like help out da peopo dat stay spesho fo God Jerusalem side. So do um awready, from wat you guys get.

¹²If you guys like kokua, wateva you give, az okay, if you guys give wat you can, not wat you no can.

¹³I no mean dat you guys get all da presha, an da odda guys no mo presha. We like everybody be same same.

¹⁴Right now you guys get plenny money, an you guys can kokua da odda peopo. Bumbye dey goin get plenny money, an dey goin kokua you guys. Den everybody goin be same same,

¹⁵jalike da Bible wen say befo time, “Da peopo dat wen pick up plenny, Dey neva have mo plenny den dey need. An da peopo dat wen pick up litto bit, Dey neva need mo plenny.”

¹⁶But I tank God, cuz he wen make Titus like go all out fo help you guys, jalike me.

¹⁷Titus wen like do wat we wen aks him fo do, an he going all out fo go by you guys ova dea. I neva need fo tell him. He wen tink fo go by himself.

¹⁸We goin send one brudda wit Titus. All da church guys talk good bout him, cuz he work hard fo tell peopo da Good Kine Stuff From God.

¹⁹An da church guys wen pick him fo go wit us fo do dis good ting fo da peopo dat need help. We do um fo show how awesome da Boss Up Dea stay, an cuz we really like kokua dem guys ova dea.

²⁰We tink hard fo do um da right way, so dat nobody can talk any kine bout da way we goin carry all dis money ova dea Jerusalem side.

²¹We tink hard how fo do da right ting, not ony in front da Boss, but in front da peopo too.

²²So, our brudda we sending wit da guys dat goin carry da money, we wen check um out plenny times an plenny ways awready, an we know dat he goin go all out fo you guys. An now he going all out even moa, cuz he know you guys goin do da right ting.

²³My brudda Titus everytime stay work wit me fo you guys. An da diffren peopos from all ova da place dat come togedda fo God, dey wen pick dese odda bruddas fo carry da money. Titus an da odda bruddas, dey goin help show da peopo how awesome Christ stay.

²⁴So, show all dem guys dat goin carry da money how much plenny love an aloha you guys get. An show um why we talk so good bout you guys. Den da church peopo all ova da place goin know fo shua dat you guys get love an aloha fo dem.