Read Hawaii Pidgin Galatians 5 Bible Online

Galatians 5 - Hawaii Pidgin bible

Galatians 5

¹Christ wen let us go, so we no gotta do wat da Rules say fo get um right wit God. So den, hang in dea an be strong. No let dem buggas pile up all kine rules on top you guys again.

²Lissen! Dis me Paul, talking to you guys. If you guys let dem cut skin an make you guys come Jews, cuz dey tell you guys dat you can get um right wit God lidat, den Christ no goin help you guys, notting.

³Now I goin tell everybody one mo time: Whoeva cut skin so dey get um right wit God, dey gotta do everyting da Rules say fo come good.

⁴You guys dat like do wat da Rules say fo try get um right wit God, you guys wen split from Christ, an make yoaself so you no can get all da good stuff he like do fo you guys.

⁵Us guys, not like you guys. We trus God, dass why we wait fo him fo make us get um right wit him, cuz we know dat God's Spirit goin help us.

⁶Wen we stay tight wit Jesus Christ, no matta cut skin o no cut skin, main ting, we gotta trus God, an show plenny love an aloha fo God an da peopo.

⁷You guys was doing real good. Who wen mess you guys up so you no lissen to da trut?

⁸Dat kine stuff you guys lissen to now, dat no come from da Boss, who wen tell you guys fo come by him an be his guys.

⁹Dat kine stuff dey teach, dat start small an den come big an mess up you guys, jalike litto bit yeast inside da bread dough make da whole bread come big.

¹⁰Cuz I trus da Boss, I shua dat you guys no goin tink anodda way. But da bugga dat stay bodda you guys, God goin punish him, no matta who him.

¹¹Eh, bruddas an sistas, if I still yet wen teach dat we gotta cut skin, den no goin bodda nobody, cuz den Jesus neva need mahke on top da cross. So if I wen teach lidat, den how come dem buggas make me suffa? Cuz I stay teach dat Jesus wen mahke so peopo can come right wit God. An dat bodda dem buggas.

¹²Dem buggas dat stay bodda you guys fo go cut skin, why dey no go chop um all off?!

¹³Eh, bruddas an sistas, God wen let you guys go, but dat no mean you can make any kine how you like. Mo betta, kokua each odda, cuz you guys get plenny love an aloha fo each odda.

¹⁴Da Bible say, “Get love an aloha fo da odda guy, jalike you get love fo yoaself.” If you guys do dat, den you goin do everyting God's Rules say.

¹⁵But if you guys go beef wit each odda, an eat up each odda jalike wild animals, den watch out, cuz you guys goin wipe out each odda.

¹⁶But I like tell you guys dis: Stay tight wit God's Spirit, an you guys no goin do da kine stuff you like do jus cuz you peopo.

¹⁷Cuz God's Spirit no can take da kine stuff yoa body like do, an da body no can take da kine stuff God's Spirit like do. Dey stay agains each odda. So den, you guys no can do da kine stuff you like do.

¹⁸So, if you guys lissen to God's Spirit, den you guys no gotta do wat da Rules say fo get um right wit God.

¹⁹Da bad kine stuff dey like do jus cuz dey peopo stay clear: dey like fool aroun anybody, even anodda guy's wife o husban, an do any kine pilau stuff. Dey no shame.

²⁰Dey go down an pray in front da idol kine gods. Dey put kahuna on top odda peopo. Dey hate odda peopo. Dey like make argue. Dey no like if da odda guy mo importan den dem. Dey get huhu. Dey ony tink bout demself. Dey everytime tink diffren an like split up da bruddas an sistas.

²¹Dey like get da odda guy's stuffs. Dey everytime get drunk an party up, an all dat kine stuff. I telling you guys, jalike I wen tell you befo time, da peopo dat make lidat, dey no goin get God fo be dea King.

²²But if we stay tight wit God's Spirit, he give us plenny love an aloha fo everybody. He make us guys stay good inside. He make our hearts rest inside. He help us wait fo da odda guy an stay cool. He help us tink good bout da odda peopo, an like do good kine stuff fo dem. He help us do wat we promise.

²³He help us make nice to peopo an do um wit good kine heart. He help us stay in charge a ourself. No mo rules dat say you no can do all dat kine stuff.

²⁴Everybody who Jesus Christ's guy, dey no goin do all da kine bad stuff dey like do jus cuz dey peopo. Jalike dey wen put all dat kine stuff on top da cross wit Jesus Christ, an dat stuff no mo power ova dem.

²⁵If we stay tight wit God's Spirit, den we everytime gotta let him stay in charge a us.

²⁶No get big head. No try make da odda guy beef. No try be mo betta den da odda guy.