Read Hawaii Pidgin Ephesians 4 Bible Online

Ephesians 4 - Hawaii Pidgin bible

Ephesians 4

¹I one prisona guy, cuz I stay tight wit da Boss, an dass why I telling you guys dis. Eh! You know how I like you guys live? Da Boss wen tell you guys fo come be his guys, an dass how you guys gotta live fo real kine.

²Everytime put da odda guy first befo you. Make nice kine to dem. Hang in dea wit each odda. No get huhu wit each odda, cuz you guys get plenny love an aloha fo each odda.

³Go all out fo stay tight wit each odda, cuz God's Spirit wen make you guys stay tight awready. An you guys goin stick togedda, cuz you guys make good wit each odda.

⁴Ony get one peopo dass God's peopo, you know, an one Spirit. God wen tell you guys fo come be his guys, an now ony get one ting you stay waiting fo.

⁵Ony get one Boss. Ony get one way fo trus him. Peopo get baptize fo show Dey stay tight wit ony one Guy.

⁶Ony get one God, He da ony Fadda fo everybody. He stay in charge a everybody. He stay use everybody Fo do wat he like. An he stay by everybody.

⁷You know wat? Christ wen give power to all us guys. Everybody get da kine power fo do wat Christ like um fo do.

⁸Dass why da Bible say, “He wen go up to da high place. He wen fight an win, an take plenny prisonas. An he give plenny stuffs to da peopo.”

⁹Wen da Bible say, “He wen go up,” dass jalike one picha, you know. Dat mean dat Christ wen go all da way down to da earth, an afta, den he wen go up inside da sky.

¹⁰Dat One dat wen go all da way down to da earth, he da same One dat wen go all da way up inside da sky. He wen go mo high den da sky, fo show he da King fo everyting.

¹¹Dass da same One dat wen “give us power.” Dat mean, he wen give power to da church peopo. Some guys, he give um power fo go all ova fo tell peopo bout him. Odda guys, he give um da power fo talk fo him. Odda guys he give da power fo tell peopo da Good Stuff bout him so dey can trus him. An odda guys, he give um da power so dey can teach his peopo an take care dem jalike da sheep farma guys take care dea sheeps.

¹²Christ give um dat kine power so all da peopo dat stay spesho fo him can be ready fo work fo him, an do stuff fo help odda peopo. Den all Christ's peopo goin come mo strong. Cuz we Christ's peopo, you know.

¹³Den bumbye we all goin trus Christ togedda da same way. Togedda we goin know God's Boy fo real kine. Togedda we goin come jalike one grown up guy, da kine guy dat stay perfeck inside, jalike Christ.

¹⁴Get guys dat like teach us guys all kine stuff fo bulai us, an dey sly buggas. But we no goin lissen dem. We no goin be jalike small kids dat believe any kine. We no goin be jalike one boat dat da waves push all ova da place, an da wind go blow um hea an dea.

¹⁵Mo betta dis: us guys tell da trut everytime wit love an aloha. An we goin come jalike grown up guys in everyting -- fo us come jalike Christ. Cuz he jalike da head an us guys jalike da body.

¹⁶Christ make us guys get love an aloha fo each odda, jalike get tings inside our body dat make all da parts work togedda good. Az why, da whole body can grow up an come strong jalike suppose to, you know.

¹⁷I like tell you guys dis, an I get da right fo say um, cuz I da Boss's guy: Stop making jalike da odda kine peopos all ova da world dat donno God. How dey live, dey ony stay tinking stuff dat wase time.

¹⁸Dey ony hard head, so dey donno notting. Dey no undastan notting, jalike dey trying fo see inside one dark place an no can. Dass why dey no stay close to God, an dey cut off from God.

¹⁹Dey no mo shame. Dey go buckaloose fo do any kine ting dea body like. So dey do all kine pilau stuff, an dey no like stop. Dey ony like do um mo an moa.

²⁰But you guys, wen you guys wen learn bout Christ, you guys neva learn fo make lidat!

²¹Fo shua you guys wen hear bout Christ, an dey wen teach you guys da true stuff dat ony Jesus get, cuz you his guys.

²²Dey wen teach you guys dis: No make like how you guys was befo time, wen you guys wen ony like do da kine stuff dat goin bulai you guys an mess you guys up. Dat ony goin make you guys come all pilau inside.

²³But let God make you guys come all new kine inside, how you feel an how you tink.

²⁴You guys gotta start fo live da new kine way. God wen make dat new kine life so you guys can come jalike him. Den you guys goin be fo real an be good an spesho fo God, an live da true way.

²⁵Kay den. No bulai no moa. All you guys gotta tell each odda da trut, cuz we all stay jalike da same ohana.

²⁶If you guys huhu, no go do bad kine stuff cuz a dat. No stay huhu. No good da sun go down an you guys still yet stay huhu, you know.

²⁷An no let da Devil get one chance fo jam you guys up.

²⁸Whoeva steal stuffs gotta stop. Now dey gotta work hard fo do good kine stuff wit dea hands. Den dey can give stuffs to da peopo dat need um.

²⁹No go talk pilau kine stuff notting. But weneva you talk, say good kine stuff dat goin help da peopo dat lissen, an make um come mo strong inside. Cuz dey need fo hear da kine stuff dat goin do good fo um.

³⁰No go do notting dat goin make God's Good an Spesho Spirit come sore inside. Cuz God's Spirit stay in charge a you guys, an dat show proof dat you guys God's peopo, an dat show dat bumbye he goin cut loose you guys from da power dat da bad kine stuff get ova you guys.

³¹No make like da kine peopo dat wen had it wit somebody an no like let um go. No get hot an snap. No stay huhu. No make big noise. No talk stink. Wipe out all dat kine stuff, an no hate nobody no moa.

³²Mo betta, make nice to each odda. Show pity an aloha to each odda. Let each odda go, jalike God wen let you guys go, cuz a wat Christ wen do.