Read Hawaii Pidgin 1 Thessalonians 1 Bible Online

1 Thessalonians 1 - Hawaii Pidgin bible

1 Thessalonians 1

¹Dis letta from Paul, Silas, an Timoty. We writing um fo you Tessalonika church peopo dat stay tight wit God our Fadda an wit Jesus Christ da Boss. Us guys like God do plenny good kine stuff fo you guys, an make yoa hearts stay rest inside.

²Every time us guys go pray, we talk to God bout all you guys, an we say, “Mahalo plenny, God, fo da church peopo Tessalonika side!”

³We no foget da way you guys do all kine stuff cuz you trus Christ, an da way you guys work real hard cuz you get love an aloha fo him, an da way you guys hang in dea cuz you stay shua dat our Boss Jesus Christ goin come back. An God our Fadda, he know all dis stuff too, cuz he see everyting you guys do.

⁴Eh, bruddas an sistas! We know dat God get love an aloha fo you guys, an he wen pick you guys fo be his peopo.

⁵Dat time us guys wen tell you guys da Good Kine Stuff From God, was mo den jus talk, you know. Da Good an Spesho Spirit from God wen give us guys plenny power, an make us guys know fo shua dat da stuff we telling you was fo real. You guys know wat us guys really was like wen we wen stay wit you guys. An we wen make lidat, cuz we get plenny aloha fo you guys, az why.

⁶An you guys wen start fo copy how us guys do, an how da Boss do. You guys wen trus da tings we wen tell you guys. An no matta you guys stay suffa plenny, God's Good an Spesho Spirit wen help you guys stay good inside.

⁷So den, wen da peopo Macedonia an Akaia side dat stay trus Christ wen find out how you guys wen ack, dey wen start fo ack lidat too.

⁸Cuz a dat, not ony da peopo Macedonia an Akaia side wen hear da Good Stuff bout da Boss, but all ova da odda places peopo wen hear dat you guys stay trus God. So us guys no need say notting moa.

⁹All dose peopo stay telling dat you guys wen take us in wen we wen go by you guys first time, an dat you guys wen throw out da idol kine gods an wen trus da God dat stay alive an stay fo real, an you go work fo him.

¹⁰Dey tell how you guys stay waiting fo God's Boy Jesus fo come back from da sky. God wen make him come back alive afta he wen mahke, an he da One dat goin make shua dat notting bad goin happen to us, wen da time come fo God show da peopo dat he no take da bad kine stuff dey doing!