Read Hawaii Pidgin 2 Thessalonians 1 Bible Online

2 Thessalonians 1 - Hawaii Pidgin bible

2 Thessalonians 1

¹Dis anodda letta from Paul, an Silas, an Timoty. We writing um fo you guys dat come togedda fo church Tessalonika side. You guys stay real tight wit God our Fadda an Jesus da Boss, da Spesho Guy God Wen Send.

²I like dem do plenny good stuffs fo you guys, an make yoa heart rest inside.

³Eh bruddas an sistas, we jus gotta tell God “Mahalo plenny!” everytime cuz a you guys. Az right we do dat, cuz you guys stay trus God plenny mo an moa, an cuz you guys stay showing mo an mo love an aloha fo each odda.

⁴Dass why we talk big bout you guys to all God's peopo dat come togedda fo church, all ova. We tell um how you guys hang in dea an stay trus God, no matta da odda peopo make you suffa plenny an make any kine to you guys.

⁵All dis show dat God judge da right way. Az why he goin make you guys da right kine peopo, so he no shame fo say, "You my guys, an I yoa King." You guys know how come you stay suffa now? Cuz you da King's guys, az why.

⁶God goin do da right ting, you know. Da peopo dat make you guys suffa now, God goin make dem suffa bumbye.

⁷Plus, God goin take away da presha, an same ting fo us guys too. All dat goin happen bumbye, wen God let peopo see da Boss Jesus coming from up dea in da sky wit his angel guys dat get plenny power.

⁸Goin get big fire, dat time. God goin punish da peopo dat donno him, an no like lissen to da Good Stuff Bout Our Boss Jesus.

⁹God goin punish dem, an wipe dem out to da max foeva. Dat mean, no way dey can stay wit da Boss. No way dey eva goin see da awesome kine tings he get da power fo do.

¹⁰All dat goin happen wen our Boss Jesus come back. Dat time, everybody goin know how awesome he stay, cuz he goin stay tight wit da peopo dat stay spesho fo him. An all da peopo dat wen trus him, dey goin say, "Wow!" Same ting goin happen fo you guys, cuz you guys wen trus da stuff we wen tell you bout him.

¹¹Dass why us guys pray everytime fo you guys, dat dis stuff goin happen. Our God wen tell you guys awready, “Come! Be my guys!” Dass why we stay aks God fo make you guys da right kine peopo so you can do wat he like. We pray fo God's power fo help you guys do all da good kine stuff you like do cuz you guys stay trus him.

¹²Den, wen you guys make lidat, everybody goin say good tings bout our Boss Jesus, cuz dey goin know how awesome he stay. An cuz a him, dey goin say good tings bout you guys too. All dat goin happen cuz our God, an da Boss Jesus, God's Spesho Guy, dey like do plenny fo you guys.