Read Hawaii Pidgin 2 Timothy 1 Bible Online

2 Timothy 1 - Hawaii Pidgin bible

2 Timothy 1

²(1-2) Timoty, dis letta fo you, from me, Paul. You know Jesus Christ, da Spesho Guy God Wen Send -- he da One dat wen send me all aroun fo tell peopo bout him. He send me cuz he wen make promise dat peopo can come alive fo real kine, if dey stay tight wit Jesus Christ. An he wen send me all ova fo tell um dat, cuz dass wat God like me do. I get real plenny love an aloha fo you, jalike you my own boy! God da Fadda, an Jesus Christ our Boss, I like dem do plenny good tings fo you, an give you chance, an make yoa heart stay rest inside.

³Wen I pray, I tell God “Mahalo plenny!” everytime I tink bout you, day time an nite time. I stay work fo God, same ting jalike my ancesta guys wen do, an inside my heart, fo shua I know I doing good tings.

⁴Fo real, I like see you, you know, so I can feel good inside -- cuz I rememba how sad you was befo, dat you wen cry plenny, dat one time.

⁵I rememba dat time you wen trus God. Was fo real kine, an you neva ack. Yoa granma, Tutu Lois, was da first one dat wen trus God lidat, an den, yoa mudda Eunice, an now, I shua you stay trus God lidat too.

⁶Az why I like tell you dis: Dat time I wen put my hands on top you an pray, God wen make you so you can work fo him. So now, go all out fo do um!

⁷Cuz you know, da Spirit dat God wen send fo take ova us guys, dat not da kine Spirit dat make us stay scared everytime. He wen send da kine Spirit fo take ova us guys, fo make us come strong, an get love an aloha, an know how fo stay in charge a everyting we do.

⁸So den. No feel shame wen you tell wat you know bout our Boss! An no feel shame fo me cuz I stay in jail. I stay dea cuz I da Boss's guy. Mo betta, wen you tell da Good Kine Stuff From God, stay ready fo suffa jalike all us guys. Wen you tell da Good Kine Stuff From God, an suffa, God make you strong.

⁹Eh! God wen take us outa da bad kine stuff. He wen tell us fo come an be all out fo him. Az not cuz us guys was doing good kine stuff, you know, But cuz he wen make one plan, An he like do good tings fo us guys. He wen do all dat fo us befo da world wen start, Cuz he know we goin stay tight Wit his Spesho Guy Jesus Christ.

¹⁰But now God stay show us guys his plan, An how he like do good tings fo us guys. We wen find out all dat Cuz Jesus Christ wen show up hea an us guys wen see him. He da One dat take us outa da bad kine stuff. Cuz a Christ, we no goin mahke no moa! Christ wen tell us da Good Stuff Dat say he goin make our body diffren kine Dat no goin mahke o come rotten, But goin stay alive fo real kine, foeva!

¹¹God wen make me one messenja guy fo tell da Good Stuff From God. He wen send me all aroun fo teach.

¹²Az why I gotta suffa, you know. But no matta! I no mo shame fo suffa. I know Jesus, dass why. He da One I trus. I know dis fo shua: he wen give me one big job fo do, an he stay trus me fo do um da right way. An I can do um, cuz Jesus get da power fo take care everyting till da end come.

¹³Everyting I wen tell you guys befo time, was fo real, you know. I wen tell you da importan stuffs, an you know how fo teach um da right way. So wen you doing all dis, trus God, an show love an aloha, cuz you stay tight wit God's Spesho Guy Jesus Christ.

¹⁴Take care all da good kine stuffs Jesus wen give you fo teach. God's Good an Spesho Spirit goin help you fo take care all dat, cuz he stay in charge a all us guys.

¹⁵You know awready, dat Fygelus, an Hermogenes, an odda guys too from Asia, wen change dea mind an bag from me.

¹⁶But all da peopo from Onesiforus ohana, I like da Boss do good tings fo dem, cuz plenny times dea leada guy Onesiforus wen come by me an make me feel like I new inside, an he neva come shame cuz I one prisona guy.

¹⁷Da guy even wen go Rome, an right away he wen look all ova da place fo me, an he wen find me.

¹⁸Plus, all da stuffs he wen do Efesus side fo help me, you know dat mo betta den me. Bumbye wen da Boss come back, I like him do plenny good tings fo Onesiforus.