Read Hawaii Pidgin 2 Timothy 2 Bible Online

2 Timothy 2 - Hawaii Pidgin bible

2 Timothy 2

¹Eh, Timoty my boy! You gotta be strong inside, you know! You stay tight wit da Spesho Guy God Wen Send, Jesus Christ, an he stay do good tings fo you, so you can come strong inside.

²You wen hear plenny kine stuffs from me, an had plenny odda peopo dea too, dat wen hear everyting I tell you. Now, you gotta go find peopo dat you can trus, an den, put dem in charge a all dat stuff. I mean, pick peopo dat can teach odda peopo da same tings I wen teach you.

³You gotta suffa any kine bad kine stuff, jalike all us guys, cuz you jalike one army guy fo Jesus Christ, an you really like do good job lidat.

⁴Anybody in da army, dey no do all da regula kine stuff da odda guys do dat not army guys. Da army guys, dey ony do wat dea army leada guy tell um fo do, fo make him stay good inside.

⁵Same ting, jalike if one guy like win one race, he no can win if he no do wat da rules say.

⁶An one mo ting, da farma guy dat do all da hard work, he da guy dat suppose to get his share first.

⁷Tink hard bout wat I telling you. Cuz da Boss, he goin make shua you undastan everyting I say.

⁸So tink plenny bout Jesus, da Spesho Guy God Wen Send. He da One dat wen come from King David ohana. God wen make him come back alive, afta he wen mahke. An dass da Good Kine Stuff From God dat I stay telling everybody.

⁹Wen I tell peopo dis, dey make me suffa. Sometimes dey even tie me up wit chains jalike I one crook. But you know wat? No can tie up da stuff God say wit one chain!

¹⁰Dass why I stay hanging in dea wen dey do any kine to me -- cuz I like help da peopo God wen pick. If I do dat, den dey goin come tight wit Jesus Christ, an God goin take um outa da bad kine stuff dey stay in, an he goin make um come awesome jalike him foeva.

¹¹You can trus me wen I tell you dis: “If us guys mahke wit Christ, We goin live to da max wit him.

¹²An if us guys hang in dea, We goin come kings wit Christ da King. But if we say, ‘We donno Christ!’ Den he goin say, ‘I donno dem guys!’

¹³Even if us guys give up wen God stay trus us, God, he everytime goin do wat he say. He no goin ack like he not God.”

¹⁴Da church peopo ova dea by you, dey know all dis awready, but you gotta tell um, ova an ova. You gotta tell um serious kine, jalike dey in front God. Tell um, no make argue, cuz dat no help nobody. Ony jam up da peopo dat lissen.

¹⁵Mo betta you go all out, so wen God tink bout you, he know you fo real, cuz you do good job. He know you one worka guy dat no need feel shame, cuz you teach wass true, an you teach um da right way.

¹⁶Az why, wen odda guys tell wase time kine stuff dat make like God no matta, you betta get outa dea. How dey talk, make you mo far way from God.

¹⁷Da tings dey say make everyting come all pilau. Hymeneus an Filetus, dey talk lidat, an get odda guys dat talk jalike dem.

¹⁸Dem guys wen go away from da true stuff. Dey say, “Da mahke guys, dey wen come back alive awready.” Dey mess up some peopo, an den dose peopo no like trus God no moa.

¹⁹But you know wat? Da stuff God stay doing stay solid, jalike one building dat get solid foundation undaneat an no can move, yeah? An on top dat foundation, get one sign dat say two tings. One side say, “Da Boss, he know all his peopo.” An da odda side say, “Anybody who say, ‘I da Boss's guy,’ Dey gotta stop doing everyting dat no stay right.”

²⁰You know, inside one big house, get all kine bowls an plates. Some, dey make um wit gold an silva fo spesho time. Get some odda bowls an plates, dey make um wit wood an clay fo use um fo junk kine stuff.

²¹So, dass jalike if anybody go clean up da pilau kine stuff inside dea heart, dey goin come jalike da spesho kine bowls an plates -- dey goin be spesho fo God. Da Boss can use um, an dey stay ready fo go do any good kine stuff fo him.

²²Eh Timoty! Watch out! No be like da younga guys, da way dey jam up cuz dey like do any kine stuff. Mo betta, you go all out fo do da right ting everytime, fo trus God, fo get love an aloha, an fo let yoa heart rest inside. All da peopo dat tell God dey his guys, an get clean heart inside, dey like do da right ting everytime -- so you gotta make jalike dem.

²³But no get mix up wit all da kine stupid talk from da guys dat donno notting. Dey ony like make argue bout everyting. You gotta figga, if you talk lidat, den you goin stay make argue everytime.

²⁴But wen one guy work fo da Boss, he not suppose to like make argue, you know. He suppose to be friends wit everybody, an be one good teacha, an no stay huhu at da odda peopo.

²⁵Wen peopo talk agains him, he gotta teach um da true stuff, but do um nice. Den God can make dem change dea mind, an make dem so dey can know da trut.

²⁶Den dey can come smart an get outa da trap dey stay in, cuz da Devil wen catch um an make um do wat he like um fo do.