Read Hawaii Pidgin Titus 2 Bible Online

Titus 2 - Hawaii Pidgin bible

Titus 2

¹ Eh, Titus, everytime you talk, make shua you teach da right kine stuff, jalike God's guys wen teach you.

²Tell da older guys inside da church, dat dey gotta stay in charge a demself. Tell um fo be one solid kine guy, so dat da peopo get respeck fo um. Tell um fo be da kine guys dat tink first wen dey do someting. Dey gotta trus God, get love fo God an everybody, an hang in dea.

³Same ting wit da older wahines. Teach dem fo ack da way da peopo dat stay spesho fo God suppose to ack. Tell um, “No talk stink behind da odda guy's back, an no love da booze too much so you gotta drink all da time an no can stop.” Tell um no make lidat, but tell um fo teach ony da good kine tings,

⁴so den dey can teach da younga wahines fo tink how fo show love an aloha fo dea husban an dea kids,

⁵an how fo take charge a how dey live, an how fo be clean inside an no mo bad kine stuff inside jalike God, an how fo take care dea house, an how fo be good kine peopo, an how fo show respeck fo dea husban an let him be da leada. So den, if dey do dis, nobody goin talk bad bout da tings dat God say.

⁶Same ting wit da younga guys inside da church. Go give dem good kine words fo help um fo take charge a how dey live.

⁷Wateva you do, do good kine stuff fo show dem how dey suppose to ack. Wen you teach, make shua wat you say an wat you do say da same ting. Teach from yoa heart, an be one solid kine guy, so dat da odda peopo get respeck fo you.

⁸Da stuff you tell, betta be solid, so dat nobody can say you donno wat you talking bout. Den, if get one guy dat no like wat you say, he goin come all shame, cuz he no can say us guys do bad kine stuffs.

⁹Da slave guys inside da church, tell um dey gotta do everyting dea boss say an no talk back, fo make dea boss feel good inside,

¹⁰an no cockaroach da boss's stuffs. Mo betta dey show da boss he can trus um fo do good job everytime. If da slave guys make lidat, den wen peopo tink bout wat us guys teach, all da kine stuff dat we teach goin look real good, like wen we talk bout how God get us outa da bad kine stuff we stay in.

¹¹How come us guys gotta make lidat? Cuz God wen show everybody he get good heart fo help dem, an dass why he can take everybody outa da bad kine stuff dey stay doing.

¹²Cuz God like do plenny good kine stuffs fo us guys, he teach us fo say, “No way!” to da kine stuff dat God no like, an “Not even!” to da bad kine stuff da peopo inside dis world like do. He teach us fo take charge a how we live, fo do da right tings, an fo do da kine stuff dat he like, hea inside da world nowdays.

¹³Same time us guys stay good inside cuz we wait an trus dat our Boss Jesus Christ goin come back. Goin be awesome. Jesus, he wen take us outa da bad kine stuff we stay do. He God, you know, an he get power ova everyting!

¹⁴He wen give himself fo mahke fo us, so he can cut us guys loose from all kine pilau stuff an from broke God's rules, an make us clean inside. He like make us his own spesho peopo, dat go all out fo do wateva stay good.

¹⁵Eh! All dis stuff, dass da kine tings you suppose to teach. Give um good kine words, an wen somebody do bad kine stuff, show um dat da ting dey wen do stay wrong, cuz you get da right fo tell um. No let nobody tink dey no need lissen.