Read Hawaii Pidgin Hebrews 1 Bible Online

Hebrews 1 - Hawaii Pidgin bible

Hebrews 1

¹Long time ago, plenny times God wen send his talka guys fo talk to our Hebrew ancesta guys. An dey wen tell um plenny tings plenny diffren ways.

²But now, wen everyting stay coming pau, God wen send his Boy fo talk to us guys. His Boy, he da One dat get everyting from his Fadda. Wen God wen make da world an da sky, was his Boy dat wen do da work.

³God's Boy, he show how awesome God stay, Jalike wen da sun shining in da mirror. He stay same same jalike his Fadda, Same same jalike one picha Fo show how da Fadda stay fo real kine. Da tings God's Boy say, get choke power Fo make everyting hang togedda. Afta he wen pau throw out da bad kine stuff da peopo wen do, So dey can come clean inside, He wen go sit down up ova dea in da sky, On da right side nex to God Da Awesome King. Dass da spesho place fo show how importan he stay.

⁴All da angel messenja guys up dea in da sky, dey importan. But God's Boy mo importan den dem. God wen give his Boy everyting dat God get. God wen even give his Boy his own name. Dass someting he neva give da angel guys.

⁵You know, God no talk to da angel guys how he talk to his Boy. He tell his Boy, “Today I tell Dat you my Boy!” An anodda place inside da Bible God tell, “I his Fadda, An he my Boy.”

⁶Wen God wen go bring his Numba One Boy inside da world, he say, “I like all my angel messenja guys Fo go down an give my Boy plenny love an respeck.”

⁷Dis wat God say bout da angel guys: “I make my angel messenja guys jalike da winds. I make da angel guys dat work fo me jalike da fire.”

⁸But God talk to his Boy lidis: “My Boy, you God. Yoa throne goin stay foeva. Da spesho stick you hold in yoa hand fo show dat you da King, Dat mean you da King dat everytime do da right ting.

⁹You stay plenny good inside wen peopo do da right ting, An wen peopo broke da Rules, you no take dat. Az why you da one I wen pick from all da guys dat stay by you. Az why I wen put olive oil on top yoa head fo show dat you da King, An you feel good inside.”

¹⁰An God say dis too: “My Boy, you stay da Boss. From da start, You wen make da earth an da sky, Wit yoa own hands.

¹¹Da earth an da sky goin get wipe out. But you, you goin stay foeva! Da earth an da sky goin come old, Jalike da kine old clotheses.

¹²You goin throw out da earth an da sky, Jalike puka kine clotheses. An you goin change um, Jalike wen peopo put on da odda kine clotheses. My Boy, you still stay da same jalike befo. You neva goin mahke!”

¹³God neva say dis to da angel guys, but den he wen tell dis to his Boy: “Come ova hea, sit down! Dis da importan place by my right side. Bumbye I goin make da peopo dat go agains you Go down in front you, Fo show dat you da winna ova dem.”

¹⁴All da angel guys, dey da good spirits dat work fo God. He send um all ova fo help da peopo come outa da bad kine stuff dey stay doing, cuz dose peopo his kids.