Read Hawaii Pidgin Hebrews 10 Bible Online

Hebrews 10 - Hawaii Pidgin bible

Hebrews 10

¹Da Rules ony jalike one shadow, dey not even jalike one good picha a da good kine tings dat goin happen bumbye. Da Rules not da real ting. Dass why da Rules no can eva make perfeck da peopo dat like come tight wit God fo go show him love an respeck. No matta dose peopo go make sacrifice every year, jalike da Rules tell.

²Cuz if da Rules wen make dem perfeck, fo shua dey pau make sacrifice, cuz no need, yeah? Cuz den da peopo dat go show God love an respeck lidat, dey goin come clean inside from dat time, an dey no goin feel shame no mo fo da bad kine stuff dey wen do, yeah? But no was lidat.

³Da sacrifice dey gotta make, every year, dat ony make um rememba all da bad kine stuff dey wen do.

⁴Cuz da blood from da cows an da goats no mo power fo hemo da shame fo all da bad kine stuff!

⁶(5-6) You know, wen Christ wen come inside da world, he tell dis: “God, you no like da sacrifices an da gifs dat dey bring. Dey kill animals cuz dey sorry dey wen do bad kine tings, So dey burn da whole animal fo make sacrifice, But dat no make you stay good inside. Dass why you wen make ready fo me come one man.

⁷Den, dis wat Christ wen say: ‘Eh, God! I hea! I wen come fo do wat you like, jalike yoa Book tell bout me.”

⁸First ting Christ wen say, “You no like sacrifices an gifs dat dey bring... Wen dey kill animals Cuz dey sorry dey wen do da bad kine tings, An wen dey burn da whole animal fo make sacrifice, Dat no make you stay good inside.” Wen Christ talk lidat, he talking bout da stuff da peopo doing cuz da Rules say dey suppose to do um.

⁹Den Christ wen say, “I hea. I wen come fo do wat you like.” Christ wen throw out da old stuff so da new way fo live can take ova.

¹⁰Jesus Christ wen do wat God like him fo do. He wen come one sacrifice fo us wen he wen bleed an mahke dat one time. Dass how we wen come da peopo dat stay spesho fo God fo real kine, cuz a wat Christ wen do.

¹¹An one nodda ting, every day all da pries guys go an do dea work fo God. Ova an ova dey make da same kine sacrifices. But you know, dose sacrifices no can get rid a da bad kine stuff, eva.

¹²But dis pries I talking bout, Christ, he wen make da sacrifice fo da bad kine stuff dat one time, an den he wen go sit down ova dea by God, on da right side, da place wea da mos importan guy suppose to sit.

¹³From dat time Christ stay waiting fo da time wen bumbye God goin make all da peopo dat go agains Christ go down in front him fo show dat Christ wen fight an win ova dem.

¹⁴Christ wen make da sacrifice one time, an dat sacrifice wen make everybody dat stay coming spesho fo God, fo be da peopo dat stay spesho fo God foeva.

¹⁵God's Spesho Spirit tell us da same ting too. First he say dis:

¹⁶“Da Boss say, ‘Afta dat time, dis da deal I goin make bumbye fo dem guys. I goin put my Rules inside dea heart, An I goin write um inside dea head.’-”

¹⁷Den he say, “I no goin tink bout Da bad kine stuff dey wen do An da times dey wen broke my Rules.”

¹⁸An you know, wen God let da peopo go an hemo da shame fo da bad kine stuff dey wen do, den no need make odda sacrifice fo dat no moa.

¹⁹So den, my bruddas an sistas, now we stay shua we no need shame fo go any time inside da place dass spesho fo God fo real kine. We get da right fo dat, cuz Jesus wen go bleed an mahke fo us.

²⁰Befo time, had dis big thick cloth inside da big tent dat wen shut off da Real, Real Spesho Place wea God stay. But now, Jesus wen open up da new way fo us fo go inside wea God stay, cuz Jesus wen go bleed an mahke, an now he stay alive.

²¹Us guys get one nodda ting: one big pries dat stay in charge a God's place.

²²So, us guys goin come tight wit God, wit hearts dat like do wass true, an trus God all da way. Cuz Jesus wen make our hearts clean inside, so we know dat all da bad kine stuff inside us, pau awready. Dass jalike he wen sprinkle our hearts, an wash our bodies clean wit clean water.

²³We shua dat God goin do good kine stuff fo us bumbye. So us guys goin go all out an tell everybody dat, an no ack jalike we not shua. Cuz God da One dat wen make promise dat he goin do da good kine stuff fo us, an he everytime do wat he say.

²⁴An us guys goin tink bout how we goin help each odda fo do all kine good kine stuff an show peopo choken love an aloha.

²⁵No stop coming togedda fo church, jalike some peopo no come no moa. Mo betta dis: give each odda good kine words, an do um even mo plenny cuz you guys know da Boss Jesus goin come back pretty soon.

²⁶But you know, even afta we know da true stuff from God, if we go stay doing da bad kine stuff still yet cuz we like, den no mo sacrifice fo hemo da shame fo all da bad kine stuff we stay do.

²⁷If we do dat, den no mo notting we can do, but ony stay scared, waiting fo da time wen God da Judge goin punish us. Dat time goin get one awesome fire dat goin burn up all da peopo dat go agains God.

²⁸Befo time, if get one guy dat no like lissen da Rules dat Moses wen write down inside da Bible, an two o three guys wen tell da same ting bout da bad kine ting da guy wen do, den gotta kill da guy. No mo odda chance fo him.

²⁹Kay den. Get peopo dat make to God's Boy jalike he poho, jalike dey walking all ova him. Dey make jalike no mean notting dat Christ wen bleed an mahke cuz he da sacrifice fo dem. Dey even make jalike no matta dass da blood dat God use fo make da new deal solid, an make dem spesho fo God. Dey talk any kine to God's Spesho Spirit dat do plenny good tings fo dem. So den, God goin make plenny mo worse still yet to dem guys den he wen make to da odda peopo dat neva like lissen his Rules befo time.

³⁰Cuz we know da One who wen say dis inside da Bible: “I da One dat goin pay dem back. I goin punish um fo real kine.” An one nodda place God wen say dis:, “God goin be da Judge fo his peopo.”

³¹Eh! Scared, you know, if da God dat stay alive go afta you!

³²But you guys, rememba how was befo time. Dat time, jalike God wen let you guys see his light an trut, an you guys wen go trus him. Afta dat, odda peopo wen make you guys suffa plenny, but you guys wen go all out fo hang in dea an no give up.

³³Had times da peopo wen talk any kine to you guys in front everybody, an dey wen make you guys suffa plenny. Odda times da peopo wen make same kine to yoa friends, an you guys wen stick wit yoa friends.

³⁴An wen dey wen throw some a yoa friends inside jail, you guys wen feel love an pity fo dem. An you guys even wen stay good inside no matta peopo wen go rip off yoa stuffs. Cuz you guys wen know dat time dat you guys da ones dat get da mo betta stuffs, da kine dat stay foeva.

³⁵Kay den. You guys wen make lidat, an no scared. So den, stay make lidat, an no give up! Cuz God goin give you guys plenny good kine stuff, fo no give up.

³⁶You guys gotta hang in dea. An afta you guys do everyting dat God like you guys fo do, den bumbye you guys goin get da stuff he wen promise.

³⁷Da Bible wen tell befo time, “You know da One dat goin come? He goin come fo shua in litto wile, Not afta real long time.

³⁸My guys, dat get um right wit me, Dem guys goin live fo real kine, cuz dey stay trus me. But if dey come scared an lose fight, I no goin stay good inside bout dem.”

³⁹Us guys not da kine peopo dat stay scared an lose fight. Dose kine peopo goin wipe out. But us guys, we da kine peopo dat trus God, an cuz a dat we goin hang on to da kine life dat stay fo real.