Read Hawaii Pidgin Hebrews 7 Bible Online

Hebrews 7 - Hawaii Pidgin bible

Hebrews 7

³(1-3) Was dat time, dis Melkizedek guy was king fo Salem town, an he was pries fo da Mos Importan God. Now, “Melkizedek,” dat mean, “Da King Who Everytime Do da Right Ting,” an he da King fo Salem, dat mean, “Da King Who Help da Peopo Stay Good Wit Each Odda.” Nobody know who his fadda guys o his mudda guys, o who his ancesta guys. Nobody know wen he wen born o wen he wen mahke. Dat mean he jalike one picha a God's Boy, cuz he stay one pries guy, jalike Jesus stay one pries guy foeva. One time, had some kings an dea army guys dat wen go rip off plenny stuff from da peopo dat live near Abraham. Abraham dem wen go fight an win ova dose kings an dea army guys. Dey wen take back all da stuffs. Den wen Abraham was coming back, Melkizedek wen go out from Salem Town fo meet him. An dass wen Melkizedek wen tell Abraham, “Eh! God goin do plenny good kine tings fo you.” An Abraham, he wen give Melkizedek ten percent a all da stuffs he wen take back, cuz Melkizedek one pries guy.

⁴Tink bout dis: Melkizedek was one real importan guy. He was so importan dat our ancesta guy, Abraham, even wen give him da bestes ten percent from all da stuffs he wen take back wen he wen fight da kings.

⁵Now, all da Jewish pries guys, dey come from Levi, Abraham's great-grankid. God's Rules say dat dose pries guys get right fo take ten percent from all da stuffs all da odda Jewish peopo get -- dass from dea own Jewish bruddas an sistas, cuz dey all come from Abraham.

⁶But Melkizedek, he one pries, no matta he neva have Levi fo his ancesta guy. But still yet, Melkizedek wen get ten percent from all da stuffs Abraham wen bring back. Now Abraham, he da guy dat God wen make promises to, but still yet, Melkizedek wen tell him, “God goin do plenny good kine stuffs fo you.”

⁷Now, wen get somebody talk lidat, everybody know he gotta be da mo importan guy dass telling dat kine ting to da guy dass not so importan.

⁸Da regula kine pries guys take da ten percent. Dose guys, dey goin mahke bumbye. But Melkizedek, he wen take da ten percent, an da Bible neva tell dat he wen mahke.

¹⁰(9-10) You can figga lidis: all da Jewish pries guys get da guy Levi fo dea ancesta guy, an dey take da ten percent from da peopo. But da time Melkizedek wen meet Abraham an Abraham wen pay da ten percent to Melkizedek, dass almos jalike Abraham wen pay um fo all da Levi peopo an all da Levi pries guys dat neva born yet, same time, cuz Abraham da ancesta fo all dem.

¹¹Now, da pries guys, dey all wen come from Levi, an Aaron was dea first Head Priest. Da peopo need pries guys fo help da peopo fo do wat da Rules say. But da peopo no can come perfeck jus cuz dey get da Levi kine pries guys. Dass how come dey need one diffren kine pries guy. Dey need da Melkizedek kine, not da Aaron kine

¹²An you know, wen dey change da kine pries dey get fo one nodda kine pries, same time dey gotta change da Rules.

¹³Now Jesus, he da guy we talking bout. He neva come from da Levi ohana, you know. He come from da Judah ohana, an da Rules neva say dat da guys from dat ohana get da right fo make sacrifice on top da altar.

¹⁴Our Boss Jesus, everybody know dat he come from da Judah ohana. But wen Moses talk bout da guys from da Judah ohana, he neva say notting bout prieses.

¹⁵But da whole ting stay come even mo clear now: Get one nodda kine pries guy wen come. Him, he da Melkizedek kine pries, not da Aaron kine pries. (I talking bout Jesus, you know.)

¹⁶Now da Rules say dat da pries guys gotta come from da Aaron ohana, an Jesus no come from dat ohana. Jesus, he stay one pries guy cuz he get da power fo live to da max foeva, an no mo notting can wipe him out.

¹⁷Da Bible wen say dis bout him befo time: “You goin stay one pries foeva, Jalike Melkizedek.”

¹⁸Dat mean, da Rules from befo time no mo power fo help da peopo. Dass why God wen throw out da old rules.

¹⁹An you know, da Rules neva make nobody come perfeck. Now, God give us someting mo betta. So den, now we stay shua we goin trus him. An cuz a dat we stay tight wit him.

²⁰Wen da guys from Aaron's ohana wen come prieses befo time, God neva make promise notting. But wen God wen give us one mo betta ting, he wen make one strong promise.

²¹Was wen Jesus wen come pries, dat God wen make dat strong promise. God wen tell him, “I da Boss. I make dis promise, An I no goin change my mind. ‘You one pries guy foeva.’-”

²²An cuz God wen make one strong promise to Jesus lidat, garans Jesus da One dat goin make shua us guys goin get one mo betta deal.

²³Befo time had plenny guys dat wen come pries. Dass cuz dey no can stay pries long time. Dey wen all mahke, dass why.

²⁴But Jesus, he da One dat stay live foeva, an he da kine pries dat stay foeva. Dass why no need one nodda pries guy.

²⁵Jesus, he no mahke. Everytime he stay dea fo aks God fo help fo da peopo dat come to God cuz a him. An dass how he get da power fo hemo dem good from all da bad tings dey stay in.

²⁶Jesus, da right kine Head Priest guy fo us: He stay good an spesho fo God. Nobody can poin finga him notting. He stay clean inside. He stay diffren den all da peopo dat stay do da bad kine stuff. An God wen make him mo importan den everyting inside da world o inside da sky.

²⁷Dass why Jesus, he not jalike da odda main pries guys. He no need make sacrifice every day jalike dem. Dose guys, first dey gotta make sacrifice fo all da bad tings dey wen do, an den dey make sacrifice fo all da odda peopo. But Jesus, he wen make sacrifice fo da peopo one time ony, wen he wen make himself da sacrifice.

²⁸Now da Rules say fo make guys come da main pries. An you know, dey come main pries, no matta dey not strong inside. But awready had da Rules wen God wen make one strong promise fo make his Boy come da Head Priest. Az his Boy, da One dass perfeck foeva.