Read Hawaii Pidgin James 2 Bible Online

James 2 - Hawaii Pidgin bible

James 2

¹Eh, my bruddas an sistas! You guys trus our awesome Boss, Jesus Christ. So, no ony make nice to some peopo, an not to odda peopo, jus cuz you tink dey no look good.

²Wat if get two guys dat come to yoa church meeting. One guy get one gold ring, an he all dress up. An da odda guy poor, an ony get puka kine clotheses.

³An den you guys tink, “Eh! Da guy wit da nice kine clotheses, check um out!” Den you guys make nice to him, an you tell um, “Come! Sit down hea on dis good seat!” But you tell da poor guy, “Eh, you! Stand ova dea!” o, “Sit down on da floor by my feet!”

⁴You guys stay ony make nice to some peopo, an not to odda peopo, cuz you tink dey no look good, an you making yoa own self da judge. But you guys all wrong, how you tinking.

⁵Eh, my good friends! Lissen! Get peopo inside dis world, an odda peopo tink dey notting, jus cuz dey poor peopo. But dass da ones dat God wen pick fo come his peopo, yeah? So dey trus him plenny, jalike dey rich inside. Cuz God da King, an dey jalike his kids. He goin give dem all da good kine stuff dat he wen promise awready to all da peopo dat get love an aloha fo him.

⁶But you guys, you make any kine to da poor peopo. Eh! Wassa matta you guys? Da rich peopo, dey da ones dat everytime make you guys suffa, an make you fo do anyting dey like, yeah? Dey da ones dat everytime drag you in front da judge.

⁷Everytime, dey da guys dat talk stink bout da awesome guy Christ, no matta you his guys, an den!

⁸You know you stay doing da right ting if you do wat God da King say you gotta do. Da Rule inside da Bible say, “You gotta get love an aloha fo da odda guy, jalike you love yoa own self.”

⁹But if you make nice to some peopo, an not to oddas, da tings God tell his peopo dey gotta do, show dat you doing wrong, an you stay broke God's Rules.

¹⁰Dis wat I mean: Anybody dat do everyting God tell his peopo dey gotta do, but ony mess up one ting, dey still wen broke all God's Rules, you know.

¹¹God's Rules wen say, “No fool aroun da odda guy's wife.” An, “No go kill nobody.” So, even if you no go fool aroun, but you go kill somebody, den you still wen broke God's Rules.

¹²Wen you talk an wen you do someting, rememba dat da Rule dat God goin use fo check you out, dass da Good Stuff God tell us. An dat same Good Stuff From God goin hemo you from doing all da bad kine stuff.

¹³Da guy dat make like one judge fo da odda peopo, an no give um chance, dat guy no goin get chance wen he stand in front God da Judge. But wen you give da odda guy chance, den no need fo God judge you, an dass mo betta.

¹⁴Eh, my bruddas an sistas! So, wat? If one guy ony say he trus God, but he no do wat God say, you tink dass nuff fo da guy get outa da bad kine stuff he awready stay in? No way! He ony trussing God wit his mout!

¹⁵If get one brudda o sista dat no mo clotheses an no mo food fo eat every day,

¹⁶an den you go tell um, “Aloha! Come, get warm, an eat up.” But you no go give um notting. Latas wit dat! You guys know dey need all dat kine stuff fo dea body. Wass up wit dat?

¹⁷Same ting, if somebody ony say he trus God, but same time, he no do notting, da bugga no trus God fo real kine, he ony mout.

¹⁸But somebody goin say: “You trus God, but I do plenny good tings.” I goin tell dat guy: “Eh! How come you tink lidat? You no can make proof dat you trus God, if you ony talk, but you no stay do good tings. Ony get one way you goin know dat I stay trus God -- wen I stay do good tings! Den you goin know fo shua dat I trus God.

¹⁹I know you believe get ony one God. Good den! But da bad kine spirits believe dat too. Az why dey stay scared an shaking all ova!

²⁰Wot! You not tinking! If you trus God, but den, you no do good tings, az wase time. I gotta show you, o wat?

²¹“Abraham, da ancesta guy dat all us Jewish guys come from, he wen do wat God wen tell him, wen he wen put his boy Isaac on top da altar fo make sacrifice to God. Az why God wen say, ‘Dis guy, he get um right wit me.’

²²You no can see? Abraham wen trus God, an he wen do someting too -- he wen put Isaac on top da altar. An da tings he wen do wen help him fo trus God all da way.

²³So dis wen happen jalike da Bible say: ‘Abraham wen trus God, so God wen make Abraham get um right wit him.’ An God wen tell, ‘Abraham, he my friend.’

²⁴Az right, yeah? Now you can see dat not nuff fo ony trus God an no do notting. You gotta go do someting too, if you like God fo say dat you get um right wit him.”

²⁵Same ting wit Rahab, da kine wahine from befo time dat take money wen she fool aroun. Wen she wen let da Israel army guys hide her house, she wen tell dem fo go back one diffren way so dey no get kill. She wen do someting right. Az why God wen say she get um right wit him.

²⁶So den, da body, if no mo spirit inside, stay mahke. Same ting, if you ony trus God, but you no do good tings, den eh! jalike you mahke inside awready, you no mo da real kine life inside you.