Read Hawaii Pidgin Revelation 19 Bible Online

Revelation 19 - Hawaii Pidgin bible

Revelation 19

¹Afta da big angel guy wen talk, jalike one dream, I wen hear one big noise dat wen sound like get plenny peopo inside da sky. Dey singing, “God, he da greates! Hallelujah! He take us outa da bad kine stuff we stay in! He da awesome One! An he da One dat get plenny power!

²God, he da Judge. He ony tell da trut, An do wass right! He wen punish da big wahine dat fool aroun fo money. Cuz she wen make da peopo inside da world do real bad kine stuff, jalike her. An he wen punish her cuz she wen kill da peopo dat work fo God.”

³Den dey sing one mo time inside da sky, “God, he da greates! Hallelujah! Da smoke from Babylon, da big town, Stay burn foeva an eva!”

⁴Den da twenty-four older leadas an da four tings dat stay alive, dey go down an show love an respeck fo God, da One dat sit on top his throne. Dey say, “Fo shua, God, he da greates! Hallelujah!”

⁵Den, jalike one dream, one voice come from God's throne an say, “Everybody dat work fo our God, An get respeck fo him, All da big an small peopo too, Talk good bout him!”

⁶Den I wen hear someting dat wen sound like get plenny peopo making big noise, jalike big water pounding, an jalike loud thunder. Dey say, “God, he da greates! Hallelujah! Cuz he da Boss dat stay in charge, An he da King ova all! He da God Dat Get All Da Power!

⁷Now we can feel good inside, An dance an sing, An tell how awesome he stay! “Cuz now, get da big lu`au Fo God's Baby Sheep Guy! He goin take his peopo fo be wit him, An dey wen make demself ready fo him, Jalike da groom take his bride An she wen make herself ready fo him.”

⁸God wen give da bride fancy linen kine clotheses fo wear, dat stay white an clean. (Da kine white an clean linen clotheses mean, all da good an right tings dat da peopo dat stay spesho fo God do.)

⁹Den, jalike one dream, da angel guy tell me, “Write dis: Dey can stay good inside, all da peopo dat God tell fo come to da wedding lu`au fo God's Baby Sheep Guy!” Den da angel say, “Dass fo real wat God say.”

¹⁰An I wen go down by da angel's feet fo show him love an respeck. But he tell me, “No do dat! I ony one worka fo God jalike you an yoa bruddas an sistas dat stick wit da trut dat Jesus tell. Show love an respeck fo God! Cuz da trut dat Jesus tell, dass wat make da guys dat talk fo God know wat fo say.”

¹¹Den, jalike one dream, I see da sky open up, an dea in front me had one white horse wit one guy on top him. Dey call dat guy Da One Dat Do Wat He Say an Da One Dat Tell Da trut. He everytime do wass right, wen he make like one Judge, an wen he lead one army fo fight one war.

¹²His eyes shine jalike da fire, an on top his head he get plenny crown. He get one name dat dey write on top him dat nobody know. Ony him, he know um.

¹³He get one robe on, dat get blood all ova um. Dey call dat Guy, “God's Talk.”

¹⁴All da army guys inside da sky stay go wit him. Dey riding on top white horses, an dey wear da fancy linen kine clotheses dat stay white an clean.

¹⁵One sharp kine sword come out from his mout, an he win da war agains all da diffren peopos from all ova da world wit da sword. He goin be King ova dem, an lead dem wit one iron club. Da Guy on top da white horse goin walk all ova da grapes dat make da wine. An dat show dat da God Dat Get All Da Power stay huhu, an no take da bad kine stuff da peopo wen do.

¹⁶He get one sign on top his robe an on top his leg, dat say, “Da King Ova All Da Kings, an Da Boss Ova All Da Bosses.”

¹⁷Den, jalike one dream, I wen see one angel guy standing wea da sun stay shine. He was talking loud to da scavenja birds flying in da air, “Come hea fo da big lu`au God goin make!

¹⁸So you birds can eat all da peopo dat goin mahke! da kings, da army bosses, da strong guys, horses, an da guys dat ride on top um, an all da odda peopo -- da slave guys, da guys dat not slaves, big guys an litto guys.

¹⁹Den I wen spock da Wild Animal, an da kings from all ova da world, an dea army guys. Dey wen come togedda fo make war agains da Guy on top da horse an his army.

²⁰But da Guy on top da horse wen win agains da Wild Animal, an agains da guy dat say he talk fo God but he bulai. Da Bulaia Guy wen do all kine awesome stuff fo show dat da Wild Animal get power. Az how he wen bulai all da peopo dat wen get da Wild Animal's mark on top dea forehead, an dat wen go down an pray to his statue. Den da Guy dat stay ride da horse wen throw da two guys inside da lake dat stay burn wit sulfur.

²¹Da Guy dat stay riding da horse wen kill all da oddas wit da sword dat come out from his mout. An all da scavenja birds wen eat um all up!