Read Hawaii Pidgin Revelation 2 Bible Online

Revelation 2 - Hawaii Pidgin bible

Revelation 2

¹Den da One I wen see tell me, “Da angel messenja guy I wen send fo help da peopo dat come togedda fo church Efesus side, write one letta to him, an say dis: Da One dat hold da seven stars inside his right hand, an walk aroun wea get da seven gold stands fo put lamps on top, dis wat he tell:

²‘I know wat you guys stay doing, dat you guys work hard an stay hanging in dea. I know dat you guys no take odda guys dat doing da bad kine stuff. You guys wen check out da odda guys dat say I wen send um, but I neva. An you guys wen find out dat dey bulai.

³You guys wen hang in dea, an no matta you guys suffa plenny cuz you my guys, still yet, you guys no give up.

⁴‘But I get dis agains you guys, dat you guys no mo love an aloha like wen you guys wen trus me first time.

⁵So, wat? Tink bout how you guys was befo, an now how plenny you guys wen mess up. You guys gotta come sorry an pau make lidat, but make like befo, first time. If you guys no like come sorry an pau make lidat, I no goin let you guys talk fo me no moa. Dass jalike I goin come an take away yoa lamp an da stand from da place wea dey stay.

⁶But you guys stay doing one ting right: You guys hate da bad kine stuff da Nicolaitan guys stay doing, an me, I hate dat kine stuff too.

⁷‘If you guys can hear dis, you guys betta lissen, an go do wat God's Spirit stay telling da church peopo!’ Everybody dat fight an win ova da bad kine stuff, I goin give um da right fo eat from da tree dat make peopo come alive fo real, dat stay inside God's Beautiful Place.”

⁸Den da One I wen see tell me, “Da angel messenja guy I wen send fo help da peopo dat come togedda fo church Smyrna side, write one letta to him, an say dis: Da One dass first an last, da One dat wen mahke an den come back alive, dis wat he say:

⁹‘I know you guys suffa plenny, an you guys stay poor, but still yet you guys stay rich! I know dat get guys dat say dey God's peopo, but dey not. Dey talk stink bout you guys. Dey say dey come togedda fo pray to God, but dey work fo da Devil.

¹⁰No scared da stuff you guys goin suffa. You know, da Devil goin set up some a you guys fo go jail, fo try make you guys give up, an you guys goin suffa dea ten days. Hang in dea an trus God, even if dey kill you guys. Cuz I goin give you guys da winna's prize -- da kine life dass fo real!

¹¹‘If you guys can hear dis, you guys betta lissen, an go do wat God's Spirit stay telling da church peopo! Everybody dat fight an win ova da bad kine stuff, no way dey goin get hurt wen da odda peopo mahke da second time an get cut off from God foeva.’-”

¹²Den da One I wen see tell me, “Da angel messenja guy I wen send fo help da peopo who come togedda fo church Pergamum side, write one letta to him, an say dis: Da guy dat get da sword dat get two side sharp -- dis wat he tell:

¹³‘I know da place wea you guys live, cuz jalike da Devil stay king ova dea. But still yet you guys stay tight wit me, an neva pau trus me. Even da time wen da guys inside yoa town, wea da Devil stay, dey wen kill Antipas cuz he everytime tell da trut bout me, still yet you guys wen trus me.

¹⁴‘But eh! I get dis agains you guys: You guys get peopo ova dea dat make jalike da guy Balaam wen do long time ago. Dat guy wen teach King Balak how fo make da Israel peopo do bad kine stuff. He wen make um eat food da odda peopo awready wen give fo sacrifice to da idol kine gods, an go fool aroun wit peopo dey not married to.

¹⁵Same ting wit you guys, yeah? You guys get peopo ova dea dat still yet do da bad kine stuff da Nicolaitan guys teach.

¹⁶So den, you guys gotta come sorry, an no do all da bad kine tings you doing no moa. Cuz if you guys do dat, den I goin come by you guys pretty soon, an wat I say goin show dat dey stay wrong. Dass jalike I use one sword fo fight an win ova da guys dat stay agains me!

¹⁷‘If you guys can hear dis, you betta lissen, an go do wat God's Spirit stay telling da church peopo!’ Everybody dat fight an win ova da bad kine stuff, I goin give um some a da manna kine bread fo eat dat God wen hide fo dem befo time. An I goin give um one white stone wit one new name dat God wen write on top um. Da guy dat get dat name, he da ony one goin know um.”

¹⁸Den da One I wen see tell me, “Da angel messenja guy I wen send fo help da peopo who come togedda fo church Tyatira side, write one letta to him, an say dis: Dis wat God's Boy say, da One dat get eyes dat shine jalike one big hot fire, an feets dat look jalike brass metal dat shine:

¹⁹‘Eh, I know everyting wat you guys stay doing, dat you guys get love an aloha fo each odda an fo me. I know you guys trus me, work fo me, an stay by me. You guys stay doing mo fo help me den da first time wen you guys wen start fo trus.

²⁰‘But eh! I get dis agains you guys. You guys take da Jezebel kine wahine. She say she talk fo God, but she bulai da peopo dat work fo me wit wat she teach. So dey go fool aroun da peopo dey not married to, an eat da food from da sacrifices dat odda guys wen give to da idol kine gods.

²¹I wen give her plenny chance awready fo come sorry an no do da bad kine stuff she doing, but she no like.

²²So, I goin make her come real sick, an her an da guys dat wen fool aroun behind God's back wit her goin suffa plenny, if dey no come sorry an pau do da bad kine stuff dey doing.

²³Fo shua, I goin kill everybody dat make like her. Den all da church peopo goin know dat I da One dat look inside da heart an head an know wat everybody stay like, an wat dey tink, an I goin pay everybody fo wat dey wen do, good o bad.

²⁴‘Now, I like tell dis to all you odda peopo inside Tyatira, you guys dat no lissen to da Jezebel wahine an no like learn wat dey call “da deep secrets from da Devil”: I no goin make tings mo hard fo you guys.

²⁵Jus hang in dea an trus God real good, till I come back.

²⁶‘Everybody dat fight an win ova da bad kine stuff, an do wat I like um fo do till da end, I goin give um da right fo be in charge a da diffren peopos all ova da world.

²⁷‘Da Bible say dis bout me, Jesus: “He goin be dea leada. He goin carry one stick wit iron on top Fo show he stay in charge. He goin broke dem guys in pieces, jalike one clay pot.” An dass da kine power my Fadda wen give me.

²⁸‘Everybody dat fight an win ova da bad kine stuff, dey goin be awesome, jalike da early morning star.

²⁹you can hear dis, you betta lissen an go do wat God's Spirit stay telling da church peopo!’-”