Read Hawaii Pidgin Ruth 1 Bible Online

Ruth 1 - Hawaii Pidgin bible

Ruth 1

²(1-2) Dis one story dat wen happen long time befo, da time wen ony da local leada guys was in charge a da Israel peopo. Had one guy from Betlehem town inside da Judah ohana land. Da guy, his name Elimelek, an his wife, Na`omi. Dey get two boys, Mahlon an Kilion. Dey from da Efrata ohana. Dat time, Judah side, long time no mo rain, so no mo notting fo eat. Az why Elimelek take his wife an dea two boys, an dey move house da odda side da Jordan river an live up country wit da Moab peopo.

³But wen dey stay Moab side, Elimelek mahke. So den Na`omi, she stay stuck dea wit her two boys.

⁴Da two boys, Mahlon an Kilion, dey wen grow up an marry two wahines from da Moab peopo. Mahlon marry Rut, an Kilion marry Orpah. Afta dey stay dea bout ten year,

⁵da boys Mahlon an Kilion, dey mahke too. So Na`omi, she stay dea alone. No mo husban, an no mo boys o grankids.

⁶Na`omi stay Moab side still yet, but den she hear dat Yahweh wen tink time now fo help his peopo Judah side, an he give food to dem. So Na`omi an her two daughta-in-laws make ready fo go way from da Moab land an go back da place Na`omi wen come from.

⁷Na`omi an Rut an Orpah, dey start togedda fo go way from da place Na`omi wen live, an go da road back to da Judah land.

⁸But wen dey going, Na`omi tell her two daughta-in-laws, “Eh! Mo betta you guys go back by yoa mudda guys, you know. I like fo Yahweh fo stick wit you guys, jalike you guys wen stick wit yoa husban guys befo dey wen mahke, an wit me.

⁹I like Yahweh fo help you guys find good, solid guys ova dea fo come yoa new husbans!” Den Na`omi kiss Rut an Orpah fo tell um aloha, an dey start fo cry plenny.

¹⁰But da wahines tell Na`omi, “No way! Us guys, we going stick wit you, an go by yoa peopo!”

¹¹Na`omi tell Rut an Orpah, “Mo betta you guys go back! No good you go wit me. You guys tink I young still yet, so you tink I goin stick wit da way my people do um an get married fo get mo baby boys dat goin come big an den come yoa husbans bumbye? No way!

¹²You guys, you jalike my daughtas, but mo betta you go back home. I too old fo marry. If I wen get chance fo marry somebody tonite, an get boy kine babies, wat you tink?

¹³You guys tink you goin wait long time fo dem come big, an you no goin like marry odda guys firs? No way, my daughtas! I know you guys stay plenny sore inside, but fo me, eryting mo sore still yet, cuz was Yahweh Up Dea Inside Da Sky dat wen make me suffa.”

¹⁴Den Rut an Orpah start fo cry one mo time. Orpah, she kiss her mudda-in-law fo tell her aloha, an she go back home. But Rut, she like stick wit Na`omi.

¹⁵Na`omi tell her, “Eh look! Yoa sista-in-law, she wen go back awready by her peopo an da god she pray to. Mo betta you go do same ting.”

¹⁶An Rut tell Na`omi, “No gimme presha fo go way from you an go back home, An no stick wit you. Wea eva you go, I goin go. Wea eva you like live, I goin live dea too. Yoa peopo, dey goin be my peopo, An yoa God, he goin be my God too.

¹⁷An da place you mahke, I goin mahke dea too. Dass wea dey goin bury me! I like Yahweh punish me plenny If I go way from you, No matta you mahke, o I mahke!”

¹⁸So, wen Na`omi undastan dat Rut no goin change her mind, an she going wit her, Na`omi stop talking.

¹⁹So da two wahines go togedda Betlehem town. Wen dey come dea, erybody inside da town start fo talk plenny bout dem. Da wahines, dey say, “Fo real, dis Na`omi, o wat?!”

²⁰Na`omi, she tell um, “Eh! Mo betta no call me Na`omi, Cuz dat mean ‘eryting nice.’ Mo betta call me Mara, Cuz dat mean ‘eryting jalike bitta taste.’ Cuz Da God Dat Get All Da Powa, He wen make eryting come real junk fo me.

²¹Wen I wen go way from hea, I get plenny, my husban an my boys. Now Yahweh wen bring me back hea, An I no mo notting. How you goin call me Na`omi, aah? Cuz dat mean ‘eryting nice,’ But Yahweh , He wen go agains me. Da God Dat Get All Da Powa, He make bad tings happen to me!”

²²Dass wat wen happen wen Na`omi come back from da Moab land with her daughta-in-law Rut, da Moab wahine. Da time dey come back Betlehem, dass da same time da farma guys start fo cut da barley fo food.