Read Hawaii Pidgin Ruth 3 Bible Online

Ruth 3 - Hawaii Pidgin bible

Ruth 3

¹Na`omi talk to her daughta-in-law Rut. She say, “Eh Rut! Time fo me find you one place fo live, wea dey goin take good care you, yeah?

²You know da guy Boaz? He oua ohana, you know. He wen make to you jalike you one a da girls dat work fo him, so you can pick up da extra barley an wheat afta dem. “An you know wat? Tonite, Boaz going fo work da place wea dey take da junks outa da wheat fo make um ready fo eat.

³So den, you go bafe, an put perfume, an wear yoa nicest clothes. Go da place wea dey take da junks outa da wheat. But no let Boaz know you dea, till afta he pau eat.

⁴Watch so you know wea he go lay down fo sleep. Afta he go sleep, go ova dea wea he stay sleep, an take da blanket off his feets, an lay down dea by his feets. Boaz, he know how oua peopo do, an he goin tell you wat you gotta do so he can take care you.”

⁵Rut say, “Okay, I go do um, jalike you tell me!”

⁶So, Rut go da place wea dey take da junks outa da wheat. She do jalike her mudda-in-law wen tell her.

⁷Boaz, he wen eat an feel plenny good. Den he go lay down one side da place wea dey pile up da barley an go sleep. Lata, Rut go ova dea real quick an no make noise, an take da blanket off Boaz feets, an lay down dea.

⁸Bout midnite time, someting scare Boaz litto bit, an he wake up an turn ova. An eh! had one wahine, laying dea by his feets!

⁹So he tell, “Eh! Who you?” Rut tell, “Dis me, Rut. I jalike one a yoa worka wahines. An you, you from my mahke fadda-in-law's ohana. Da way yoa peopo do stuff, you one a da guys from da ohana dat suppose to marry me an get kids fo my mahke husban, cuz you jalike one cousin fo him. So, put da end a yoa blanket ova me fo show you goin take me fo come yoa wife!”

¹⁰Dat wen blow Boaz mind. He tell, “Eh Rut! Yahweh, he do plenny good tings fo you! You wen do good too, cuz you wen stick wit yoa mahke husban ohana wen you wen come hea. An da ting you doing right now, show mo plenny still yet dat you get respeck fo da ohana, cuz you no stay trying fo marry one a da younga guys, no matta no matta dey rich o no mo notting!

¹¹So, no scared! I goin do jalike you wen tell me fo do fo you. No pilikia, cuz all da older leada guys fo my peopo know dat you one wahine dat stay strong inside.

¹²“Ony one ting now. Fo shua, I one a da guys from da Elimelek ohana dat get da right fo marry you so you can get kids fo yoa mahke husban, cuz I jalike one cousin fo him. But you know, get one nodda guy dat mo nea yoa husban den me, so he get mo right fo marry you, mo den me.

¹³So, stay hea tonite. Morning time, I go talk to him. If he like, kay den, he da one goin marry you. But if he no like do dat fo da ohana, den I make dis promise to you, jalike I shua Yahweh stay alive, I shua too dat I goin marry you. Now, lay down ova dea till morning time.”

¹⁴So Rut lay dea by Boaz feets till morning time. She get up early, befo get light, befo anybody can see who her. Cuz Boaz tinking, “No good da peopo know dat dis wahine wen come hea wea dey take da junks outa da wheat!”

¹⁵He tell Rut, “Come! Bring yoa shawl ova hea an hold um out.” He dump wheat inside da shawl six times, an help put um on top her back fo take home. An den Boaz go back Betlehem town too.

¹⁶Wen Rut go back by Na`omi, her mudda-in-law, Na`omi aks, “So. Wat he wen do, Rut?” Rut tell Na`omi eryting dat Boaz wen do fo her.

¹⁷An she tell, “He wen give me all dis wheat too, cuz he tell, ‘No good you go back by yoa mudda-in-law an no mo notting fo her.’-”

¹⁸Na`omi tell, “Now, my girl, jus wait till you find out wat goin happen. Cuz Boaz, he no goin wait notting. He goin do eryting today!”