Read Hawaii Pidgin Ruth 4 Bible Online

Ruth 4 - Hawaii Pidgin bible

Ruth 4

¹Den Boaz go ova dea by da big gate fo da town, da place wea da town leadas come togedda fo talk. He sit down dea wit da odda leada guys. Right den an dea, da odda guy from his ohana, da one Boaz wen talk bout, dat get da right fo marry Rut mo den Boaz get, he walk by dem. Boaz yell to him an use his name. Boaz say, “Hui! Come ova hea! Sit down! I like talk to you.” So dat guy come an sit down ova dea.

²Den Boaz go tell ten a da older leada guys fo da town fo come lissen. He tell um, “Sit down ova hea.” Dey sit down too.

³Boaz tell da guy dat get da right fo buy da ohana land an marry Rut, “Eh, you know dat piece land dat oua ohana guy Elimelek wen own? He wen mahke ova dea Moab side. Now, his widow Na`omi come back from dea, and her like sell dat piece land.

⁴Me, I tinking lidis: I gotta tell you bout dat piece land, cuz you get da right fo buy um, if you like. Dass cuz you an Elimelek da same blood. So, if you like buy um so dat da land stay wit da ohana, den buy um in front all dese peopo dat stay hea, dese leada guys fo my peopo. But if you no like, den tell me in front all dis guys so I know, cuz I like buy um. You get da main right fo buy um fo da ohana, but I get da right afta you, if you no like [um].” Da odda guy tell, “Kay den, I buy um fo da ohana.”

⁵Den Boaz tell da odda guy, “You know, wen you buy dis piece land from Na`omi, dat mean you gotta take da Moab wahine Rut same time, cuz she wen marry Elimelek boy, da one dat wen mahke too. You da one dat gotta marry her, fo get kids wit her mahke husban's name. Dat way, da Elimelek line no goin come pau, an his land goin stay wit da ohana.

⁶Da guy dat get da right fo buy da land say, “Eh, if dass how stay, den I no can. Cuz if I buy um, my land go fo da Elimelek line, an no go fo help my own kids. Mo betta I give you my right fo buy dat piece land fo da ohana, cuz no way I can buy da land an take da wahine too!”

⁷(Dat time, dass how da Israel peopo make proof dat one deal stay for real, dey wen do um lidis: Wen anybody use da right fo buy someting, dey take off dea slippa an give um to da odda guy dey make deal wit. Dass how erybody know wat kine deal dey make.)

⁸So wen da guy dat get da right fo buy da land tell Boaz, “You buy um,” Boaz take off his slippa an give um to da guy in front erybody.

⁹Den Boaz tell da older leada guys an da odda people dat was dea, “All you guys, you wen see wat wen happen hea today. I goin buy from Na`omi, all da land dat Elimelek and his boys Mahlon an Kilion wen get befo time.

¹⁰An not jus da land -- da wahine Rut from Moab, dat wen marry Mahlon befo he mahke, I buying da right fo make her my wife. Dass so she can get one boy dat goin keep his mudda's mahke husban's name wit da land he get cuz his mudda was Mahlon's wife. Den all da ohana an all da leada guys fo Mahlon's town no goin foget who him. An all you guys, you gotta tell erybody wat wen happen dis day.”

¹¹Da older leada guys fo da town, an all da peopo dat stay by da main gate wea da peopo stay come togedda, dey tell, “Dass right! All us guys wen see wat wen happen, an we gotta tell erybody. Dis wahine dat goin come inside yoa house, We like Yahweh make her come Jalike da wahines Rachel an Leah, Da two wahines all us Israel peopo come from! An you, make strong, So erybody know who you, Right hea inside Betlehem Efrata town!

¹²An we like Yahweh give you kids Wit dis young wahine, So dat yoa line bumbye goin be Jalike da line dat wen come From oua ancesta guy Perez, Da one dat Tamar wen born Fo oua ancesta Judah!”

¹³Dass how Boaz wen marry Rut an she come his wife. Wen dey sleep togedda, Yahweh let her come hapai. She born one boy.

¹⁴Da Betlehem wahines tell Na`omi, “Good, us guys tell good tings bout Yahweh! He no let you stay now widout nobody dat get da right fo carry da name fo yoa ohana! We like all da Israel peopo know bout dis bebe!

¹⁵Eh Na`omi! Dis bebe, He goin make you feel Jalike you young one mo time! He goin take care you wen you old! Cuz he come from yoa daughta-in-law, Dat get plenny love an aloha fo you. She make mo betta fo you den seven boys!”

¹⁶Na`omi, she wen carry da baby close an take care him jalike she da mudda.

¹⁷Da neighba wahines say, “Now, Na`omi get one boy[ again]!” An dey give him da name Obed. Obed, lata he [come] Jesse fadda an King David granfadda.

¹⁸Dis da ohana line from Perez: Perez, he Hezron fadda.

¹⁹Hezron, he Ram fadda. Ram, he Amminadab fadda.

²⁰Amminadab, he Nakshon fadda. Nakshon, he Salmah fadda.

²¹Salmah, he Boaz fadda. Boaz, he Obed fadda.

²²Obed, he Jesse fadda. Jesse, he King David fadda.