Read Hazaragi امثال 12 Bible Online

امثال 12 - Hazaragi bible

امثال 12

¹کسی که پَند و نَصِیحَت ره دوست دَشته بَشه دانایی ره اَم دوست دَره، و کسی که از اِصلاح شُدو نَفرَت دَشته بَشه، اُو بےعقل اَسته۔

²آدمِ نیک رِضای خُداوند ره حاصِل مُونه، مگم کسی که نَقشِه بَد مِیکشه، خُداوند اُو ره محکُوم مُونه۔

³اِنسان از بَدی و شرارَت اُستوار نَمُوشه، مگم رِیشِه آدمِ صادِق ھرگِز کَنده نَمُوشه۔

⁴خاتُونِ خُوب، تاجِ سرِ شُوی خُو اَسته، مگم خاتُونِ بےحَیا، رقمِ شارِیدَگی دَ اِستُغونای شُوی خُو اَسته۔

⁵فِکرای آدمای نیک راست و دُرُست اَسته، مگم مَشوَره ھای مردُمِ شرِیر پُر از فِریب و نَیرنَگ۔

⁶تورای آدمای بَدکار باعِثِ خُون ریزی مُوشه، مگم نقلِ راستکارا باعِثِ نِجات۔

⁷بَدکارا سرنِگون شُده از بَین موره، لیکِن خانِه آدمای نیک پایَدار مُومَنه۔

⁸اِنسان دَ اَندازِه ھُوشیاری خُو صِفَت مُوشه، مگم کسی که فِکر شی کَج اَسته، شرمِنده مُوشه۔

⁹کسی که حَقِیر و فقِیر بَشه ولے نوکر دَشته بَشه، بِهتر اَسته نِسبَت دَ شخصِ که خود ره کَٹه نِشو بِدیه و لیکِن نانِ خوردون خُو ره نَه دَشته بَشه۔

¹⁰آدمِ عادِل دَ فِکرِ جانِ حَیوان خُو اَسته، مگم آدمای شرِیر حتّیٰ رَحم کدون شی اَم ظُلم اَسته۔

¹¹کسِیکه دَ زمِین خُو کِشت و کار مُوکُنه، اُو از نان سیر مُوشه، مگم کسِیکه دَ پُشتِ چِیزای بےفایده مِیگرده، آدمِ بےعقل اَسته۔

¹²شخصِ بَدکار چِیم شی دَ وُلجِه مردُمِ شرِیر مَنده، لیکِن رِیشِه آدمای صادِق پُر ثَمَر اَسته۔

¹³آدمِ خراب دَ دامِ بَدگویی خُو گِرِفتار مُوشه، مگم آدمِ صادِق از مُصِیبَت نِجات پَیدا مُونه۔

¹⁴اِنسان از نَتِیجِه تورِه خُو خُوبی مِینگره، و دِستای زَحمَت کشِ اِنسان دَز شی فایده مِیرسَنه۔

¹⁵راهِ آدمِ جاھِل دَ نظرِ خود شی دُرُست اَسته، مگم آدمِ دانا دَ نَصِیحَتِ دِیگا گوش مِیدیه۔

¹⁶قارِ آدمِ جاھِل یگ دَم معلُوم مُوشه، مگم آدمِ ھُوشیار تَوهِین و تَحقِیر ره نادِیده مِیگِیره۔

¹⁷شاھِدِ راستگوی صداقت ره ظاھِر مُونه، مگم شاھِدِ دروغ گوی فِریب ره۔

¹⁸تورای بعضی کسا مِثلِ ضَربِه شمشیر اَسته، مگم زِبونِ آدمای دانا شفابَخش۔

¹⁹تورِه لب ھای راستگوی تا اَبَد پایَدار مُومَنه، مگم زِبونِ دروغگویی فقط یگ لَحظه عُمر دَره۔

²⁰فِکرِ آدمای منافِق پُر از چال و نَیرنَگ اَسته، مگم کسای که بَلدِه صُلح و آرامِش مَشوَره مِیدیه، خوشی مِینگره۔

²¹دَ آدمای صادِق ھیچ بَدی نَمِیرَسه، لیکِن بَدکارا پُر از جنجال و مُشکِلات اَسته۔

²²خُداوند از آدمای دروغگویی بَد شی مییه، مگم از شخصِ نیکُوکار راضی اَسته۔

²³آدمِ ھُوشیار دانِش خُو ره آشکار نَمُونه، مگم دِلِ آدمای اَبله، جھالَتِ از وا ره معلُومدار مُونه۔

²⁴دِستِ زَحمَتکَش اِنسان ره حاکِم جور مُونه، مگم تَمبَلی اُو ره دَ نوکری مِیندَزه۔

²⁵غَم و غُصّه، دِلِ اِنسان ره مَیده مُونه، مگم تورِه خُوب و نَرم اُو ره خوشحال مُونه۔

²⁶آدمِ نیک دَ دوست خُو ھِدایَت مِیدیه، مگم بَدکارا، مردُم ره طرفِ گُمراھی مُوبَره۔

²⁷آدمِ سُست حتّیٰ شِکار کَدَگی خُو ره کَباب نَمُوکُنه، مگم کوشِش و تَلاش، بَلدِه اِنسان گَنجِ قِیمَتبای اَسته۔

²⁸راهِ نیکی و صداقت، راهِ زِندَگی اَسته، که دَ مَسِیرِ ازُو مرگ وجُود نَدَره۔