Read Hazaragi امثال 16 Bible Online

امثال 16 - Hazaragi bible

امثال 16

¹اَندیشه ھا و خیالاتِ دِلِ اِنسان مَربُوط دَ خود شی مُوشه، مگم نَتِیجه آخِری از جانِبِ خُداوند اَسته۔

²تمام راه ھای اِنسان دَ نظرِ خود شی پاک اَسته، لیکِن نِیَّت ھای شی دَ خُداوند معلُومه۔

³کارای خُو ره دَ خُداوند تسلِیم کُو، و نَقشه ھای تُو کامیاب مُوشه۔

⁴خُداوند ھر چِیز ره بَلدِه مقصد خُو خَلق کده، و امی رقم آدمِ بَدکار ره اَم بَلدِه روزِ جَزا۔

⁵خُداوند از آدمای مَغرُور بَد شی مییه، و یَقِیناً اُونا بے جَزا نَمُومَنه۔

⁶دَ وسِیلِه مُحَبَّت و راستی گُناه بَخشِیده مُوشه، و تَرسِ خُداوند اِنسان ره از بَدی دُور نِگاه مُونه۔

⁷وختِیکه خُداوند از یگ نفر راضی بَشه، حتّیٰ دُشمنای شی اَم قد شی صُلح و آشتی مُونه۔

⁸مالِ کمِ که از راهِ صداقت و اِنصاف پَیدا شُده بَشه بِهتر اَسته، نسبَت دَ عایدِ کَلونِ که از راهِ بےاِنصافی پَیدا شُده بَشه۔

⁹اِنسان راه ھای خُو ره خود شی دَ دِل خُو مِیسَنجه مگم تَنھا خُداوند اَسته که قَدَمای شی ره اُستوار نِگاه مُونه۔

¹⁰اَمرِ پادشاه رقمِ وَحی اِلَھی وَری اَسته، و دان شی دَ قَضاوَت کدو نَباید اِشتِباه کنه۔

¹¹تَرازُو و سنگای دُرُست مَربُوط دَ خُداوند اَسته، و پگِ سنگای خَلته کارِ ازُو یَه۔

¹²عملِ بَد دَ نظرِ پادشاه ھا زِشت معلُوم مُوشه، چراکه تَختِ پادشاھی شی تَوَسُطِ عدالت اُستوار اَسته۔

¹³پادشاه از زِبونِ نیک و صادِق خوش شی مییه، و آدمِ راستگوی ره دوست دَره۔

¹⁴غَضَبِ پادشاه مِثلِ قاصِدِ مرگ اَسته، لیکِن آدمِ دانا قار شی ره تا مِیشَنّه۔

¹⁵دَ نُورِ رُوی پادشاه زِندَگی اَسته، و رضایَتِ ازُو مِثلِ آوُرِ بَھار اَلّی اَسته، که بارانِ رَحمَت ره میره۔

¹⁶حاصِل کدونِ حِکمَت از طِلّایی خالِص کده بِهتر اَسته، و پَیدا کدونِ دانایی از نُقره کده بالهتَره۔

¹⁷راهِ آدمای راستکار از بَدی دُوره؛ و ھر نفرِ که راهِ دُرُست ره اِنتِخاب کُنه، اُو جان خُو ره حِفظ مُونه۔

¹⁸عاقبَتِ کِبر و غُرُور، تَباھی اَسته، و عاقبَتِ دِلِ مَغرُور، سُقُوط۔

¹⁹بِهتر اَسته که آدم بےکِبر بَشه، و قد غرِیبا بِشِینه، نِسبَت دَزی که دَ وُلجِه نفرای مَغرُور شرِیگ شُنه۔

²⁰کسِیکه که یگو عمل ره حَکِیمانه انجام مِیدیه، اُو کامیاب مُوشه، و کسِیکه که دَ خُداوند تَوَکُّل کنه نیک بَخت مُوشه۔

²¹آدمِ فامِیده ره مردُم از رُوی دانایی شی مِینَخشه، و پَندای شِیرِینِ ازُو، تٲثِیر خُوب دَره۔

²²عقل بَلدِه صاحِب خُو چشمِه حَیات اَسته، مگم آدمای جاھِل، جَزای جھالَت و نادانی خُو ره مِینگره۔

²³دِلِ آدمِ دانا دَ وختِ توره گُفتو لب ھای شی ره ھِدایَت مُونه، و تعلِیمِ که اُو مِیدیه، فایدَمَند و پُر تٲثِیر اَسته۔

²⁴تورای خُوب رقمِ عسَل وَری بَلدِه جان شِیرِین، و بَلدِه اِستُغونا شفابَخش اَسته۔

²⁵یگو راه اَسته که دَ نظرِ اِنسان راست معلُوم مُوشه، مگم عاقبَتِ ازُو راه، مرگ اَسته۔

²⁶نَفسِ کارگر، اُو ره وادار دَ کار مُونه، و گُشنَگی کَورِه شی، اُو ره مجبُور مُونه۔

²⁷آدمِ خراب نقشِه شَیطانی مِیکشه، و تورای شی رقمِ آتِش اَلّی سوزِنده یَه۔

²⁸شخصِ بَد نِیَّت جنجال پَیدا مُوکُنه، و آدمِ چُغُل دوستا ره از یگدِیگِه شی جدا مُونه۔

²⁹آدمِ ظالِم ھمسایِه خُو ره بازی مِیدیه، و اُو ره دَ راهِ غَلَط رَھنُمایی مُونه۔

³⁰کسِیکه قد چِیمای خُو رَمُوز مُونه، اوخته اُو نَقشِه بَد مِیکشه، و کسی که لب و دَندون خُو ره میخَیه، اُو شرارَت خُو ره تَکمِیل مُونه۔

³¹مُوی سفید نِشانی پِیری و بُزُرگی اَسته، که یگ آدم دَ وسِیلِه عمل و رفتارِ نیک خُو دَ دِست میره۔

³²کسِیکه دیر قار شُنه از مردِ جَنگره بِهتر اَسته، و کسِیکه خود ره اِداره کُنه، از آدمِ که یگ شار ره دَ قَبضِه خُو گِرِفته، بالهتَره۔

³³پِشک دَ دامو اَندخته مُوشه، مگم ھر فَیصَله از جانِبِ خُداوند اَسته۔