Read Hazaragi امثال 18 Bible Online

امثال 18 - Hazaragi bible

امثال 18

¹آدمِ خودخاه خود ره از دِیگا جدا مُونه و دَ ضِدِ حِکمَت و دانایی دِیگرو اَسته۔

²آدمِ بےعقل از دانایی خوش شی نَمییه، و فقط دوست دَره نظرِیه دِلِ خود خُو ره نِشو بِدیه۔

³نَتِیجِه کارِ بَد، بےآبرُویی اَسته، و نَتِیجِه کارِ شرماوَر، رَسوایی۔

⁴تورای اِنسان رقمِ آوِ چُقُر اَلّی اَسته، و چشمِه حِکمَت، رقمِ آوِ جُوی وَری جاری۔

⁵رُوی دَدو دَ آدمِ بَدکار، خُوب نِییه، و نَه اَم پایمال کدونِ حقِ آدمِ بےگُناه۔

⁶تورای آدمِ بےعقل بَلدِه شی جنجال پَیدا مُونه، و دان شی لَت خوردو ره کُوی مُونه۔

⁷تورای آدمِ بےعقل باعِثِ تَباھی شی مُوشه، و لب ھای ازُو بَلدِه جانِ شی رقمِ دام وَری اَسته۔

⁸تورای آدمِ چُغُل رقمِ لُغمه ھای نانِ مَزهدار اَسته که دَ شَوقِ کَلو قُرت مُوشه و دَ وجُودِ اِنسان مُومَنه۔

⁹کسِیکه دَ کار سُستی و تَمبَلی مُونه بِرارِ آدمِ بیروکار حِساب مُوشه۔

¹⁰نامِ خُداوند یگ بُرجِ محکم اَسته؛ که آدمِ صادِق دَیده کده دَ مَنِه ازُو پناه مُوبَره۔

¹¹پَناهگاهِ دَولَتمَندا، مال و دَولَت شی اَسته؛ اُونا گُمان مُونه که پُول و پَیسِه شی مِثلِ دیوالِ بِلند، ازوا نِگاهبانی مُونه۔

¹²پیش ازی که اِنسان سُقُوط کُنه، کِبر دَ دِلِ شی پَیدا مُوشه، ولے فروتنی باعِثِ سربِلندی و عِزَّت مُوشه۔

¹³کسِیکه پیش از شِنِیدونِ یگ توره جواب مِیدیه اِی بےعقلی و بےاَدَبی شی ره نِشو مِیدیه۔

¹⁴روحِ اِنسان مِیتنه که اُو ره دَ وختِ ناجوری قوَّت بُبَخشه، مگم روحِ نااُمِید شُده ره کِی تَحَمُل مِیتنه؟

¹⁵دِلِ آدمِ دانا معرِفَت ره حاصِل مُونه، و گوشِ آدمای ھُوشیار، عِلم ره جُستُجو مُونه۔

¹⁶تُحفه و بَخشِش بَلدِه اِنسان یگ راه ره واز مُونه و اُو ره دَ پیشِ آدمای مُھِم مِیرسَنه۔

¹⁷دَ یگ محکمه کسِیکه اوّل توره مُوگیه، تورِه شی دُرُست معلُوم مُوشه، لیکِن اِی تا زمانی ره اَسته، که جانِبِ مُقابِل شی دلِیل ھای خُو ره نَگویه۔

¹⁸پِشک جنجال ره خاو مِیدیه و نِزاع ره از بَینِ آدمای زورتُو گُم مُونه۔

¹⁹رام کدونِ دِلِ بِرارِ رَنجِیده، سختتَر از گِرِفتونِ یگ شار قَوی اَسته؛ جنجال رقمِ دیوالِ پَخسه‌ای یگ قلعه وَری دَ بَینِ دُو نفر جدائی ره دَ وجُود میره۔

²⁰دِلِ اِنسان از ثَمَرِ دان شی سیر مُوشه، و از حاصِلِ لب ھای شی راضی۔

²¹زِندَگی و مرگِ اِنسان دَ اِختیارِ زِبون شی اَسته: ھر ثَمَرِ که از زِبون شی دَ وجُود مییه، نَتِیجِه گُفتار شی اَسته۔

²²کسِیکه خاتُو کُنه، نِعمَت پَیدا مُونه، دَ حقِیقَت اُو رِضای خُداوند ره حاصِل مُونه۔

²³آدمِ غرِیب دَ عُذر و زاری توره مُوگه، و لیکِن آدمِ پُولدار زورگویی مُونه۔

²⁴کسی که دوستای کَلو دَره، یَگونِ ازوا شاید باعِثِ تَباھی شی شُنه، مگم اُوطور دوست اَم اَسته که از بِرار کده نزدِیکتَره۔