Read Hazaragi امثال 2 Bible Online

امثال 2 - Hazaragi bible

امثال 2

¹بَچِه مه، اگه تورای مَره قبُول کُنی و دَستُورای مَره محکم بِگِیری،

²اگه دَ حِکمَت گوش بِدی و دِل تُو سُون بِینایی بَشه،

³اگه دانایی ره طلب کُنی و آواز خُو ره بَلدِه بِینایی بِلند کُنی،

⁴و اگه حِکمَت ره مِثلِ نُقره ڈُنڈَل کُنی و مِثلِ یگ خَزانِه تاشه شُده بِطَلبی،

⁵اُو غَیت معنای «تَرسِ خُداوند» ره مُوفامی، و شِناختِ خُدا ره حاصِل مُوکُنی،

⁶چراکه خُداوند حِکمَت ره عطا مُونه، و از دانِ ازُو عِلم و دانِش بُر مُوشه۔

⁷اُو پیروزی ره بَلدِه آدمای صادِق نِگاه مُونه و بَلدِه کسای که دَ راهِ راست رَیی یَه، اُو یگ سِپَر اَسته،

⁸تاکه راهِ اِنصاف و عدالت نِگاه شُنه۔ اُو از رَوِشِ موئمِنِین خُو حِمایت مُونه۔

⁹پس دَمزی رقم تُو مُوفامی که عدالت، اِنصاف و صداقت چی اَسته و ھر راهِ راست و خُوب ره دَرک کده مِیتنی۔

¹⁰چُون حِکمَت دَ دِل تُو داخِل مُوشه و دانِش جان تُو ره پُور از خوشی مُونه۔

¹¹بِینایی از تُو مُحافِظَت مُونه و دانایی تُو ره حِفظ کده

¹²از راهِ بَد نِجات مِیدیه، و از آدمِ که تورای خراب مُوگیه، تُو ره دُور نِگاه مُوکُنه،

¹³یعنی ازُو آدمای که راهِ راست ره ایله کده و دَ راه ھای ترِیکی گُناه رَیی اَسته۔

¹⁴اُو رقم آدما از کارای بَد لِذَّت مُوبَره و از تورای بَد خوش شی مییه۔

¹⁵راه ھای ازُو کسا کَج اَسته و اُونا طرِیقه ھای دُرُست ره ایله کده۔

¹⁶حِکمَت تُو ره از خاتُونِ زِناکار و از تورای نَرم و چَرب خاتُونِ بےگَنه نِجات مِیدیه۔

¹⁷اِی رقم خاتُو شُوی خُو ره که دَ وختِ جوانی گِرِفتُد، ایله مُونه و قَولِ پاک ره که دَ غَیتِ توی کدو دَ حُضُورِ خُدا دَدُد، پُرمُشت مُونه۔

¹⁸خانِه ازُو گِردآوِ مرگ اَسته، چُون راه ھای ازُو خاتُو سُون دُنیای مُرده ھا موره۔

¹⁹کسای که پیشِ ازُو موره ھیچ کُدَم شی پس نَه مییه و اُونا دَ راهِ حَیات نَمِیرَسه۔

²⁰پس دَ راهِ آدمای خُوب و نیک قَدَم بیل و دَ راهِ آدمای دُرُستکار ثابِت بُمَن۔

²¹چُون آدمای راستکار پایِه شی دَ زمی محکم اَسته، و مردُمِ پاک و بےعَیب دَ جای خُو باقی مُومَنه۔

²²مگم بَدکارا از رُوی زمی نابُود مُوشه و رِیشِه آدمای چالباز از زمی کَنده مُوشه۔