Read Hazaragi امثال 21 Bible Online

امثال 21 - Hazaragi bible

امثال 21

¹دِلِ پادشاه رقمِ آوِ جُوی اَلّی دَ دِستِ خُداوند اَسته، ھر طرف که بِخایه، اُو ره ھِدایَت مُونه۔

²تمام راه ھای اِنسان دَ نظرِ خود شی راست اَسته، مگم خُداوند دِلِ اِنسانا ره آزمایش مُونه۔

³دَ نظرِ خُداوند کارای نیک و با اِنصاف از قُربانی کده زیادتَر قابِلِ قبُول اَسته۔

⁴چِیمای مَغرُور و دِلِ پُرکِبر ھر دُوی شی کِشتِ آدمای بَدکار اَسته و گُناه حِساب مُوشه۔

⁵نَقشه ھای آدمِ تَلاشگَر دَزشی فایده مِیرسَنه، مگم عجَله کدو باعِثِ غرِیبی اِنسان مُوشه۔

⁶مال و دَولَتِ که از دروغ گُفتو دَ دِست مییه، رقمِ غُبار اَلّی اَسته که صاحِب خُو ره طرفِ دامِ مرگ مِیکَشَنه۔

⁷ظُلمِ آدمای بَدکار اُونا ره پای پاک تَباه مُونه، چراکه اُونا اِنصاف کدو ره رَد مُونه۔

⁸راهِ آدمِ گُناهکار کَج اَسته، مگم اعمالِ آدمِ پاک، راست۔

⁹زِندَگی کدو دَ یگ گوشِه بام بِهتر اَسته از زِندَگی کدو قد خاتُونِ جنجالی دَ یگ خانه۔

¹⁰جانِ آدمِ بَدکار، بَدی ره دوست دَره، و اُو دَ ھمسایِه خُو رَحم نَمُونه۔

¹¹از دِیدونِ جَزای آدمِ رِیشخَندگر، آدمِ نادو حِکمَت ره یاد مِیگِیره، و آدمِ دانا از تَربیه گِرِفتو، صاحِبِ معرِفَت مُوشه۔

¹²خُدا عادِل اَسته، و اُو خانِه بَدکار ره مِینگره، و بَدکارا ره دَ بَلا گِرِفتار کده نابُود مُونه۔

¹³کسِیکه گوش خُو ره از داد و فَریادِ غرِیبا بَند مُونه، اُو اَم یگ روز داد و فَریاد مُونه، مگم کس گوش نَمِیگِیره۔

¹⁴سَوغاتِ تاشَکی، آتِشِ قار ره تا مِیشَنّه، و رِشوَتِ مَخفی خَشمِ کَلو ره کم مُونه۔

¹⁵اِنصاف بَلدِه آدمای نیک خوشی مِیدیه، مگم باعِثِ تَرس و وَحشَتِ بَدکارا مُوشه۔

¹⁶کسِیکه از راهِ دانایی دُور موره، اُو قد مُردا یگ جای مُوشه۔

¹⁷آدمِ که عَیش و نوش ره دوست دَره، غرِیب مُوشه، و کسِیکه شراب و عَیاشی ره خوش دَره دَولَتمَند نَمُوشه۔

¹⁸بَدکار دَ عِوَضِ آدمِ نیک جَزا مِینگره، و آدمای فِریبکار دَ جای آدمای دُرُستکار۔

¹⁹زِندَگی کدو دَ بیابو بِهتر اَسته، نسبَت دَ یگ جای شِشتو قد خاتُونِ جَنگره و بَدخُوی۔

²⁰خانِه آدمِ دانا پُر از نِعمَتای خُوب و روغونِ زَیتُون اَسته، مگم آدمِ بےعقل اُونا ره ضایع مُونه۔

²¹کسِیکه دَ پُشتِ صداقت و مِھربانی بِگرده، اُو صاحِبِ زِندَگی خوش، کامیابی و اِحتِرام مُوشه۔

²²یگ آدمِ دانا مِیتنه شارِ آدمای زورتُو ره فَتَح کُنه و قلعِه ره که اُونا دَزشی اِعتِماد دَره، چَپه کُنه۔

²³کسِیکه دان و زِبون خُو ره نِگاه کُنه، خود ره از سختی ھا و مُشکِلات حِفظ مُوکُنه۔

²⁴آدمِ که کِبری و مَغرُور بَشه، نام شی ”رِیشخَندگر“ مُومَنه؛ اُو دَ کِبر و غُرُور عمل مُونه۔

²⁵خاھِشاتِ آدمِ تَمبَل باعِثِ نابُودی شی مُوشه، چراکه دِستای شی کار کدو ره رَد مُوکُنه۔

²⁶اُو تمامِ روز دَ شَوق و خیالپَلاو غَرق اَسته، دَ حالِیکه آدمِ نیک دَ سخاوَتمَندی مِیدیه و چِیزی ره از کس دِریغ نَمُونه۔

²⁷خُداوند از قُربانی بَدکارا نَفرَت دَره، خصُوصاً اگه اُو قد نِیَّتِ بَد تَقدِیم شُده بَشه۔

²⁸شاھِدِ دروغگویی نابُود مُوشه، مگم آدمِ که حقِیقَت ره گوش مِیگِیره، شاھِدی شی پایَدار مُومَنه۔

²⁹آدمِ بَدکار بےچِیم و پُر رُوی اَسته، مگم آدمِ راستکار راهِ خُو ره خُوب مِیسَنجه۔

³⁰ھیچ حِکمَت، ھیچ دانایی و ھیچ مَشوَره نَمِیتنه که دَ ضِدِ خُداوند عمل کُنه۔

³¹اَسپ بَلدِه روزِ جَنگ تَیار و آماده شُده، مگم پیروزی از طرفِ خُداوند اَسته۔