Read Hazaragi امثال 25 Bible Online

امثال 25 - Hazaragi bible

امثال 25

¹اینَمیا بَخشِ دِیگِه از جَمآوَری مَثَل ھای سُلَیمان پادشاه یَه، که نفرای حِزقیاه، پادشاهِ یھُودا، اُونا ره رُوی نوِیسی کده:

²تاشه کدونِ بعضی راز ھا، یکی از عظَمَت و بُزُرگی خُدا اَسته، مگم بُزُرگی پادشاه ھا دَ پَی بُردونِ بعضی مسائل، معلُومدار مُوشه۔

³امُو رقمِ که دِسترَسی دَ بِلندی آسمو و دَ غَوُچی زمی، نامُمکِنه، پَی بُردونِ دِلِ پادشاه ھا اَم اِمکان نَدَره۔

⁴مَوادِ ناپاک ره از نُقره جدا کُو تا زَرگَر ازُو یگ ظرف جور کنه۔

⁵آدمِ بَدکار ره از پیشِ پادشاه دُور کُو و تَختِ پادشاه دَ صداقت و راستی پایَدار مُومَنه۔

⁶خود ره دَ حُضُورِ پادشاه پیش پیش نَکُو، و دَ جای مردُمِ بُزُرگ ایسته نَشُو۔

⁷بِهتر اَسته که دَز تُو گُفته شُنه: ”بالهتَر بیه“ نِسبَت دَزی که تُو ره از پیشِ شخصِ بُزُرگ که چِیمای تُو اُو ره دِیده، دُور کُنه۔

⁸دِستی بَلدِه دعوا کدو دَ محکمه نَرو؛ نَشُنه که آخِرِکار ھمسایه تُو، تُو ره شرمِنده کُنه۔ پس دَ اُو غَیت تُو چی جواب مِیدی؟

⁹وختِیکه قد ھمسایِه خُو دعوا مُونی رازی ره که دَ بارِه ھمسایه خُو از آدمِ دِیگه شِنِیدی، فاش نَکُو؛

¹⁰نَشُنه که دِیگه کس بِشنَوه و تُو ره ملامَت کُنه، و بَدنامی از بَلِه تُو دُور نَشُنه۔

¹¹تورِه که دَ جای شی گُفته شُنه، رقمِ دانه ھای طِلّا وَری اَسته، که دَ مشقابِ نُقریی شَنده شُده۔

¹²نَصِیحَتِ آدمِ دانا بَلدِه کسی که گوشِ شِنَوا دَره رقمِ حَلقِه طِلّا و جَواھِرات اَلّی اَسته۔

¹³قاصِد صادِق و وفادار مِثلِ آوِ یَخ دَ گرمی تایستو جانِ اُو کسای ره تازه مُونه که اُو ره رَیی کده۔

¹⁴کسِیکه از سَخاوَتمَندی خُو لاف مِیزَنه، مگم دَ کس چِیز نَمِیدیه رقمِ باد و آوُرِ بےبارِش اَلّی اَسته۔

¹⁵آدمِ با حَوصِله مِیتنه که حاکِم ره قِناعَت بِدیه و زِبونِ نَرم مِیتنه حتّیٰ اُستُغو ره مَیده کُنه۔

¹⁶اگه عسَل پَیدا کدی، دَ اَندازِه شی بُخور، چراکه مُمکِنه دِل بَد شُده اِستِفراق کُنی۔

¹⁷پای خُو ره از رَفتونِ کَلو دَ خانِه ھمسایِه خُو بِگِیر، نَشُنه که اُو از تُو بیزار شُنه و بَد شی بیه۔

¹⁸کسِیکه دَ بارِه ھمسایِه خُو شاھِدی دروغ بِدیه، مِثلِ تَوَرزی، شمشیر و تِیرِ تیز وَری اَسته۔

¹⁹اعِتماد دَ آدمِ خاین دَ روزِ سختی رقمِ دَندونِ لَق و پای لَرزو اَلّی اَسته۔

²⁰بَیت خاندو دَ آدمِ غَمگِین مِثلِ ازی اَسته که کالای یگ نفر ره دَ روز یَخی از جان شی بُر کُنی و تُرشی ره دَ بَلِه شوره خاک بِندَزی۔

²¹اگه دُشمون تُو گُشنه یَه، دَزُو نان بِدی، و اگه تُشنه یَه، آو۔

²²چُون قد ازی عمل خُو قوغ ره دَ بَلِه سر شی پورته مُونی، و خُداوند اَجرِ امزی عمل تُو ره دَز تُو مِیدیه۔

²³امُو رقمِیکه بادِ شمال مییه و بارِش ره میره، امُو رقم زِبونِ غَیبَت گوی اَم قار و خَشم ره دَ بار میره۔

²⁴زِندَگی کدو دَ یگ گوشِه بام بِهتر اَسته از زِندَگی کدو قد خاتُونِ جنجالی دَ یگ خانه۔

²⁵خبرِ خوشی که از مُلکِ دُور مییه، مِثلِ ازی اَسته، که آوِ یَخ دَ جانِ تُشنه لب مِیرَسه۔

²⁶آدمِ صادِق که خود ره دَ پیش آدمِ بَدکار خَم مُوکُنه رقمِ خِڈ کدونِ آوِ چشمه و یا غَٹول کدونِ آوِ چِشمِه بُلبُلاغ اَسته۔

²⁷امُو رقمِیکه خوردونِ عسَل، غَدَر شی، خُوب نِییه، از مردُم تَوَقُع کدونِ تعرِیف و تَوصِیف اَم خُوب نِییه۔

²⁸کسِیکه دَ سرِ نَفس خُو حاکِم نِییه، اُو رقمِ شارِ بےدیوال و بےدِفاع وَری اَسته۔