Read Hazaragi امثال 31 Bible Online

امثال 31 - Hazaragi bible

امثال 31

¹اینیا تورای لیموئیل، پادشاهِ مَسَه اَسته، که آبِه شی دَزُو پَند دَد:

²چی بُگُم اَی بَچِه مه؟ چی توره بُگُم اَی بَچِه کَورِه مه؟ یا چی گب بِزنُم اَی بَچِه نذر و نیاز مه؟

³قوَّتِ جوانی خُو ره دَ خاتُونو خَرچ نَکُو، و راه و رَوِش خُو ره دَ اُو کسای که پادشاه ھا ره تَباه مُونه، اِفشا نَکُو۔

⁴اَی لیموئیل، بَلدِه پادشایو دُرُست نِییه که اُونا شراب بُخوره، و بَلدِه حُکُمرانا خُوب نِییه که شرابِ قَوی وُچی کُنه۔

⁵نَشُنه که اُونا ازی چِیزا وُچی کده قانُون ره پُرمُشت کُنه، و حقِ مظلُوما ره پایمال کُنه۔

⁶شرابِ قَوی ره دَ کسای بِدی که دَ اِنتِظارِ نابُودی خُو یَه، و شراب ره دَ آدمای بِدی که تَلخ کام و دِلتنَگ اَسته،

⁷تاکه وُچی کده فَقر و بَدبَختی خُو ره پُرمُشت کُنه، و سختی ھای خُو ره دِیگه دَ یاد خُو نَیره۔

⁸دان خُو ره بَلدِه کومَکِ گُنگه ھا و بےزِبونا واز کُو، و از حقِ بےچاره‌گو دِفاع کُو۔

⁹زِبون تُو بَند نَمَنه و دَ اِنصاف قَضاوَت بُکُو، و از حقِ غرِیبا و مُحتاجا دِفاع کُو۔

¹⁰یگ خاتُونِ خُوب ره کِی مِیتنه پَیدا کُنه؟ اَرزِشِ ازُو از جَواھِرات کده اَم کَلوتَر اَسته۔

¹¹دِلِ شُوی شی دَ سرِ ازُو اِعتِماد دَره، و شُوی شی دَ ھیچ چِیز مُحتاج نِییه۔

¹²اُو دَ تمامِ روزای زِندَگی خُو قد شُوی خُو خُوبی مُونه، نَه بَدی۔

¹³اُو پاشُم و کَتان بَلدِه خُو پَیدا مُونه، و اُونا ره دَ خوشی قد دِستای خُو میریشه۔

¹⁴مِثلِ کِشتی ھای تُجارتی اَلّی که سامان از جای ھای دُور میره، اُو اَم خوراک خُو ره از دُور میره۔

¹⁵صَباح گاه که ھَنُوز ترِیک اَسته، اُو باله مُوشه، و بَلدِه خانَوار خُو خوراک تَھیه مُوکُنه و دَ کنِیزای خُو اَم حقِ نان شی ره مِیدیه۔

¹⁶یگ پَٹی زمی ره دَ نظر گِرِفته اُو ره میخَره، و دَ کمالِ دِستای خُو یگ باغِ انگُور جور مُونه۔

¹⁷کَمَر خُو ره محکم بَسته کده، و بازُوھای خُو ره بَلدِه کار کدو قَوی مُونه۔

¹⁸اُو مِینگره که تُجارت شی یگ نَتِیجِه خُوب دَره۔ چِراغ شی تمامِ شاو از خاطرِ شاوکاری شی گُل نَمُوشه،

¹⁹اُو تار ره دَ نیفهچیو بَند کده سنگ ره قد دِست خُو تَو مِیدیه۔

²⁰اُو دِستِ خَیر خُو ره دَ غرِیبا واز مُونه، و دِستای خُو ره سُون مردُمِ مُحتاج ایله کده خَیرات مِیدیه۔

²¹اُو از یَخی و بَرفِ زِمِستو تَرس نَمُوخوره، چراکه بَلدِه تمامِ خانَوادِه خُو کالای گرم تَھیه کده۔

²²اُو بَلدِه خود خُو پوشاک جور مُونه، و کالای کَتانِ نَرم و اَرغَوانی دَ جان خُو مُونه۔

²³شُوی شی دَ مَنِه شار و دَربار نامتُو یَه، و قد بُزُرگا و کلانای مَنطقه مِیشِینه۔

²⁴اُو کالای کَتان جور کده، اُونا ره سَودا مُونه، و کَمَر بَندا ره بَلدِه تُجارا تَیار مُونه۔

²⁵قوَّت و عِزَّت، کالای ازُو اَسته، و اُو روزای آیندِه خُو ره خوشحال مِینگره۔

²⁶اُو دان خُو ره دَ حِکمَت واز مُونه، و تعلِیمِ پُر مُحَبَّت دَ سرِ زِبون شی اَسته۔

²⁷اُو دَ راه و رَوِشِ خانَوادِه خُو خُوب تَوَجُه مُونه، و نانِ تَمبَلی ره نَمُوخوره۔

²⁸اَولادای شی باله شُده اُو ره تعرِیف مُونه، و شُوی شی اَم صِفَتِ ازُو ره کده مُوگه:

²⁹”غَدَر خاتُونو کارای نیک و خُوب کده، مگم تُو از پگِ ازوا کده بےمِثال اَستی۔“

³⁰مَقبُولی و نُوربَندی، فِریبِنده و ناپایَدار اَسته، مگم خاتُونِ که از خُداوند تَرس مُوخوره، قابِلِ تعرِیفه۔

³¹اَجرِ کارای شی ره دَزُو بِدِید، و بیلِید که عمال شی دَ دَرگِه شار و مَجلِسِ کلانا باعِثِ تعرِیف و تَوصِیف شی شُنه۔