Read Hazaragi امثال 7 Bible Online

امثال 7 - Hazaragi bible

امثال 7

¹بَچِه مه، تورای مَره نِگاه کُو و دَستُورای مَره محکم بِگِیر۔

²از احکام مه اِطاعَت کُو تاکه زِنده بُمَنی؛ تعلِیم مَره مِثلِ دِیدَنَکِ چِیم خُو حِفاظَت کُو۔

³اُونا ره دَ ناخُونای دِست خُو بَسته کُو، و دَ وَرَقِ دِل خُو نوِشته کُو۔

⁴دَ حِکمَت بُگی: ”تُو خوار مه اَستی“ و دانایی ره ھَمدَم خُو حِساب کُو،

⁵تاکه اُونا تُو ره از خاتُونِ بَدکار و از خاتُونِ بیگَنه که تورای نَرم و چَرب مُوگه، دُور نِگاه کُنه۔

⁶ما از خانِه خُو توخ کدُم و از کِلکِین بورُو ره دِیدُم،

⁷اوخته، دَ مَنِه آدمای نادو، دَ مینکلِ جوانا، یگ جوانِ بےعقل ره دِیدُم،

⁸که اُو دَ مَنِه کُوچه راه رفته از یگ گوشِه سَرَک تیر شُده دَ خانِه امزُو خاتُو رسِید۔

⁹امُو غَیت شام دَ عَینِ روز شِشتو، و ترِیکی شاو بُود،

¹⁰که یگ خاتُو قد کالای فاحِشَگَری و نِییَتِ بَد سُون شی میمَد۔

¹¹خاتُونِ قَوشَرهگَر و سرکَش که پای شی دَ خانه گِیر نَمُونه،

¹²گاھی دَ کُوچه ھا و گاھی دَ بازار، و دَ ھر گوشه مردَکو ره گیته مُونه۔

¹³اُو امُو بَچِه جوان ره گِیر کده ماخ کد و از بےحَیایی دَزُو گُفت:

¹⁴”گوشتِ قُربانی تَیار اَسته، چراکه ما اِمروز نذرِ قُربانی خُو ره پُوره کدیم۔

¹⁵دَمزی دلِیل دَ خوش اَمَدِ ازتُو دَ بورُو اَمَدیم، و اوگَل کده آخِرِکار تُو ره پَیدا کدُم۔

¹⁶دَ بِسترِ خاو خُو توشَکای رنگارنگ از رَختِ کَتانِ مِصری اَوار کدیم۔

¹⁷جاگِه خُو ره قد عطرِ مَرو، عود و سَلِیخه پاش دَده خوشبُوی کدیم۔

¹⁸بیه که تا صُبح عِشق بازی کده از مُحَبَّتِ یگدِیگِه خُو لِذَّت بُبَری،

¹⁹چراکه شُوی مه دَ خانه نِییه و دَ یگ سفرِ دُور رفته۔

²⁰اُو یگ خَلطه نُقره قد خُو گِرِفته بُرده و تا آخِرِ ماه پس نَمییه۔“

²¹دَ اِی تَرتِیب اُو امُو جوان ره قد تورای گرم و مُلایم خُو بازی دَد و اُو ره قد گبای لَخشُم خُو مجبُور کد۔

²²دَمزُو غَیت اُو از پُشت شی رَیی شُد رقمِ نَرگاو اَلّی که دَ کُشتارگاه موره و رقمِ آھُو وَری که بےخبر دَ بَلِه دام قَدَم مِیزَنه،

²³تا غَیتِیکه تِیر دَ دِل شی بُخوره۔ اُو رقمِ مُرغاک اَلّی اَسته که دَ وُرغَه موفته و نَمُوفامه که زِندَگی شی دَ خطر اَسته۔

²⁴پس، اَی بچکِیچای مه، دَز مه گوش بِدِید و دَ تورای مه خُوب فِکر خُو ره بِگِیرِید:

²⁵نَه ایلِید که دِل شُمو دَ راهِ ازُو خاتُو مایل شُنه؛ نَشُنه که اُو شُمو ره سُون گُمراھی بُبَره،

²⁶چراکه اُو کَلو مردَکو ره خانه خراب کده، و غَدَر کسا ره دَ تَباھی اَندخته۔

²⁷خانِه ازُو رقمِ راهِ اَسته، که طرفِ عالمِ مُردا موره و عاقبَت دَ خانِه مرگ مِیرسَنه۔